ສະຫາຍ ນາງ ລຳພອຍ ສີອັກຄະຈັນ ເປັນເລຂາພັກຮາກຖານພະແນກ ຮສສ

   ກອງປະຊຸມໃຫຍ່ຄັ້ງທີ VII ຂອງໜ່ວຍພັກຮາກຖານພະແນກແຮງງານ ແລະສະຫວັດດີການສັງຄົມ (ຮສສ) ນະຄອນຫຼວງວຽງຈັນໄດ້ໄຂຂຶ້ນໃນວັນທີ 21 ສິງຫາຜ່ານມາໂດຍພາຍໃຕ້ການເປັນປະທານຂອງສະຫາຍ ນາງ ລຳພອຍ ສີອັກຄະຈັນ ກຳມະການພັກ,ຫົວໜ້າພະແນກແຮງງານ ແລະສະຫວັດດີການສັງຄົມນະຄອນຫຼວງວຽງຈັນ, ໃຫ້ກຽດເຂົ້າຮ່ວມຂອງສະຫາຍ ສີຫຸນ ສິດທິລືໄຊ ຮອງເລຂາຄະນະພັກ,ຮອງເຈົ້າຄອງນະຄອນຫຼວງວຽງຈັນ,ພ້ອມດ້ວຍສະມາຊິກພັກ ແລະພາກສ່ວນທີ່ກ່ຽວ ຂ້ອງ.

  ກອງປະຊຸມໄດ້ພ້ອມກັນຄົ້ນຄວ້າ ແລະປະກອບຄໍາເຫັນໃສ່ຮ່າງບົດລາຍງານການເມືອງ,ແຜນພັດທະນາເສດຖະກິດ-ສັງຄົມ, ແຜນພັດທະນາຂະແໜງການ ແລະບົດສໍາຫຼວດການນໍາພາລວມຂອງຄະນະພັກຊຸດເກົ່າ, ກອງປະຊຸມໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ບົດຮຽນໃນການຊີ້ນໍາໆພາ ແລະ ການຈັດຕັ້ງປະຕິ ບັດມະຕິກອງປະຊຸມໃຫຍ່ໃນ 5 ປີຜ່ານມາ, ພ້ອມນີ້ກອງປະຊຸມຍັງໄດ້ເປັນເອກະສັນກັນຮັບຮອງເອົາທິດທາງແຜນການ 5 ປີ, ນັບແຕ່ປີ 2021-2025.

 ກອງປະຊຸມໄດ້ຜ່ານມະຕິຕົກລົງຂອງຄະນະປະຈຳພັກນະຄອນຫຼວງວຽງຈັນສະບັບເລກທີ 721/ຄພ.ນວ, ລົງວັນທີ 20 ສິງຫາ 2020 ວ່າດ້ວຍການສ້າງຕັ້ງຄະນະ ພັກຮາກຖານພະແນກແຮງງານ ແລະສະຫວັດດີການສັງຄົມນະຄອນຫຼວງວຽງຈັນ, ໂດຍບົ່ງຕົວແຕ່ງຕັ້ງສະຫາຍ ນາງ ລຳພອຍ ສີອັກຄະຈັນ ກຳມະການພັກຫົວໜ້າພະແນກແຮງງານ ແລະ ສະຫວັດດີການສັງຄົມນະຄອນຫຼວງວຽງຈັນເປັນເລຂາຄະນະພັກຮາກຖານ, ສະຫາຍ ຄຳແກ້ວ ມະຫາໄຊ ເປັນຮອງເລຂາຄະນະພັກຮາກ ຖານ, ສະຫາຍ ໂດອິວິ ລະນາມ, ສະຫາຍເພັງໄຊຍະສອນ, ສະຫາຍ ສົມຫວັງ ອິນທະວົງ, ສະຫາຍ ດຣ. ຄຳພູວົງ ກອງມະນີ ເປັນກຳມະການພັກ, ສະຫາຍ ນາງທອງພັນຈັນ ສະຫວ່າງເປັນກຳມະການພັກ, ທັງເປັນປະທານຄະນະກວດກາພັກ, ສະຫາຍ ວິໄລກອນ ຈັນທະລາຕີ ເປັນຮອງປະທານຄະນະກວດກາພັກ.

ໃນໂອກາດເຂົ້າຮ່ວມກອງປະຊຸມສະຫາຍ ສີຫຸນ ສິດທິລືໄຊ ຍັງໄດ້ໂອ້ລົມ ແລະຊີ້ນຳບາງບັນຫາກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ການຊີ້ນໍາໆພາຂອງຄະນະໜ່ວຍພັກຮາກຖານຊຸດເກົ່າທີ່ໄດ້ຊີ້ນໍາໆພາພະນັກງານສະມາຊິກພັກ, ປະຕິບັດໜ້າທີ່ການເມືອງຂອງຕົນ, ຍາດໄດ້ຜົນງານສຳເລັດຫຼາຍດ້ານ, ພ້ອມກັນນັ້ນຍັງໄດ້ເນັ້ນໜັກຄະນະພັກຮາກຖານພະແນກແຮງງານ ແລະສະຫວັດດີການສັງຄົມເອົາໃຈໃສ່ສຶກສາອົບຮົມການເມືອງແນວຄິດ, ເຮັດໃຫ້ສະມາຊິກພັກ, ພະນັກງານລັດຖະກອນ, ໃຫ້ກໍາແໜ້ນແນວທາງປ່ຽນແປງໃໝ່ຂອງພັກ, ເຊື່ອມຊຶມຢ່າງເລິກເຊິ່ງ ແລະເຊື່ອໝັ້ນເສັ້ນທາງກ້າວເດີນຂອງປະເທດຊາດ,ຕໍ່ອຸດົມການຂອງພັກ, ມີຄວາມຈົ່ງຮັກພັກດີຕໍ່ພັກ ແລະປະຊາຊົນບັນດາເຜົ່າ, ເພີ່ມທະວີຄວາມສາມັກຄີພາຍໃນພັກໃຫ້ໜັກແໜ້ນລະຫວ່າງສະມາຊິກພັກພະນັກງານ, ຍົກສູງສະຕິລະວັງຕົວຕໍ່ກົນອຸບາຍການຫັນປ່ຽນຂອງສັດຕູ, ເຊີດຊູນໍ້າໃຈຮັກຊາດ, ຮັກລະບອບໃໝ່, ເພື່ອພ້ອມກັນປະຕິບັດໜ້າທີ່ການເມືອງຈັດຕັ້ງປະຕິບັດວຽກງານຂົງເຂດແຮງງານ ແລະສະຫວັດດີການສັງຄົມໃຫ້ຖືກຕ້ອງຕາມລະບຽບກົດໝາຍ, ພ້ອມທັງສ້າງກົນໄກຄຸ້ມຄອງບໍລິຫານຈັດການຢ່າງມີປະສິດທິຜົນໂດຍສະເພາະການຫັນການຄຸ້ມຄອງເຂົ້າສູ່ລະບົບທີ່ທັນສະໄໝ.

แชร์