ວັນທີ 17 ສິງຫາ2020 ຄະນະສະເພາະກິດປ້ອງກັນ, ຄວບຄຸມ ແລະສະກັດກັ້ນພະຍາດໂຄວິດ-19 ຂັ້ນແຂວງຄຳມ່ວນໄດ້ຈັດກອງປະຊຸມປຶກສາຫາລືເພື່ອໃຫ້ເຂັ້ມງວດຂຶ້ນຕື່ມໃນການປະຕິບັດບັນດາແຈ້ງການ ແລະມາດຕະການປ້ອງກັນ, ຄວບຄຸມ ແລະ ສະກັດກັ້ນພະຍາດໂຄວິດ-19 ຢູ່ພາຍໃນແຂວງໂດຍການເປັນປະທານຂອງທ່ານ ບຸນມີ ພິມມະສອນ ຮອງເຈົ້າແຂວງຄຳມ່ວນ, ຫົວໜ້າຄະນະສະເພາະກິດປ້ອງກັນ, ຄວບຄຸມ ແລະ ສະກັດກັ້ນພະຍາດໂຄວິດ-19 ຂັ້ນ ແຂວງ, ມີບັນດາຄະນະກອງເລຂາ, ຄະນະສະເພາະກິດຂັ້ນເມືອງແລະພະແນກການທີ່ກ່ຽວຂ້ອງຂອງແຂວງເຂົ້າຮ່ວມ.

  ທ່ານ ດຣ ນາງ ພາສຸກ ຄຳມະນີທອງ ຮອງຫົວໜ້າພະແນກສາທາລະນະສຸກທັງເປັນຫົວໜ້າກອງເລຂາຄະນະສະກິດຂັ້ນແຂວງໄດ້ສະຫຼຸບການຈັດຕັ້ງປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນການແຜ່ລະບາດໂຄວິດ-19 ໃນທົ່ວແຂວງລະຫວ່າງວັນທີ 20 ມີນາ-15 ສິງຫາ 2020 ຜ່ານມາຊຶ່ງພາຍຫຼັງທີ່ໄດ້ຮັບບັນດາມະຕິ,

  ຄຳສັງຂອງສູນກາງພັກ, ລັດຖະບານ ແລະຄະນະສະເພາະກິດຂັ້ນສູນກາງກໍ່ໄດ້ຫັນເອົາບັນດາເອກະສານຕ່າງໆມາເປັນຂອງແຂວງພ້ອມທັງຜັນຂະຫຍາຍລົງສູ່ບັນດາພະແນກການ, ເມືອງ, ອົງການຈັດລັດ, ຫົວໜ່ວຍທຸລະກິດ, ພໍ່ຄ້າຊາວຂາຍຕະຫຼອດຮອດພໍ່ແມ່ປະຊາຊົນໃຫ້ຮັບຮູ້ ແລະເຂົ້າໃຈພ້ອມທັງໄດ້ໂຄສະນາຜ່ານສື່ຕ່າງໆຂອງແຂວງເພື່ອໃຫ້ພໍ່ແມ່ປະຊາຊົນໄດ້ຕິດຕາມການແຜ່ລະບາດ ແລະບັນດາມາດຕະການປ້ອງກັນທີ່ຄະນະສະເພາະກິດວາງອອກໃນແຕ່ລະໄລຍະ, ໄດ້ອອກແຈ້ງການປິດການເຂົ້າ-ອອກຢູ່ບັນດາດ່ານຊາຍແດນທ້ອງຖິ່ນ, ປະເພນີ ແລະ ດ່ານຜ່ອນຜົນຊົ່ວຄາວພາຍໃນແຂວງຈຳນວນ 4 ດ່ານ ແລະດ່ານສາກົນ 2 ດ່ານ, ປິດສະຖານທີ່ບັນເທີງ, ຮ້ານກິນດື່ມ, ຮ້ານຄາລາໂອເກະ ແລະ ຮ້ານເກມທີ່ເຫັນວ່າມີຄວາມສ່ຽງຕໍ່ການແຜ່ລະບາດ, ຊຶ່ງໃນເບື້ອງຕົ້ນທົ່ວແຂວງແມ່ນມີສູນກັກກັນບໍລິເວນທັງໝົດ 308 ສູນ ແລະສູນແຍກປ່ຽວ 11 ສູນ, ມາຮອດວັນທີ 3 ພຶດສະພາ ຈຳນວນສູນກັກກັນທັງໝົດແມ່ນໄດ້ປິດພ້ອມທັງໄດ້ຮັບການກວດກາ ແລະພົ່ນຢາຂ້າເຊື້ອໃນທຸກໆສູນ, ໃນປະຈຸບັນແຂວງຄຳມ່ວນແມ່ນໄດ້ກຳນົດສູນກັກກັນຈຳນວນ 2 ສູນຄື: ພະແນກ ຖວທ ຫຼັງເກົ່າ ແລະໂຮງແຮມພອນປະດິດ, ສ່ວນໃນຂັ້ນເມືອງແມ່ນມີເມືອງລະ 1 ສູນ, ສັງລວມແລ້ວໃນວັນ ທີ 20 ມີນາ-15 ສິງຫາ 2020 ມີຄົນເຂົ້າແຂວງຄຳມ່ວນທັງໝົດ 14.616 ຄົນ, ໃນນັ້ນມີແຮງງານລາວກັບມາແຕ່ໄທ 11.798 ຄົນ, ຊາວຫວຽດນາມ 55 ຄົນ, ນັກສຶກສາລາວ 54 ຄົນແລະມາແຕ່ແຂວງອື່ນໆຈຳນວນ 2.709 ຄົນ,ຊຶ່ງໃນນີ້ຈຳນວນກັກກັນບໍລິເວນທີ່ຍັງສືບຕໍ່ໃນທົ່ວແຂວງມີທັງໝົດ 741 ຄົນ.

  ໂອກາດດຽວກັນກອງປະຊຸມກໍ່ໄດ້ໆ ປຶກສາຫາລືເພື່ອເພີ່ມທະວີໃນການຈັດຕັ້ງປະຕິບັດບັນດາແຈ້ງການ ແລະມາດຕະການຕ່າງໆທີ່ລັດຖະບານກໍ່ຄືຄະນະສະເພາະກິດຂັ້ນສູນກາງວາງອອກໃຫ້ເຂັ້ມງວດຂຶ້ນກວ່າເກົ່າໂດຍສະເພາະແມ່ນການເຂັ້ມງວດໃນການຕິດຕາມ, ກວດກາຄົນເຂົ້າ-ອອກເມືອງລວມເຖິງການລັກລອບເຂົ້າ-ອອກທີ່ຜິດກົດໝາຍ, ຕິດຕາມ, ກວດກາບັນດາຮ້ານບັນເທີງ, ຮ້ານຄາຣາໂອເກະຢູ່ພາຍໃນແຂວງໃຫ້ເຂັ້ມງວດຂຶ້ນຕື່ມ, ເພີ່ມທະວີໃນການໂຄສະນາ, ປະຊາສຳພັນ ແລະ ເຜີຍແຜ່ໃຫ້ປະຊາຊົນໄດ້ຮັບຮູ້ເຖິງຄວາມອັນຕະລາຍ ແລະຄວາມສ່ຽງທີ່ຈະເກີດມີການລະບາດໂຄວິດ-19 ອີກຮອບໃໝ່ລວມເຖິງການເອົາໃຈໃສ່ເກັບກຳສະຖິຕິ ແລະ ອາຊີບຂອງແຮງງານລາວທີ່ກັບມາແລ້ວນັ້ນເພື່ອເປັນຂໍ້ມູນໃນການວາງແຜນຄຸ້ມຄອງ ແລະຈັດສັນອາຊີບຄືນໃໝ່ໃຫ້ແກ່ເຂົາເຈົ້າ.

แชร์