ການສອບເສັງຈົບຊັ້ນ ປ5, ມ4 ແລະມ7 ທົ່ວແຂວງຈຳປາສັກ ໄດ້ລື່ນຄາດໝາຍ

  ເມື່ອອາທິດຜ່ານມາກອງປະຊຸມຜູ້ບໍລິຫານການສຶກສາທິການ ແລະກີລາທົ່ວແຂວງຈຳປາສັກ ປະຈຳເດືອນສິງຫາ 2020 ໂດຍຈັດຂຶ້ນທີ່ຫ້ອງການສຶກສາທິການ ແລະກີລາເມືອງບາຈຽງຈະເລີນສຸກໃຫ້ກຽດເຂົ້າຮ່ວມກ່າວເປີດຂອງທ່ານ ຄຳກິ່ງແກ້ວ ປັດທຳມະວົງ ຮອງເຈົ້າເມືອງບາຈຽງຈະເລີນສຸກ, ທ່ານ ບົວໄຂ ສຸພາອອນ ຫົວໜ້າພະ ແນກສຶກສາທິການ ແລະກີລາແຂວງຈຳປາສັກ,ວິທະຍາໄລເຕັກນິກວິຊາຊີບແຂວງ,ຫົວໜ້າຫ້ອງການສຶກສາ-ກີລາ 9 ຕົວເມືອງ 1 ນະຄອນ, ຜູ້ອຳນວຍການໂຮງຮຽນ, ຫົວໜ້າ ແລະຮອງຂະແໜງພະນັກງານວິຊາການເຂົ້າຮ່ວມ.

  ແຂວງຈຳປາສັກ ສຳເລັດການສອບເສັງຈົບຊັ້ນ ປ5, ມ4 ແລະ ມ7 ໃນສົກ 2019-2020 ໃນນີ້ໄດ້ຕັ້ງເປົ້າການສອບເສັງຈົບຊັ້ນໃຫ້ໄດ້ 98% ພາຍຫຼັງການສອບ ເສັງຈົບຊັ້ນສຳເລັດຜົນອອກມາ ເຫັນວ່າແຕ່ຊັ້ນຮຽນມີອັນພົ້ນເດັ່ນສາມາດສອບເສັງໄດ້ເກືອບ 100% ໃນນີ້ຊັ້ນ ປ5 ມີໜ້າສອບຕົວຈິງ 13.277 ຄົນ, ຍິງ 6.676 ຄົນ, ສອບໄດ້ 13.266 ຄົນ ຍິງ 6.673 ຄົນເທົ່າກັບ 92,92%, ຊັ້ນ ມ4 ມີໜ້າສອບຕົວຈິງ 6.828 ຄົນ,ຍິງ 3.515 ຄົນ,ສອບໄດ້ 6.825 ຄົນຍິງ 3515 ຄົນ ເທົ່າກັບ 99,96%, ແຂວງຈຳປາສັກສາມາດຍາດໄດ້ລື່ນຄາດໝາຍທີ່ຕັ້ງໄວ້ 98% ເປັນ 99,92%.

ການສອບເສັງຈົບຊັ້ນ ມ7 ນັກຮຽນມີໜ້າສອບເສັງຕົວຈິງທັງໝົດ 5.645 ຄົນ, ຍິງ 2.672 ຄົນ, ສອບໄດ້ 5.635 ຄົນ ຍິງ 2.672 ຄົນ, ເທົ່າກັບ 99,82%, ນອກຈາກນີ້ກໍສຳເລັດການສອບເສັງຈົບຊັ້ນ ມ4 ບຳລຸງ 5 ເມືອງ (ນະຄອນປາກເຊ, ຊະນະສົມບູນ, ໂພນທອງ, ສຸຂຸມາ ແລະເມືອງມຸນລະປາໂມກ)ມີນັກສອບ 231 ຄົນ ຍິງ 124 ຄົນ ສອບໄດ້ 100%, ສອບເສັງຈົບຊັ້ນ ມ7 ບຳລຸງມີນັກສອບທັງໝົດ 53 ຄົນ ຍິງ 13 ຄົນມີໜ້າ ສອບ 45 ຄົນ ຍິງ 11 ຄົນສອບໄດ້ 100%.

  ສຳເລັດກອງປະຊຸມສ້າງຄວາມເຂັ້ມແຂງວຽກງານການສຶກສາກ່ອນໄວຮຽນໃຫ້ໜ່ວຍງານການສຶກສາກ່ອນໄວຮຽນຂັ້ນເມືອງທົ່ວແຂວງຈຳນວນ 33 ຄົນ ຍິງ 31 ຄົນ, ອົບຮົມຄູປະຈຳການ ປ2 ຕາມຫຼັກສູດໃໝ່ຢູ່ 6 ເມືອງມີຈຳນວນພົນເຂົ້າຮ່ວມ 604 ຄົນ ຍິງ 403 ຄົນ, ປັບປຸງຄະນະສະຫະພັນກີລາ 2 ປະເພດ (ດອກປີກໄກ່ ແລະບານສົ່ງ) ສ້າງຂະບວນການຕ້ອນຮັບກອງປະຊຸມໃຫຍ່ຂອງພັກ ແລະສະເຫຼີມສະຫຼອງວັນສ້າງຕັ້ງກີລາກາຍະກຳແຫ່ງຊາດລາວຄົບຮອບ 54 ປີ ສ້າງຄວາມເຂັ້ມແຂງໃຫ້ແກ່ຄູສອນຊັ້ນມັດທະຍົມສຶກສາການແນະນຳທັກສະການສອນໃຫ້ ແກ່ຄູສອນພະລະ 4 ເມືອງ, ຊຸກຍູ້ ການຮຽນ-ການສອນ ແລະການສອບເສັງນັກຮຽນປີສຸດທ້າຍຂອງສູນຝຶກອົບຮົມວິຊາຊີບການສຶກສາພາກເອກະຊົນ 12 ແຫ່ງ, ຈັດການແຂ່ງຂັນກີລາປະເພດຕ່າງໆເພື່ອຊີງຂັນທ່ານເຈົ້າແຂວງ, ຕິດຕັ້ງ ແລະ ຂະຫຍາຍສັນຍານອິນເຕີເນັດຢູ່ສຳນັກງານຫ້ອງການພະແນກສຶກສາ-ກີລາແຂວງ ແລະວຽກ ງານດ້ານອື່ນໆກໍປະຕິບັດຢ່າງມີຜົນສຳເລັດ.

 

แชร์