ໄຊຍະບູລີ ຮັບຮອງແຜນຈັດສັນທີ່ດິນ ແລະຄຸ້ມຄອງສິ່ງແວດລ້ອມ

   ວັນທີ 19 ສິງຫາຜ່ານມາທີ່ສະໂມສອນຫ້ອງວ່າການແຂວງໄຊຍະບູລີໄດ້ຈັດກອງປະຊຸມຮັບຮອງຄັ້ງສຸດທ້າຍຂອງແຜນຈັດສັນທີ່ດິນ, ຄຸ້ມຄອງຊັບພະຍາກອນທໍາມະຊາດ ແລະສິ່ງແວດລ້ອມຮອບດ້ານ ແລະ ການກໍານົດເຂດປະເມີນລາຄາ, ໂດຍການເປັນປະທານຂອງ ທ່ານ ຍັນຍົງ ສີປະເສີດ ຮອງເຈົ້າແຂວງໄຊຍະບູລີ, ເຂົ້າຮ່ວມມີຫົວໜ້າ-ຮອງຫົວໜ້າພະແນກການອ້ອມຂ້າງແຂວງ, ມີເຈົ້າເມືອງພ້ອມດ້ວຍຫົວໜ້າຫ້ອງການຊັບພະຍາກອນທໍາມະຊາດ ແລະສິ່ງແວດລ້ອມ 11 ເມືອງເຂົ້າຮ່ວມ.

   ທ່ານ ບຸນລັບ ແສງອາພອນ ຫົວໜ້າພະແນກຊັບພະຍາກອນທໍາມະຊາດ ແລະສິ່ງແວດລ້ອມແຂວງໄຊຍະບູລີໄດ້ກ່າວວ່າ: ກອງປະຊຸມຄັ້ງນີ້ໂດຍມີຈຸດປະສົງເພື່ອເປັນການຜັນຂະຫຍາຍມະຕິກອງປະຊຸມສະພາແຫ່ງຊາດວ່າດ້ວຍແຜນແມ່ບົດຈັດສັນທີ່ດິນແຫ່ງຊາດຮອດປີ 2030 ເຂົ້າສູ່ພາກປະຕິບັດຕົວຈິງ,ເພື່ອສ້າງແຜນຈັດສັນທີ່ດິນ ແລະຄຸ້ມຄອງສິ່ງແວດລ້ອມໃນທົ່ວແຂວງໄຊຍະບູລີໃຫ້ເຂົ້າສູ່ລະບົບ ແລະລະບຽບຫຼັກການ,ແນໃສ່ປົກປັກຮັກສາພື້ນທີ່ດິນປ່າໄມ້ໃຫ້ມີຄວາມອຸດົມສົມບູນດ້ານຊີວະນາໆພັນ, ແນໃສ່ເພື່ອແກ້ໄຂຄວາມທຸກຍາກຂອງປະຊາຊົນພາຍໃນແຂວງໃຫ້ເໝາະສົມກັບເງື່ອນໄຂຕົວຈິງ, ເພື່ອເຮັດໃຫ້ທີ່ດິນ ແລະ ສິ່ງແວດລ້ອມໄດ້ຮັບການຄຸ້ມຄອງ, ປົກປັກຮັກ ສາ ແລະພັດທະນາຢ່າງມີປະສິດທິຜົນ, ສາມາດນໍາຜົນປະໂຫຍດສູງສຸດໃຫ້ແກ່ປະເທດຊາດ ແລະປະຊາຊົນ.

   ກອງປະຊຸມຍັງໄດ້ພ້ອມກັນປະກອບຄໍາຄິດຄໍາເຫັນ ແລະຮັບຮອງເອົາບັນດາຫຼັກການ, ວິທີການສ້າງແຜນ, ມາດຕະການຈັດຕັ້ງປະຕິບັດ, ທີ່ຕັ້ງພູມສັນຖານ, ກໍານົດເຂດຖີ້ມຂີ້ເຫຍື້ອຂອງເມືອງ,ບ້ານ ແລະຄອບຄົວ,ສະຖານທີ່ປິ່ນປົວ,ສະຖານທີ່ສຶກສາ,ສໍານັກງານ-ອົງການ ແລະອື່ນໆ,ວິໄສທັດ-ຍຸດທະສາດຂອງການຈັດສັນທີ່ດິນ,ການຄຸ້ມຄອງຊັບພະຍາກອນທໍາມະຊາດ ແລະສິ່ງແວດລ້ອມຮອດປີ 2030, ແຜນຈັດສັນທີ່ດິນ, ຄຸ້ມຄອງຊັບພະຍາກອນທໍາມະຊາດ ແລະສິ່ງແວດລ້ອມແບບຮອບດ້ານເປັນແຕ່ລະໄລຍະ, ການແບ່ງເຂດທີ່ດິນອະນຸລັກຊັບພະຍາກອນທໍາມະຊາດ, ເຂດທີ່ດິນເພື່ອນໍາໃຊ້ ແລະພັດທະນາ, ແຜນຄຸ້ມຄອງສິ່ງແວດລ້ອມແບບຮອບດ້ານເພື່ອຕອບສະ ໜອງໃຫແກ່ການພັດທະນາເສດຖະກິດ-ສັງຄົມໃຫ້ມີຄວາມຍືນຍົງ.

__________

ຂ່າວ: ອຸ່ນເຮືອນ ໂພທິລັກ, 

ຮູບພາບ: ໜັງສືພິມເສດຖະກິດ-ສັງຄົມ

แชร์