2 ບ້ານ ຢູ່ເມືອງພູວົງໄດ້ຊົມໃຊ້ນໍ້າບາດານ

 ໃນວັນທີ 17 ສິງຫາ 2020 ນີ້ ເມືອງພູວົງ ແຂວງອັດຕະປື ໄດ້ຈັດພິທີເປີດການນໍາໃຊ້ນໍ້າບາດານໃຫ້ແກ່ປະຊາຊົນ ບ້ານວຽງໄຊ ແລະບ້ານນໍ້າກົງຂອງໂຄງການເຂື່ອນໄຟຟ້ານໍ້າກົງ 1 ໃຫ້ກຽດເຂົ້າຮ່ວມມີທ່ານ ອຸ່ນຫຼ້າ ໄຊຍະສິດ ຮອງເຈົ້າແຂວງອັດຕະປື, ມີການນໍາຂອງເມືອງອໍານາດການປົກຄອງບ້ານພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມ.

ໃ. ນພິທີໄດ້ຜ່ານບົດລາຍງານການຈັດຕັ້ງປະຕິບັດຂອງໂຄງການກໍ່ສ້າງນໍ້າບານດານຢູ່ບ້ານວຽງໄຊ ແລະ ບ້ານນໍ້າກົງ, ຊຶ່ງພາຍໃຕ້ການຊ່ວຍເຫຼືອດ້ານທຶນຮ້ອນຂອງໂຄງ ການກໍ່ສ້າງເຂື່ອນໄຟຟ້ານໍ້າກົງ 1, ຊຶ່ງໄດ້ເລີ່ມການກໍ່ສ້າງທັງໝົດ 45 ວັນ ແຕ່ວັນທີ 12 ມິຖຸນາ ຫາ 30 ກໍລະກົດ 2020 ຊຶ່ງໄດ້ເຈາະນໍ້າບາດານ 7 ບໍ່ເລິກ 40 ຫາ 70 ແມັດ,ເທເປຕົງເສີມເຫຼັກ, ຕິດຕັ້ງແທ້ງນໍ້າ 7 ຖັງ, ຕິດຕັ້ງໂປມນໍ້າ ແລະເອົາກົງເຕີໄຟລົງ 7 ຈຸດ ໃນນັ້ນບ້ານວຽງໄຊມີ 5 ຊຸດ ແລະບ້ານນໍ້າກົງ 2 ຊຸດ, ໂດຍແມ່ນບໍລິສັດບຸນວິໄລກໍ່ສ້າງເປັນຜູ້ຮັບເໝົາການກໍ່ສ້າງລວມມູນຄ່າທັງໝົດ 50 ພັນໂດລາສະຫາລັດ.

 ໂອກາດດັ່ງກ່າວທ່ານ ອຸ່ນຫຼ້າ ໄຊຍະສິດ ໄດ້ສະແດງຄວາມຂອບໃຈມາຍັງໂຄງການເຂື່ອນໄຟຟ້ານໍ້າກົງ 1 ທີ່ໄດ້ໃຫ້ການຊ່ວຍເຫຼືອປະຊາຊົນ 2 ບ້ານຂອງເມືອງພູວົງ ໃຫ້ໄດ້ຊົມໃຊ້ນໍ້າບາດາເປັນການສ້າງຄວາມສະດວກໃຫ້ປະຊາຊົນໃນການຊົມໃຊ້ນໍ້າເຂົ້າໃນການອຸປະໂພກ-ບໍລິໂພກ ກໍ່ຄືນໍາໃຊ້ເຂົ້າໃນການຜະລິດກະສິກໍາປູກຝັງ-ລ້ຽງສັດ, ທ່ານຍັງໄດ້ຮຽກຮ້ອງໃຫ້ອຳນາດການປົກຄອງບ້ານກໍ່ຄືປະຊາຊົນຈົ່ງພ້ອມກັນປົກປັກຮັກສາ ແລະນໍາໃຊ້ໃຫ້ເກີດປະໂຫຍດສູງສຸດ.

  ຈາກນັ້ນກໍ່ໄດ້ມີການມອບໃບຍ້ອງຍໍຂອງທ່ານເຈົ້າແຂວງຊຶ່ງເຈົ້າແຂວງຕົກລົງຍ້ອງຍໍບໍລິສັດນໍ້າກົງ 1 ຈຳກັດ ທີ່ມີຜົນງານໃນການປະກອບສ່ວນຊ່ວຍເຫຼືອສະຫນອງນໍ້າບາດານໃຫ້ແກ່ບ້ານວຽງໄຊ ແລະບ້ານນໍ້າກົງໃຫ້ກຽດມອບໂດຍທ່ານ ອຸ່ນຫຼ້າ ໄຊຍະສິດ ຮອງເຈົ້າແຂວງອັດຕະປືຮັບໂດຍທ່ານເຊິນຢູຊວນອຳນວຍການເຂື່ອນໄຟຟ້ານໍ້າກົງ 1 ໂດຍຊ່ອງໜ້າພາກສ່ວນກ່ຽວຂ້ອງເຂົ້າຮ່ວມ, ໂອກາດດັ່ງກ່າວພາກສ່ວນກ່ຽວຂ້ອງຍັງໄດ້ລົງຕົວຈິງເບິ່ງຜົນສຳເລັດການກໍ່ສ້າງນໍ້າບາດານ ແລະ ເຄື່ອນໄຫວຢ້ຽມຢາມເຂື່ອນໄຟຟ້ານໍ້າກົງ 1 ຕື່ມອີກ.

_________

ຂ່າວ: ສິດຕິພອນ, ຮູບພາບ: ໜັງສືພິມເສດຖະກິດ-ສັງຄົມ

แชร์