ຖວທ ເມືອງຄູນຄໍາ ລົງເກັບກໍາຂໍ້ມູນພັດທະນາແຫຼ່ງທ່ອງທ່ຽວຕາດເທວະດາ

  ວັນທີ 15 ສິງຫາ 2020 ທາງຫ້ອງການຖະແຫຼງຂ່າວ, ວັດທະນະທໍາ ແລະທ່ອງທ່ຽວເມືອງຄູນຄໍາ ໄດ້ສົມທົບກັບບໍລິສັດບີເຄກໍ່ສ້າງຂົວທາງ ແລະຊົນລະປະທານຈໍາກັດລົງເກັບກໍາຂໍ້ມູນປະຫວັດຄວາມເປັນມາຂອງບ້ານນໍ້າສະນາມຕິດພັນກັບປະຫວັດຄວາມປັນມາຂອງແຫຼ່ງທ່ອງທ່ຽວຕາດຟ້າ-ຕາດເທວະດາດ້ວຍການນໍາພາຂອງທ່ານ ນາງ ວັນລະຄານ ໄຊຍະລາດ ຮອງຫົວໜ້າຫ້ອງການຖະແຫຼງຂ່າວ, ວັດທະນະທໍາ ແລະທ່ອງທ່ຽວເມືອງ ແລະທ່ານ ພູຄໍາພິລາວົງ ຮອງຜູ້ອໍານວຍການບໍລິສັດຕາດຟ້າເອໂກທົວຣິດເຊິມ,ມີບັນດາທ່ານໃນຄະນະຫ້ອງຖະແຫຼງຂ່າວ, ວັດທະນະທໍາ ແລະທ່ອງທ່ຽວພ້ອມດ້ວຍພະນັກງານວິຊາການ, ຄະນະອໍານວຍການບໍລິສັດຕາດຟ້າເອໂກທົວຣິດເຊິມ, ນາຍບ້ານພ້ອມດ້ວຍຄະນະບ້ານນໍ້າສະນາມເຂົ້າຮ່ວມ.

  ໃນການລົງເກັບກໍາຂໍ້ມູນປະຫວັດຄວາມເປັນມາຂອງບ້ານນໍ້າສະນາມຕິດພັນກັບການພັດທະນາສະຖານທີ່ທ່ອງທ່ຽວຕາດຟ້າ-ຕາດເທວະດາໃນຄັ້ງນີ້ໂດຍມີທ່ານ ຄໍາສົມ ວິໄລຫົງ ເປັນຜູ້ເລົ່າ, ບັນດາເຖົ້າຂຸນຊົງຄຸນວຸດທິຂອງບ້ານຊ່ວຍໃນການປະກອບຄໍາຄິດຄໍາເຫັນໃນຄວາມເປັນຈິງຕາມການເລົ່າຂານຂອງຜູ້ເຖົ້າຜູ້ແກ່ແຕ່ດຶກດໍາບັນມີພໍ່ຄ້າຊື່ວ່າທ້າວກິ ແລະທ້າວ ຫໍາ ທີ່ເດີນທາງຄົມມະນາຄົມທາງນໍ້າຈາກບ້ານທ່າອຸເທນ (ປະເທດໄທ) ມາຄ້າຂາຍຢູ່ເຂດປາກຫ້ວຍນໍ້າໄຮເປັນບ່ອນ ແລກປ່ຽນສິນຄ້າລະຫວ່າງພໍ່ຄ້າກັບຜູ້ທີ່ເດີນທາງມາຊື້ເຄື່ອງຈາກຊາຍແດນຫວຽດນາມ ຊື່ວ່າພໍ່ເຖົ້າເຖິນ ແລະພໍ່ເຖົ້າຖຽນ, ຫຼັງຈາກນັ້ນເຂົ້າເຈົ້າກໍພາກັນປຶກສາຫາລືກັນປຸກຕູບ (ສາງບັນຈຸເຄື່ອງຂາຍ) ເພື່ອຄວາມສະດວກໃນການໄປມາຫາສູ່ກັນເບື້ອງຕົ້ນມີພຽງ 4 ຄອບຄົວ,ຫຼັງຈາກມີການພັດທະນາຫຼາຍຍຸກຫຼາຍສະໄໝ,ມີຫຼາຍຊົນຊາດຊົນເຜົ່າ, ມີທັງຄົນລາວ ແລະຊາວຕ່າງດ້າວຫຼັ່ງໄຫຼເຂົ້າມາປຸກຍ້າວປຸກເຮືອນ ເພື່ອເປັນການສ້າງສາພັດທະນາ ດ້ວຍການຖາງປ່າເຮັດໄຮ່ເຮັດນາ, ເຮັດຮົ້ວ-ສວນ ແລະຫາກິນຕາມທໍາມະຊາດນັ້ນແມ່ນວິຖີຊີວິດຂອງຊາວລາວໃນສະໄໝກ່ອນສະນັ້ນ ຈຶ່ງເປັນສາເຫດໃນການພົບເຫັນແຫຼ່ງທໍາມະຊາດຫຼາຍແຫ່ງເປັນຕົ້ນເແມ່ນສະຖານທີ່ແຫ່ງນີ້ໜ້ອຍຄົນທີ່ຈະໄປຮອດໄປເຖິງເພາະເປັນເຂດຫ່າງໄກຈາກຂອບເຂດບ້ານ, ເປັນສະຖານທີ່ສັກສິດ ແລະ ກວ້າງຂວາງສົມຄວນພໍຂຶ້ນໄປຮອດກໍມີສວນແຫ່ງໜຶ່ງພາຍໃນສວນມີຕົ້ນອ້ອຍ 2 ຕົ້ນ, ຕົ້ນໝາກເຜັດ 2 ຕົ້ນ ແລະຕົ້ນຢາສູບ 2 ຕົ້ນ, ເປັນໝາກ ແລະ ງາມຕະຫຼອດປີແຕ່ລະຊະນິດເກັບກິນ ແລະ ນໍາໃຊ້ໄດ້ແຕ່ເອົາກັບບ້ານບໍ່ໄດ້, ແນມໄປທາງໃດກໍເຫັນແຕ່ເມກ, ໝອກ, ເປັນບ່ອນພູສູງ, ຊັນ, ເປັນຊັ້ນໆຄ້າຍຄືມີຜູ້ເນລະມິດປັ້ນແຕ່ງເອົາໄວ້ເພີ່ນຈຶ່ງເອີ້ນວ່າ: (ຕາດຟ້າ ຫຼືວ່າຕາດເທວະດາ) ເນື່ອງຈາກສູງຊັນນັ້ນເອງ. 

 

 

แชร์