ລັດ ແລະທຸລະກິດ ຫາລືກຳນົດກິດຈະກຳສົ່ງເສີມທ່ອງທ່ຽວລາວ

  ວັນທີ 21 ສິງສາ 2020 ທີ່ນະຄອນຫຼວງວຽງຈັນ ສະພາການຄ້າ ແລະອຸດສາຫະກໍາແຫ່ງຊາດໄດ້ຈັດກອງປະຊຸມປຶກສາຫາລືລະຫວ່າງພາກລັດ ແລະພາກທຸລະກິດ ເພື່ອກໍານົດກິດຈະກໍາສົ່ງເສີມການທ່ອງທ່ຽວລາວພາຍຫຼັງທີ່ມີການຜ່ອນຜັນມາດຕະການຜົນກະທົບຈາກພະຍາດໂຄວິດ-19 ໂດຍການເປັນປະທານຂອງ ທ່ານ ອຸເດດ ສຸວັນນະວົງ ປະທານສະພາການຄ້າ ແລະອຸດສາຫະກໍາແຫ່ງຊາດລາວ, ທ່ານ ສະຫວັນຄອນ ຣາຊມຸນຕຣີ ຮອງລົດຖະມົນຕີກະຊວງວັດທະນະທໍາ ແລະ ທ່ອງທ່ຽວ, ມີບັນດາຫົວໜ້າກົມ, ຮອງກົມ, ຕາງໜ້າຈາກກະຊວງຕ່າງອ້ອມຂ້າງສູນກາງ, ພະແນກການຕ່າງໆອ້ອມຂ້າງນະຄອນຫຼວງວຽງຈັນ,ຜູ້ຕາງໜ້າຈາກພາກທຸລະກິດ ແລະບັນດາອົງການຈັດຕັ້ງສາກົນທີ່ປິ່ນອ້ອມຂະແໜງການທ່ອງທ່ຽວເຂົ້າຮ່ວມ.

   ທ່ານ ສະຫວັນຄອນ ຣາຊມຸນຕຣີ ກ່າວວ່າ: ດັ່ງທີ່ທ່ານຮູ້ນໍາກັນແລ້ວວ່າເຊື້ອພະຍາດໂຄວິດ-19 ເປັນພະຍາດລະບາດຮ້າຍແຮງທີ່ກໍາລັງພວມສືບຕໍ່ລະບາດຢູ່ຫຼາຍປະ ເທດໃນທົ່ວໂລກ, ມາຮອດມື້ນີ້, ທົ່ວໂລກມີຜູ້ຕິດເຊື້ອພະຍາດດັ່ງກ່າວຫຼາຍກວ່າ22,7 ລ້ານຄົນ, ເສຍຊີວິດເກືອບ 8 ແສນຄົນ, ມັນໄດ້ສົ່ງຜົນກະທົບຢ່າງໃຫຍ່ຫຼວງຕໍ່ເສດຖະກິດຂອງທຸກປະເທດໃນທົ່ວໂລກ, ໃນນັ້ນ, ອຸດສາຫະກໍາການທ່ອງທ່ຽວໃນໂລກແມ່ນໄດ້ຮັບຜົນກະທົບໂດຍກົງເຊັ່ນ: ການບໍລິການຂົນສົ່ງ ແລະ ທຸລະກິດການທ່ອງທ່ຽວໄດ້ຢຸດສະງັກລົງ, ສໍາລັບ ສປປ ລາວ ເຮົາໄດ້ຮັບຜົນກະທົບແມ່ນເລີ່ມແຕ່ເດືອນມິຖຸນາ 2020 ເປັນຕົ້ນມາ, ນັກທ່ອງທ່ຽວສາກົນໄດ້ຍົກເລີກສາຍການທ່ອງ ທ່ຽວ, ຍົກເລີກການຈອງຫ້ອງພັກ (ໂຮງແຮມ-ຣີສອດ-ເຮືອນພັກ) ສະຖານທີ່ທ່ອງທ່ຽວ ແລະ ອື່ນໆເຮັດໃຫ້ຈໍານວນນັກທ່ອງທ່ຽວມາທ່ຽວ ສປປ ລາວ ໃນໄລຍະ 6 ເດືອນຕົ້ນປີຫຼຸດລົງເຖິງ 60% ຖ້າທຽບໃສ່ໄລຍະດຽວກັນຂອງປີ 2019 ແລະຄາດວ່າໝົດປີ 2020 ນີ້ຈໍານວນນັກທ່ອງທ່ຽວສາກົນມາທ່ຽວ ສປປ  ລາວ ອາດຈະບໍ່ເຖິງ 1 ລ້ານຄົນ.

  ເລີ່ມແຕ່ທ້າຍເດືອນ 5 ມາຮອດປະຈຸບັນ ສປປ ລາວ ກໍຄືຫຼາຍປະເທດໃນພາກພື້ນ ແລະໃນໂລກໄດ້ຄ່ອຍໆອອກມາດຕະການຜ່ອຍຜັນເທື່ອລະໜ້ອຍ, ແຕ່ເຖິງຢ່າງໃດກໍຕາມຜົນກະທົບດັ່ງກ່າວຍັງອາດຈະບໍ່ສິ້ນສຸດລົງໃນເວລາອັນໃກ້ນີ້, ການລະບາດຂອງພະຍາດໂຄວິດ-19 ໃນຄັ້ງນີ້ມັນເຮັດຝຫ້ທົ່ວສັງຄົມຕ້ອງໄດ້ປັບປຸງວິທີການດໍາລົງຊີວິດຄືນໃໝ່ຊຶ່ງເອີ້ນວ່າ: New Noral ໂດຍການໃຫ້ຄວາມສໍາຄັນຕໍ່ບັນຫາສຸຂະພາບຫຼາຍຂຶ້ນ, ການເວັ້ນໄລຍະທາງທາງສັງຄົມ, ການໃສ່ຜ້າປິດປາກຕະຫຼອດຮອດການຄົ້ນຄວ້າວິທີການຕ່າງໆກ້າວໄປສູ້ການຄຸ້ມຕົນເອງເພິ່ງຕົນເອງເທື່ອລະກ້າວຢ່າງແຂງແຮງ, ເຖິງວ່າ ສປປ ລາວກໍຄືບັນດາປະຊາຊາດໃນທົ່ງໂລກກໍາລັງປະເຊີນກັບບັນຫາການລະບາດຂອງພະຍາດໂຄວິດ-9 ກໍຕາມແຕ່ພວກເຮົາກໍກໍາລັງຮ່ວມກັນສຸມທຸກຄວາມພະຍາຍາມທີ່ຈະເຮັດໃຫ້ຜົນກະທົບຕໍ່ຊີວິດການເປັນຢູ່ຂອງປະຊາຊົນໃນຂອບເຂດທົ່ວປະເທດໃຫ້ມີໜ້ອຍທີ່ສຸດ ແລະຊອກຫາວິທີທາງເໝາະສົມເພື່ອຊ່ວຍຟື້ນຟູການທ່ອງທ່ຽວໃຫ້ກັບເຂົ້າສູ້ສະພາບທີ່ດີຂຶ້ນເທື່ອລະກ້າວ.

แชร์