ຜູ້ວ່າການ ທຫລ ພົບປະຫາລືວຽກງານກັບເຈົ້າແຂວງໄຊສົມບູນ

  ໃນໂອກາດທີ່ທ່ານ ສອນໄຊ ສິດພະໄຊ ກໍາມະການສໍາຮອງສູນກາງພັກ, ເລຂາຄະນະພັກ-ຜູ້ວ່າການທະນາຄານແຫ່ງສປປ ລາວ (ທຫລ) ໄດ້ນໍາພາຄະນະເຄື່ອນໄຫວເຮັດວຽກຢູ່ແຂວງໄຊສົມບູນ ແລະ ໃນຕອນເຊົ້າຂອງໃນວັນທີ 14 ສິງຫາ 2020 ທ່ານຜູ້ວ່າການ ທຫລ ກໍ່ໄດ້ເຂົ້າພົບປະຫາລືວຽກງານກັບ ທ່ານ ພົນຕີ ຄຳລຽງ ອຸທະໄກສອນ ເລຂາຄະນະພັກແຂວງ, ເຈົ້າແຂວງໄຊສົມບູນທີ່ສໍານັກງານແຂວງດັ່ງກ່າວ.

  ໃນການພົບປະຫາລືວຽກງານໃນຄັ້ງນີ້, ທ່ານຜູ້ວ່າການ ທຫລ ໄດ້ແຈ້ງເຖິງຈຸດປະສົງໃນການມາເຮັດວຽກຂອງຄະນະທະນາຄານ ແລະຍັງໄດ້ແຈ້ງໃຫ້ທ່ານເຈົ້າແຂວງຮັບຊາບວຽກງານການເຄື່ອນໄຫວດ້ານການເງິນ-ເງິນຕາຂອງ ສປປ ລາວ ກໍ່ຄືພາຍໃຕ້ການຄຸ້ມຄອງດ້ານມະຫາພາກເງິນຕາຂອງ ທຫລ ໃນຜ່ານມາໂດຍສະເພາະການເຄື່ອນໄຫວວຽກງານຂອງທະນາຄານ ແລະສະຖາບັນການເງິນພາຍໃນເມືອງຕ່າງໆຂອງແຂວງໄຊສົມບູນຊຶ່ງມີທັງຂໍ້ສະດວກ, ຂໍ້ຫຍຸ້ງຍາກ ແລະສິ່ງທ້າທາຍໃນຫຼາຍດ້ານຊຶ່ງຜ່ານມາການນໍາຂອງແຂວງ, ຂອງເມືອງຕະຫຼອດຮອດປະຊາຊົນບັນດາເຜົ່າໄດ້ໃຫ້ການຊີ້ນໍາ, ຮ່ວມມື ແລະຊ່ວຍເຫຼືອບັນດາໜ່ວຍບໍລິການຂອງທະນາຄານຕ່າງໆທີ່ດໍາເນີນທຸລະກິດຢູ່ແຂວງໄຊສົມບູນໂດຍສະເພາະໜ່ວຍບໍລິການທະນາຄານນະໂຍບາຍໄຊສົມບູນທີ່ໄດ້ຮັບການຍົກລະດັບຂຶ້ນເປັນສາຂາ ແລະ ຜ່ານມາຍັງໄດ້ສະໜອງສິນເຊື່ອດອກເບ້ຍຕໍ່າຂອງຂອງລັດຖະບານໃຫ້ປະຊາຊົນບັນດາເຜົ່າ 89 ບ້ານ (ຍັງ 2 ບ້ານບໍ່ທັນເຂົ້າເຖິງ) ເຮັດໃຫ້ປະຊາຊົນບັນດາເຜົ່າໃນເຂດຊົນນະບົດຢູ່ກຸ່ມເປົ້າໝາຍ ມີທຶນທຳການຜະລິດ, ການບໍລິການສ້າງລາຍຮັບໃຫ້ຄອບຄົວເຮັດໃຫ້ຊີວິດການເປັນຢູ່ນັບມື້ດີຂຶ້ນເທື່ອລະກ້າວເປັນປະກອບສ່ວນອັນສຳຄັນໃນການແກ້ໄຂຄວາມທຸກຍາກຂອງປະຊາຊົນໃນແຂວງໄຊສົມບູນຊຶ່ງເຮັດໃຫ້ຈໍານວນເມືອງ, ບ້ານແລະຄອບຄົວທຸກຍາກຫຼຸດລົງເທື່ອລະກ້າວ, ນອກນີ້ກໍ່ໄດ້ມີການຈັດຕັ້ງກອງທຶນພັດທະນາໄຊສົມບູນຊຶ່ງສ້າງເງື່ອນໄຂໃຫ້ປະຊາຊົນເຂົ້າເຖິງແຫຼ່ງທຶນດີຂຶ້ນ.

  ຈາກນັ້ນ; ທ່ານເຈົ້າແຂວງໄຊສົມບູນໄດ້ຕີລາຄາສູງຕໍ່ບົດບາດໜ້າທີ່ ແລະການສະໜອງສິນເຊື່ອຂອງທະນາຄານໃຫ້ປະຊາຊົນໄດ້ຮັບແຫຼ່ງທຶນໃນການຜະລິດກະສິກໍາ ໂດຍສະເພາະໄດ້ນໍາໃຊ້ທຶນເຂົ້າໃນການປູກຝັງ ແລະ ລ້ຽງສັດໃນນີ້ປະຊາຊົນໄດ້ລ້ຽງງົວເປັນສິນຄ້າຊຶ່ງແຂວງໄຊສົມບູນເປັນແຂວງຕັ້ງໃໝ່, ເສດຖະກິດຍັງອ່ອນນ້ອຍ, ມີປະຊາຊົນທຸກຍາກ 4.397 ຄອບຄົວຊຶ່ງມີຄວາມຕ້ອງການແຫຼ່ງທຶນຈໍານວນຫຼາຍສົມຄວນ ແລະໃນຜ່ານມາຄະນະບໍລິຫານງານພັກແຂວງໄດ້ສຸມໃສ່ແກ້ໄຂບັນຫາຄວາມທຸກຍາກຂອງປະຊາຊົນເປັນສໍາຄັນ, ຄຸ້ມຄອງບັນດາໂຄງການລົງທຶນຂອງລັດໃຫ້ສໍາເລັດ, ພ້ອມນັ້ນໄດ້ສ້າງໂອກາດໃຫ້ບັນດານັກລົງທຶນເຂົ້າມາລົງທຶນຫຼາຍຂຶ້ນເປັນຕົ້ນການພັດທະນາກະສິກໍາ,ການທ່ອງທ່ຽວ,ບໍ່ແຮ່ ແລະອື່ນໆ ໂດຍສຸມໃສ່ການຈັດຕັ້ງຜັນຂະຫຍາຍມະຕິ 055/ກມສພ ແລະດໍາລັດ 414/ລບ ໃຫ້ບັນລຸຜົນຢ່າງບໍ່ຢຸດຢັ້ງ.

 ໃນໄລຍະດຽວກັນ, ທ່ານຜູ້ວ່າການ ທຫລ ໄດ້ໃຫ້ກຽດໂອ້ລົມບັນດາພະນັກງານໜ່ວຍບໍລິການທະນາຄານນະໂຍບາຍ,ທະນາຄານການຄ້າຕ່າງປະເທດລາວ ແລະໜ່ວຍບໍລິການທະນາຄານສົ່ງເສີມກະສິກໍາໂດຍເນັ້ນໃຫ້ເອົາໃຈໃສ່ປ່ອຍສິນເຊື່ອເຂົ້າຖືກເປົ້າໝາຍ, ສິນເຊື່ອມີຄຸນນະພາບ ແລະພ້ອມນັ້ນກໍ່ໃຫ້ເອົາໃຈໃສ່ປະສານສົມທົບ, ຮ່ວມມືກັບອໍານາດການປົກຄອງທ້ອງຖິ່ນ ແລະປະຊາຊົນບັນດາເຜົ່າຢ່າງທົ່ວເຖິງ, ຕ້ອງຫັນລົງຮາກຖານຢ່າງລຽນຕິດ, ເອົາໃຈໃສ່ແກ້ໄຂຈຸດອ່ອນ ແລະຂໍ້ຄົງຄ້າງໃຫ້ຫຼຸດໜ້ອຍ ລົງ, ໃນໂອກາດນີ້ທ່ານຜູ້ວ່າການ ທຫລ ຍັງໄດ້ລົງໃກ້ສິດຕິດແທດກັບປະຊາຊົນຊຶ່ງໄດ້ລົງເຄື່ອນໄຫວຕິດຕາມການຊື້-ຂາຍສິນຄ້າຢູ່ຕະຫຼາດໃຫຍ່ຂອງເມືອງອານຸວົງ ຊຶ່ງທ່ານໄດ້ຊັກຖາມບັນຫາຕ່າງໆ ທີ່ຕິດພັນກັບການຄ້າຂາຍໂດຍສະເພາະແມ່ນຜະລິດຕະພັນກະສິກໍາທີ່ປອດສານພິດແລະສັດລ້ຽງທີ່ປະຊາຊົນລ້ຽງເອງ.

____________

ຂ່າວ: ຣັດສະໝີ ດວງສັດຈະ

ຮູບພາບ: ໜັງສືພິມເສດຖະກິດ-ສັງຄົມ

แชร์