ວິທະຍຸກະຈາຍສຽງແຫ່ງຊາດລາວສະຫຼອງຄົບຮອບ 60 ປີ

   ພິທີສະເຫຼີມສະຫຼອງວັນສ້າງຕັ້ງວິທະຍຸກະຈາຍສຽງແຫ່ງຊາດລາວ (ວສລ) ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວຄົບຮອບ 60 ປີ (13 ສິງຫາ 960-13 ສິງຫາ 2020) ຈັດຂຶ້ນໃນວັນທີ 19 ສິງຫາ 2020 ເຂົ້າຮ່ວມຂອງທ່ານ ກິແກ້ວ ໄຂຄໍາພິທູນ ລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວ,ທ່ານ ໂພສີ ແກ້ວມະນີວົງ ຜູ້ອຳນວຍການໃຫຍ່ວິທະຍຸກະຈາຍສຽງແຫ່ງຊາດລາວ,ບັນດາຮອງລັດຖະມົນຕີ,ຫົວໜ້າກົມ-ຮອງກົມພາຍໃນກະຊວງເຂົ້າຮ່ວມ.

  ທ່ານ ໂພສີ ແກ້ວມະນີວົງ ໄດ້ເລົ່າຄືນມູນເຊື້ອການກໍາເນີດ ແລະເຕີບໃຫຍ່ຂະຫຍາຍຕົວຂອງ ວສລ ຕະຫຼອດໄລຍະ 60 ປີຜ່ານມາໂດຍທ່ານໄດ້ຍົກໃຫ້ເຫັນວ່າ: ວສລ ໄດ້ຮັບການສ້າງຕັ້ງຂຶ້ນໃນວັນທີ 13 ສິງຫາ 1960 ທີ່ເມືອງວຽງໄຊ ແຂວງຫົວພັນ, ເມື່ອກ່ອນເອີ້ນວ່າວິທະຍຸກະຈາຍສຽງຝ່າຍປະເທດລາວໄດ້ກາຍເປັນກະບອກສຽງອັນແຫຼມຄົມ ແລະມີປະສິດທິພາບສູງຂອງສູນກາງພັກກໍຄືແນວລາວອິດສະລະ ຫຼືແນວລາວສ້າງຊາດໃນປະຈຸບັນໂດຍໄດ້ເຮັດໜ້າທີ່ຂົນຂວາຍປຸກລະດົມປະຊາຊົນລາວບັນ ດາເຜົ່າເຂົ້າຮ່ວມການປະຕິວັດຕ້ານການຮຸກຮານຂອງພວກລ່າເມືອງຂຶ້ນແບບໃໝ່ ແລະລູກແຫຼ່ງຕີນມືຂອງພວກເຂົາຢ່າງພິລະອາດຫານ, ໄດ້ກະຈາຍຂ່າວໄຊຊະນະໃນບັ້ນຮົບຕ່າງໆ, ບົດວິຈານ, ບົດຄວາມ, ປຸກລະດົມຈິດໃຈຮັກຊາດຄຽດແຄ້ນ ແລະຕໍ່ສູ້ກັບສັດຕູ, ລວມເຖິງຂ່າວການພັດທະນາເຂດປົດປ່ອຍໄປເຖິງປະຊາຊົນໄດ້ຢ່າງກວ້າງ ຂວາງທັງຢູ່ເຂດປົດປ່ອຍ ແລະເຂດຂອງຝ່າຍສັດຕູອັນໄດ້ປະກອບສ່ວນຢ່າງໃຫຍ່ຫຼວງໃນພາລະກິດປົດປ່ອຍປະເທດຊາດຈົນໄດ້ຮັບຜົນສຳເລັດຢ່າງສະຫງ່າຜ່າເຜີຍໃນວັນ ທີ 2 ທັນວາ ປີ 1975 ພາຍຫຼັງປະເທດຊາດໄດ້ຮັບການປົດປ່ອຍວິທະຍຸກະຈາຍສຽງຝ່າຍປະເທດລາວໄດ້ຍົກຍ້າຍສໍານັກງານມາຢູ່ວຽງຈັນ ແລະ ປ່ຽນຊື່ມາເປັນວິທະຍຸກະຈາຍສຽງແຫ່ງຊາດລາວຈົນເຖິງປະຈຸບັນຍັງເປັນສື່ທີ່ນຳໜ້າໃນການເຮັດໜ້າທີ່ໂຄສະນາເຜີຍແຜ່ແນວທາງຂອງພັກ, ການປົກປັກຮັກສາ ແລະ ພັດທະນາປະເທດຊາດຂອງປວງຊົນລາວດ້ວຍການລາຍງານຂ່າວທີ່ມີທັງພາສາລາວ ແລະພາສາຊົນເຜົ່າຄື: ພາສາມົ້ງ ແລະພາສາກຶມມຸນອກນີ້, ຍັງມີພາສາຕ່າງປະເທດຄື: ຫວຽດນາມ, ກຳປູເຈຍ, ໄທ, ຝຣັ່ງ, ອັງກິດ, ພາສາຈີນ ແລະອື່ນໆ.

  ໂອກາດນີ້ທ່ານ ກິແກ້ວ ໄຂຄໍາພິທູນ ໄດ້ໃຫ້ກຽດໂອ້ລົມສະແດງຄວາມຍ້ອງຍໍສັນລະເສີນນັກຂ່າວ-ໂຄສົກ, ນັກຈັດລາຍການ, ນາຍຊ່າງເຕັກນິກ ແລະພະນັກງານເຮັດວຽກຈັດຕັ້ງບໍລິຫານທຸກຄົນທີ່ໄດ້ຜ່ານຜ່າທຸກຄວາມຫຍຸ້ງຍາກສຸມທຸກເຫື່ອແຮງມັນສະໝອງເພື່ອຜະລິດຂ່າວ-ບົດ ແລະລາຍການທີ່ມີຄຸນນະພາບນັບມື້ນັບສູງພ້ອມໄດ້ເນັ້ນໜັກໃຫ້ ວສລ ສືບຕໍ່ປັບປຸງຫຼາຍວຽກງານໃຫ້ດີຂຶ້ນເປັນຕົ້ນການເອົາໃຈໃສ່ບຳລຸງຍົກລະດັບທິດສະດີການເມືອງ, ແນວທາງນະໂຍບາຍຂອງພັກແຜນພັດທະນາເສດ ຖະກິດ-ສັງຄົມຂອງລັດໃນແຕ່ລະໄລຍະລວມທັງລະບຽບກົດໝາຍຕ່າງໆໃຫ້ນັກຂ່າວ-ໂຄສົກໃຫ້ຫຼາຍຂຶ້ນເນື້ອໃນຂອງຂ່າວ, ບົດ ແລະ ລາຍການຕ້ອງໜັກແໜ້ນແຫຼມຄົມ, ໜ້າສົນໃຈຕື່ມ, ວ່ອງໄວ ແລະຖືກຕ້ອງເຊື່ອຖືໄດ້ເພື່ອໂຄສະນາຕອບຕ້ານຂ່າວລື, ຂ່າວປອມ, ຂ່າວໃສ່ຮ້າຍປ້າຍສີຕ່າງໆ, ສ້າງພະນັກງານສືບທອດທີ່ເກັ່ງມີຄຸນນະ ພາບສູງ, ສືບຕໍ່ສ້ອມແປງອຸປະກອນເຕັກນິກທີ່ໃຊ້ງານມາດົນໃຫ້ສາມາດໃຊ້ງານໄດ້ຮັບປະກັນ ແລະບັນຫາອື່ນໆ.

แชร์