ເຊກອງ ຕ້ອງການທຶນ 4 ພັນຕື້ກວ່າກີບ ເພື່ອພັດທະນາ 5 ປີຕໍ່ໜ້າ

  ເພື່ອຮັບປະກັນໃຫ້ເສດຖະກິດຂະຫຍາຍຕົວໃນລະດັບ 7% ຕໍ່ປີ, ແຕ່ນີ້ຮອດ 2025 ແຂວງເຊກອງມີຄວາມຕ້ອງການການລົງທຶນເຂົ້າໃນການພັດທະນາທັງໝົດ 4 ພັນຕື້ກວ່າກີບ ໃນນີ້ຫຼາຍກວ່າໝູ່ແມ່ນການລົງທຶນຂອງພາກເອກະຊົນພາຍໃນແລະຕ່າງປະເທດກວມ 60%.

  ທ່ານ ເຫຼັກໄຫຼ ສີວິໄລ ເລຂາພັກແຂວງເຊກອງໃຫ້ຮູ້ວ່າ: ແຜນພັດທະນາເສດຖະກິດ-ສັງຄົມແຂວງເຊກອງ 5 ປີ (2021-2025) ເປົ້າໝາຍລວມແມ່ນການສືບຕໍ່ແກ້ໄຂຄວາມທຸກຍາກຂອງປະຊາຊົນໂດຍແຂວງເຊກອງຈະນໍາໃຊ້ທ່າແຮງບົ່ມຊ້ອນ ແລະຂໍ້ໄດ້ປຽບຕ່າງໆເປັນຕົ້ນແມ່ນການເຊື່ອມໂຍງກັບພາຍໃນ,ພາກພື້ນ ແລະສາກົນ, ຮອດປີ 2025 ສູ້ຊົນເຮັດໃຫ້ລາຍຮັບສະເລ່ຍໃສ່ຫົວຄົນໄດ້ 2.300 ໂດລາ ແລະເສດຖະກິດຂະຫຍາຍຕົວເພີ່ມຂຶ້ນ 7% ໃນນັ້ນກະສິກໍາປ່າໄມ້ເພີ່ມຂຶ້ນ 7%, ອຸດສາ ຫະກໍາ 9,8% ແລະການບໍລິການເພີ່ມຂຶ້ນ 5%, ສູ້ຊົນເກັບລາຍຮັບເຂົ້າງົບປະມານໃຫ້ໄດ້ 480,78 ຕື້ກີບ ແລະຄຸ້ມຄອງລາຍຈ່າຍໃຫ້ຢູ່ໃນລະບຽບທີ່ສະພາຮັບຮອງ.

  ເພື່ອຮັບປະກັນການຂະຫຍາຍຕົວຂອງເສດຖະກິດ, ໃນ 5 ປີແຂວງເຊກອງຈຶ່ງມີຄວາມຕ້ອງການໆລົງທຶນທັງໝົດ 4.630 ຕື້ກີບ ກວມເອົາ 40% ຂອງ GDP ຕໍ່ປີ (ສະເລ່ຍ 926 ຕື້ກີບ ຕໍ່ປີ) ໃນນັ້ນທຶນຈາກງົບປະມານຂອງລັດ 500 ຕື້ກີບ ກວມເອົາ10,8%, ທຶນຊ່ວຍເຫຼືອລ້າ-ກູ້ຢືມ 463 ຕື້ກີບ ກວມເອົາ 10,0%, ທຶນສິນເຊື່ອຂອງທະນາຄານ 889 ຕື້ກີບ ກວມເອົາ 19,2% ແລະການລົງທຶນຂອງເອກະຊົນພາຍໃນ ແລະຕ່າງປະເທດ 2.778 ຕື້ກີບ ກວມເອົາ 60% ຂອງການລົງ ທຶນທັງໝົດ.

  ທ່ານ ເຫຼັກໄຫຼ ສີວິໄລ ຍັງໃຫ້ຮູ້ຕື່ມອີກວ່າ: ໃນ 5 ປີຜ່ານມາແຂວງເຊກອງສາມາດລະດົມແຫຼ່ງທຶນເຂົ້າໃນການພັດທະນາໄດ້ທັງໝົດ 4,7 ພັນຕື້ກີບ ປະຕິບັດໄດ້ລື່ນແຜນການ 30% ໂດຍຜ່ານການລົງທຶນຄືດັ່ງກ່າວໄດ້ເຮັດໃຫ້ຫຼາຍຂົງເຂດວຽກງານໄດ້ມີການພັດທະນາດີຂຶ້ນໂດຍສະເພາະການພັດທະນາພື້ນຖານໂຄງລ່າງ, ການຜະ ລິດກະສິກຳເປັນສິນຄ້າ ແລະອື່ນໆ.

________

ຂ່າວ:  ສັນຍາ, ຮູບພາບ: #ຫນັງສືພິມເສດຖະກິດສັງຄົມ

แชร์