ເຈົ້າເມືອງນອງ ລົງຊຸກຍູ້ວຽກງານການພັດທະນາ ຢູ່ບ້ານອາລ໋ອງ

   ເມື່ອອາທິດຜ່ານມານີ້ ທ່ານ ລຳແກ້ວ ແສງໜູທອງ ເລຂາພັກເມືອງ ເຈົ້າເມືອງ-ເມືອງນອງ, ທ່ານ ສຸກສາຄອນ ໂພທິລາດ ຮອງເລຂາພັກເມືອງ ແລະ ພາກສ່ວນຫ້ອງການທີ່ກ່ຽວຂ້ອງໄດ້ລົງຊຸກຍູ້ວຽກງານການພັດທະນາເສດຖະກິດ-ສັງຄົມຢູ່ບ້ານອາລ໋ອງເມືອງນອງ ແຂວງສະຫວັນນະເຂດ ໂດຍມີອຳນາດການປົກຄອງ, ເຖົ້າແກ່ແນວໂຮມບ້ານ, ການຈັດຕັ້ງ, ພໍ່ແມ່ປະຊາຊົນພາຍໃນບ້ານເຂົ້າຮ່ວມຢ່າງພ້ອມພຽງ.

   ໂອກາດນີ້ ທ່ານ ກາຍອນ ນາຍບ້ານອາລ໋ອງ ກໍ່ໄດ້ລາຍງານສະພາບການພາຍໃນບ້ານໃຫ້ທາງຄະນະໄດ້ຮັບຊາບຊຶ່ງບ້ານອາລ໋ອງປະກອບມີ 135 ຄອບຄົວ, ມີພົນ ລະເມືອງທັງໝົດ 623ຄົນ, ຊົນເຜົ່າບຣູ, ມັງກອງ, ນັບຖືຜີ, ຢຶດຖືອາຊີບການເຮັດໄຮ່ປະສົມປະສານປູກພືດຊະນິດຕ່າງໆ ໃນເນື້ອທີ່ 92 ເຮັກຕາ, ນາ 10 ເຮັກຕາ ນອກນັ້ນກໍ່ໄດ້ລ້ຽງສັດປະເພດຕ່າງໆຕື່ມອີກ. ບ້ານອາລ໋ອງຕັ້ງຫ່າງຈາກເທສະບານເມືອງນອງປະມານ 4 ກິໂລແມັດ, ຕັ້ງຢູ່ຟາກເຊລະນອງການໄປມາຫາສູ່ແລກປ່ຽນສິນຄ້າຍັງບໍ່ທັນໄດ້ສະດວກສະບາຍເທົ່າທີ່ຄວນເນື່ອງຈາກວ່າຍັງບໍ່ທັນໄດ້ມີຂົວຂ້າມທີ່ຖາວອນເປັນຂົວທີ່ສ້າງຂຶ້ນຈາກພູມປັນຍາຂອງຊາວບ້ານແຕ່ພໍໝົດຊ່ວງລະດູຝົນຂົວ

ດັ່ງກ່າວກໍ່ຈະຖືກນໍ້າພັດເຊາະໄປຊຶ່ງໃນທຸກໆປີພໍ່ແມ່ປະຊາຊົນກໍ່ໄດ້ພ້ອມພາກັນສາມັກຄີກັນສ້າງຂົວໄມ້ຂ້າມເຊລະນອງມີຄວາມຍາວທັງໝົດ 280 ແມັດ, ກວ້າງ 2,50 ແມັດ ພໍຮອດລະດູຝົນປະຊາຊົນໄດ້ຫັນມາໃຊ້ບັກ, ເຮືອ, ແພຂ້າມແທນ, ໃນການພັດທະນາ ຫຼືການດຳລົງຊີວິດການຜະລິດຍັງມີລັກສະນະດັ້ງເດີມຊຶ່ງບ້ານດັ່ງກ່າວກໍ່ມີທ່າແຮງຫຼາຍດ້ານຢູ່ຕາມແຄມສາຍເຊລະນອງເປັນຕົ້ນແມ່ນສະຖານທີ່ທ່ອງທ່ຽວທາງທຳມະຊາດທີ່ສວຍງາມນັ້ນກໍ່ແມ່ນແກ້ງຫຼວງ-ແກ້ງອາລ໋ອງຊຶ່ງໃນແຕ່ລະປີກໍ່ມີແຂກ ພາຍໃນ, ເມືອງໃກ້ຄຽງມາທ່ຽວຫຼິ້ນ ແລະຊົມທຳມະຊາດ, ຂົວຂ້າມໄມ້ໄຜ່ທີ່ເຮັດດ້ວຍພູມປັນຍາຊາວບ້ານແຕ່ຊາວບ້ານບໍ່ທັນໄດ້ມີກິດຈະກຳທີ່ສະໜອງ ຫຼື ການບໍລິການ ໃຫ້ແກ່ແຂກເພື່ອສ້າງລາຍຮັບເຂົ້າບ້ານ.

  ໂອກາດນີ້ທ່ານເຈົ້າເມືອງນອງໄດ້ໂອ້ລົມ ແລະໃຫ້ທິດຊີ້ນຳໃຫ້ແກ່ອຳນາດການປົກຄອງກໍ່ຄືພໍ່ແມ່ປະຊາຊົນໃຫ້ເຫັນໄດ້ກົນອຸບາຍຫັນປ່ຽນຂອງສັດຕູ,ເຮັດໜ້າທີ່ປ້ອງກັນຊາດ-ປ້ອງກັນຄວາມສະຫງົບໃຫ້ເຂັ້ມແຂງ, ສະກັດກັ້ນປະກົດການຫຍໍ້ທໍ້ທີ່ຈະເກີດຂຶ້ນໃຫ້ທັນການ, ມີຄວາມສາມັກຄີເອກະພາບກັນຢ່າງໜັກແໜ້ນ, ເອົາໃຈໃສ່ປູກພືດກະສິກຳເປັນສິນຄ້າຕາມທ່າແຮງທັງໄລຍະສັ້ນ ແລະຍາວໃຫ້ມີຫຼາກຫຼາຍ, ສົ່ງເສີມສີໄມ້ລາຍມືຫັດຖະກຳຕໍ່າຫູກທີ່ເປັນເອກະລັກຂອງເຜົ່າ, ຜະລິດຫຼາຍກາຍເປັນສິນຄ້າ ແລະ ລາຄາທີ່ເໝາະສົມ, ພ້ອມທັງສະໜອງໃຫ້ແກ່ແຂກທີ່ມາທ່ອງທ່ຽວເອົາໃຈໃສ່ຮັກສາຄວາມສະອາດ, ອະນາໄມ, ບຸກບືນສູ້ຊົນພັດທະນາຄອບຄົວກໍ່ຄືບ້ານໃຫ້ມີຊີວິດການເປັນຢູດີຂຶ້ນເພື່ອຫຼຸດພົ້ນຈາກຄວາມທຸກຍາກໄປເທື່ອລະກ້າວ.

แชร์