ສ້າງຄວາມເຂັ້ມແຂງດ້ານເງິນໃຫ້ຫ້ອງການສຶກສາ ເມືອງ 4 ແຂວງ

  ໃນວັນທີ 17 ສິງຫາ ຜ່ານມານີ້ທີ່ພະແນກສຶກສາທິການ ແລະກີລາແຂວງຈໍາປາສັກໄດ້ເປີດກອງປະຊຸມສໍາມະນາສ້າງຄວາມເຂັ້ມແຂງວຽກງານການເງິນໃຫ້ແກ່ຄະນະນໍາ,ພະນັກງານແຜນການການເງິນຂອງຫ້ອງການສຶກສາ ແລະກີລາເມືອງໃນ 4 ແຂວງ, ໂດຍການເປັນປະທານຂອງທ່ານ ພົມມາ ພົມມະຈັນ ຮອງຫົວໜ້າກົມການເງິນກະຊວງສຶກສາທິການ ແລະກີລາ, ທ່ານ ບົວໄຂ ສຸພາອອນ ຫົວໜ້າພະແນກສຶກສາທິການ ແລະກີລາແຂວງຈໍາປາສັກ,ມີນັກສໍາມະນາກອນ,ຫົວໜ້າ, ຮອງຫົວໜ້າຫ້ອງການສຶກສາທິການ ແລະ ກີລາເມືອງ, ຫົວໜ້າໜ່ວຍງານສະຖິຕິ-ແຜນການ, ຫົວໜ້າໜ່ວຍງານບໍລິຫານ ແລະວິຊາການການເງິນຂອງຫ້ອງການສຶກສາທິການ ແລະກີລາເມືອງທີ່ຂຶ້ນກັບ 4 ແຂວງພາກໃຕ້ເຂົ້າຮ່ວມ.

 ຈຸດປະສົງຂອງກອງປະຊຸມຄັ້ງນີ້ແມ່ນເພື່ອສ້າງຄວາມເຂັ້ມແຂງວຽກງານການເງິນເຊັ່ນ: ກວດກາເອກກະສານຂໍເບີກຈ່າຍ ແລະສະຫຼຸບລາຍງານການເງິນການຄຸ້ມຄອງຊັບສິນຂອງລັດ ແລະການປະມູນຈັດຫ-ຊື້ຈ່າຍດ້ວຍທຶນຂອງລັດ, ການຂຶ້ນແຜນງົບປະມານ, ວຽດງານອອກແບບກໍ່ສ້າງ-ສ້ອມແປງ,ການຄຸ້ມຄອງວຽກງານບັນຊີ-ການເງິນສໍາລັບຂັ້ນແຂວງ ແລະຂັ້ນເມືອງ, ການຈັດສັນງົບປະມານພາກ 62 ແລະພາກ 63 ໃຫ້ຫ້ອງການສຶກສາທິການແລະກີລາເມືອງ, ການນໍາໃຊ້ລະບົບໂປຣແກຣມຄຸ້ມ ຄອງເງິນບໍລິຫານປົກຄະຕິຂອງສະຖາບັນການສຶກສາພາກລັດໃຫ້ຄະນະນໍາ, ພະນັກງານສະຖິຕິແຜນການ ແລະການເງິນຂອງຫ້ອງການສຶກສາທິການ ແລະກີລາທີ່ຂຶ້ນກັບ 4 ແຂວງພາກໃຕ້ຄື: ຈໍາປາສັກ: ເຊກອງ, ສາລະວັນ ແລະ ແຂວງອັດຕະປື.

  ພ້ອມດຽວກັນນີ້ກໍ່ໄດ້ສ້າງຄວາມເຂົ້າໃຈກ່ຽວກັບການຄຸ້ມຄອງ ແລະນໍາໃຊ້ເງິນບໍລິຫານປົກກະຕິຂອງສະຖາບັນການສຶກສາ, ການຂຶ້ນແຜນ ແລະການສະໜອງເງິນບໍລິ ຫານເພື່ອສະໜັບສະໜູນວຽກງານການຄຸ້ມຄອງບໍລິຫານທີ່ເນັ້ນໂຮງຮຽນເປັນຫຼັກ, ຄຸ້ມຄອງ ແລະນໍາໃຊ້ເງິນອາຫານທ່ຽງໃນໂຮງຮຽນພານໃນ 4 ແຂວງຕື່ມອີກ.

• 21/08/2020