ສຳມະນາປະກອບຄຳເຫັນໃສ່ຮ່າງແຜນພັດທະນາເສດຖະກິດ-ສັງຄົມ 5 ປີ

  ກອງປະຊຸມສຳມະນາວິທະຍາສາດປະກອບຄຳຄິດ-ຄຳເຫັນໃສ່ຮ່າງລາຍງານການເມືອງ ແລະ ຮ່າງແຜນພັດທະນາເສດຖະກິດ-ສັງຄົມ 5 ປີຄັ້ງທີ IX (2021-2025) ຕໍ່ກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງຄຳມ່ວນໄຂຂຶ້ນໃນວັນທີ19 ສິງຫາ 2020 ໂດຍການເປັນປະທານຂອງທ່ານ ສົມໃຈ ເພັດສີນວນ ຮອງເລຂາພັກແຂວງຄຳມ່ວນ,ຫົວໜ້າອະນຸກຳມະການເນື້ອໃນກອງປະຊຸມໃຫຍ່ຄັ້ງທີ X ຂອງແຂວງ,ມີບັນດາສະຫາຍຄະນະປະຈຳພັກແຂວງ,ກຳມະການພັກແຂວງ, ເລຂາຄະນະພັກຮາກຖານ, ໜ່ວຍພັກ, ຫົວໜ້າພະແນກການ, ກົມກອງແລະບັນດາສະຫາຍປັນຍາຊົນຊັ້ນປະລິນຍາໂທໃນສາຂາຕ່າງໆອ້ອມຂ້າງແຂວງເຂົ້າຮ່ວມ.

 ກອງປະຊຸມແມ່ນໄດ້ຜ່ານຮ່າງລາຍງານການເມືອງທີ່ຈະສະເໜີຕໍ່ກອງປະຊຸມໃຫຍ່ຄັ້ງທີ X ຂອງອົງ ຄະນະພັກແຂວງແລະຮ່າງແຜນພັດທະນາເສດຖະກິດ-ສັງຄົມ 5 ປີ (2021-2025) ຊຶ່ງເປັນເອກະສານທີ່ສຳຄັນໃນການກຳນົດທິດທາງ, ເປົ້າໝາຍ, ຈຸດສຸມ, ຕົວຊີ້ບອກ ແລະ ກຳນົດໂຄງການເພື່ອພ້ອມກັນສຸມໃສ່ຈັດຕັ້ງປະຕິບັດ ແລະເພື່ອໃຫ້ບັນດາສະຫາຍທີ່ເຂົ້າຮ່ວມໄດ້ຄົ້ນຄວ້າ, ປະກອບຄຳຄິດເຫັນຢ່າງເລິກເຊິ່ງໃນແຕ່ລະຂົງເຂດວຽກງານທີ່ຍັງເຫັນໄດ້ວ່າບັນຫາໃດຄວນຈະປັບປຸງ ຫຼືຍັງມີບັນ ຫາໃດທີ່ຍັງບໍ່ຖືກຕ້ອງ, ບໍ່ຄົບຖ້ວນກໍ່ສາມາດປະກອບຄຳຄິດ-ຄຳເຫັນເພີ່ມເຕີມເພື່ອເປັນການແລກປ່ຽນ, ຖອດຖອນບົດຮຽນ ແລະນຳມາປັບປຸງແກ້ໄຂໃຫ້ສຳເລັດຂາດຕົວ ບົນພື້ນຖານການປະກອບຄຳຄິດເຫັນຢ່າງສ້າງສັນ, ພາວະວິໄສ, ສາມາດນຳໄປຈັດຕັ້ງປະຕິບັດໄດ້ຈິງ ແລະ ເພື່ອຮັບປະກັນໃຫ້ວຽກງານແຕ່ລະຂົງເຂດມີຄວາມລະອຽດ, ຊັດເຈນ, ເລິກເຊິ່ງເວົ້າສະເພາະແມ່ນຮັບປະກັນເຮັດໃຫ້ທັງສອງຮ່າງເອກະສານດັ່ງກ່າວຖືກຕ້ອງຕາມບາດກ້າວ, ຂັ້ນຕອນ, ເໝາະສົມກັບສະພາບການ, ເງື່ອນໄຂ-ທ່າແຮງ, ມີເນື້ອໃນຄົບຖ້ວນ ສົມບູນ, ມີຄວາມເປັນເອກະພາບເພື່ອພ້ອມກັນສ້າງບາດກ້າວຫັນປ່ຽນໃໝ່ຢ່າງຕັ້ງໜ້າໃນການພັດທະນາແຂວງຄຳມ່ວນໃນຊຸມປີຕໍ່ໜ້າ.

แชร์