ສະຖາບັນທຸລະກິດແສງສະຫວັນ ສະຫຼອງຄົບຮອບ 22 ປີ

   ວັນທີ 18 ສິງຫາຜ່ານມາ ສະຖາບັນທຸລະກິດແສງສະຫວັນສະຫຼອງຄົບຮອບ 22 ປີ ພ້ອມທັງເປີດວິທະຍາສາດແຫ່ງໃໝ່ຢູ່ຫຼັກ 21 ແລະເປີດສະໜາມກີລາຫຍ້າທຽມໂດຍໃຫ້ກຽດເຂົ້າຮ່ວມທ່ານ ອາລຸນໄຊ ສູນນະລາດ ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ທ່ານ ພຸດສິມ ມາລາວົງ,ຮອງລັດຖະມົນຕີກະຊວງສຶກສາທິການ ແລະກີລາ,ບັນດາທ່ານອະດີດລັດຖະມົນຕີ, ຮອງລັດຖະມົນຕີ, ທ່ານຫົວໜ້າກົມ, ຫົວໜ້າຫ້ອງການກະຊວງສຶກສາທິການ ແລະກີລາ, ຫົວໜ້າພະແນກການ ແລະກະຊວງອ້ອມຂ້າງ,ບັນດາເອກອັກຄະລາສະທູດ,ບັນດາທ່ານຈາກອົງການທາງພັກ-ລັດ ແລະເອກະຊົນ,ທ່ານຍິງ-ທ່ານ ຊາຍທີ່ນັບຖື ແລະຮັກແພງ.

   ທ່ານ ຄຳແສນ ສີສະວົງ ປະທານກຸ່ມການສຶກສາແສງສະຫວັນ ກ່າວຜ່ານບົດສະຫຼຸບໃຫ້ຮູ້ວ່າກຸ່ມການສຶກສາແສງສະຫວັນໄດ້ສ້າງຕັ້ງຂຶ້ນໃນວັນທີ 18 ສິງຫາ1998 ໂດຍໄດ້ຮັບອະນຸຍາດຈາກກະຊວງສຶກສາທິການ ແລະກີລາໃຫ້ສ້າງຕັ້ງເປັນສູນພາສາຕ່າງປະເທດ, ຮອດປີ 2000 ກໍ່ໄດ້ພັດທະນາຍົກຖານະເປັນວິທະຍາໄລບໍລິຫານທຸ ລະກິດແສງສະຫວັນ (ໄດ້ສິດສອນລະດັບຊັ້ນສູງ,ປະລິນຍາຕີ, ປະລິນຍາໂທສອນຫຼັກສູດບໍລິຫານທຸລະກິດ ແລະຫຼັກສູດພາສາອັງກິດ), ພ້ອມດຽວກັນນັ້ນໃນປີ 2003 ກຸ່ມການສຶກສາແສງສະຫວັນກໍ່ໄດ້ສ້າງຕັ້ງໂຮງຮຽນສາມັນສຶກສາຕັ້ງແຕ່ຊັ້ນອະນຸບານຈົນເຖິງມັດທະຍົມຕອນປາຍອີກລວມມີ 5 ແຫ່ງຄື:ປະຖົມ-ມັດທະຍົມສົມບູນສອງພາສາແສງສະຫວັນ 1, 2, 3, 4 ແລະໂຮງຮຽນນານາຊາດອົດສະຕາລີ (Australian International School)ທີ່ຕັ້ງຢູ່ 5 ຕົວເມືອງໃນນະຄອນຫຼວງວຽງ ຈັນ, ແຕ່ລະແຫ່ງກໍ່ໄດ້ມີການເຕີບໃຫຍ່ຂະຫຍາຍຕົວທັງປະລິມານ ແລະ ຄຸນນະພາບມັນສະແດງອອກເຖິງຈໍານວນນັກຮຽນມີການເພີ່ມຂຶ້ນແຕ່ລະປີລວມທັງນັກຮຽນ-ນັກສຶກສາທີ່ຮຽນຢູ່ໃນກຸ່ມຂອງແສງສະຫວັນມີ 4.250 ຄົນທີ່ຮຽນຢູ່, ມີຄູ-ອາຈານ, ພະນັກງານທັງໝົດ 207 ຄົນ, ລະດັບປະລິນຍາເອກ 9 ທ່ານ, ປະລິນຍາໂທ 60 ທ່ານ, ປະລິນຍາຕີ 100 ທ່ານ, ຊັ້ນສູງວິຊາຊີບ 35 ທ່ານແມ່ນພະນັກງານບໍລິຫານ, ມີສະຖານທີ່ຕັ້ງຢູ່ 6 ແຫ່ງ, ມີພື້ນຖານໂຄງລ່າງ ແລະອຸປະກອນຮັບໃຊ້ ການຮຽນ-ການສອນຕາມ 5 ຫຼັກມູນຢ່າງຄົບຖ້ວນເຊັ່ນວ່າ: ແຕ່ລະບ່ອນມີອາຄານຫ້ອງຮຽນແໜ້ນໜາຖາວອນ, ມີເດີ່ນກີລາບານເຕະ, ບານສົ່ງ, ບານບ້ວງ, ຫ້ອງທົດລອງ, ຫໍສະໝຸດຢ່າງຄົບຖ້ວນ.

 ຜ່ານໄລຍະເກືອບ 22 ປີຜ່ານມາ, ກຸ່ມການສຶກສາແສງສະຫວັນເວົ້າລວມ, ເວົ້າສະເພາະກໍ່ແມ່ນວິທະຍາໄລບໍລິຫານທຸລະກິດແສງສະຫວັນໃນເມື່ອກ່ອນ,ປະຈຸບັນແມ່ນສະຖາບັນທຸລະກິດແສງສະຫວັນກໍ່ໄດ້ມີຜົນສໍາເລັດຫຼາຍດ້ານ ທີ່ສໍາຄັນເຊັ່ນວ່າ: ໄດ້ສ້າງນັກຮຽນ-ນັກສຶກສາຈົບແຕ່ລະດັບ, ແຕ່ລະປີໄດ້ຢ່າງຫຼວງຫຼາຍ ແລະແຕ່ລະຄົນທີ່ຈົບກໍ່ໄດ້ມີວຽກເຮັດງານທໍາ, ມີໜ້າທີ່ຕໍາແໜ່ງທີ່ສູງຢູ່ໃນອົງການພັກ-ລັດ, ເອກະຊົນ ແລະຫຼາຍທ່ານ ກໍ່ໄດ້ສືບຕໍ່ສຶກສາຮໍ່າ ຮຽນໃນລະດັບປະລິນຍາຕີ, ໂທ, ເອກກັບມະຫາວິທະຍາໄລຕ່າງປະເທດ, ນອກຈາກນັ້ນສະຖາບັນທຸລະກິດແສງສະຫວັນກໍ່ຍັງໄດ້ສຸມໃສ່ພັດທະນາໂຄງການຫຼັກສູດສົ່ງເສີມການຄົ້ນຄວ້າວິໄຈຫຼາຍຫົວຂໍ້ທີ່ສາມາດເອົາໄປນໍາໃຊ້ເຂົ້າໃນວຽກງານການພັດທະນາເສດຖະກິດ-ສັງຄົມ, ຈົນມາຮອດມື້ນີ້ສະຖາບັນທຸລະກິດແສງສະຫວັນ ຈຶ່ງໄດ້ຂະຫຍາຍວິທະຍາເຂດແຫ່ງໃໝ່ຂອງຕົນຂຶ້ນຢູ່ທີ່ຫຼັກ 21 ນີ້ ແລະກໍ່ມີຄວາມພ້ອມທີ່ຈະສິດສອນລະດັບປະລິນຍາຕີໃນ 5 ສາຂາວິຊາຄື: ປະລິນຍາຕີສາຂາບໍລິຫານທຸລະກິດ, ຜູ້ປະກອບການ, ພາສາອັງກິດ, ວິສະວະກໍາຊອບແວ ແລະປະລິນຍາຕີສາຂາການຄ້າອີເລັກໂຕນິກ (ຄອມພິວເຕີທຸລະກິດ), (ສາຂາວິສະວະກໍາຊອບແວ ແລະ ສາຂາການຄ້າອີເລັກໂຕນິກແມ່ນຫຼັກສູດຮ່ວມມືກັບ FPT) ພ້ອມດຽວກັນນັ້ນ, ສະຖາບັນຂອງພວກເຮົາກໍ່ກໍາລັງກະກຽມຍື່ນຂໍອະນຸຍາດເປີດສອນປະລິນຍາໂທໃນສາຂາ MBA ສາກົນຮ່ວມມືກັບມະຫາວິທະຍາໄລຕ່າງປະເທດ.

 

แชร์