ປະຊາຊົນບ້ານຫ້ວຍລືສີນ້ອຍ ຍັງມີຄວາມສ່ຽງຕໍ່ລະເບີດບໍ່ທັນແຕກ

 ຊາວບ້ານຫ້ວຍລືສີນ້ອຍ ເມືອງປາກຊ່ອງ ແຂວງຈໍາປາສັກ ຍັງມີຄວາມສ່ຽງສູງຕໍ່ອັນຕະລາຍຈາກລູກລະເບີດບໍ່ທັນແຕກໂດຍສະເພາະແມ່ນລູກລະເບີດທີ່ຕົກຄ້າງໃນປາງສົງຄາມຢູ່ລາວທີ່ຍັງບໍ່ທັນເກັບກູ້ອອກໝົດຈາກບ້ານ.

  ທ່ານ ຄໍາສະໝັ່ງ ອະລາສິດ ນາຍບ້ານໆຫ້ວຍລືສີນ້ອຍຫຼັກ 28 ເມືອງປາກຊ່ອງ ແຂວງຈໍາປາສັກ ພ້ອມຄະນະໃຫ້ສໍາພາດຕໍ່ນັກຂ່າວປະຈໍາທ້ອງຖິ່ນວ່າ: ຜ່ານມາຈົນເຖິງປະຈຸບັນລະເບີດບໍ່ທັນແຕກໄດ້ສົ່ງຜົນກະທົບອັນໃຫຍ່ຫຼວງໃຫ້ແກ່ປະຊາຊົນບ້ານຫ້ວຍລືສີນ້ອຍເປັນຕົ້ນແມ່ນມີອຸປະສັກກີດກັ້ນໃນການບຸກເບີກເນື່ອທີ່ການຜະລິດເຮັດສວນປູກກາເຟ, ຊາ, ປູກໝາກຖົ່ວລຽນຂອງປະຊາຊົນ,ເນື່ອງຈາກປະຊາຊົນສ່ວນໃຫຍ່ມີອາຊີບເຮັດສວນ,ຊຶ່ງຜ່ານມາໄດ້ມີປະຊາຊົນໄດ້ເສຍຊີວິດຍ້ອນລະເບີດບໍ່ທັນແຕກແລ້ວ 4 ຄົນ ແລະເສຍອົງຄະອີກຈໍານວນໜຶ່ງ.

ຢ່າງໃດກໍ່ຕາມຍ້ອນຄວາມເປັນຫ່ວງເປັນໄຍຂອງພັກ-ລັດ ກໍຄືອໍານາດການປົກຄອງແຂວງຈໍາປາສັກແນໃສ່ເຮັດໃຫ້ປະຊາຊົນຫຼີກເວັ້ນຈາກຜົນກະທົບ, ຜົນເສຍຫານຈາກລູກລະເບີດບໍ່ທັນແຕກທາງອົງການເກັບກູ້ລະເບີດກໍ່ໄດ້ເຄື່ອນໄຫວເກັບກູ້ລະເບີດອອກຈາກເນື້ອທີ່ສວນ, ເຮືອນຊານບ້ານຊ່ອງ, ເສັ້ນທາງ, ວັດ, ໂຮງຮຽນ, ໄຮ່ ແລະສວນຂອງປະຊາຊົນເປັນຈໍານວນຫຼາຍແລ້ວ, ແຕ່ເນື່ອງຈາກລູກລະເບີດທີ່ຕົກຄ້າງໄດ້ຝັງເລີກຢູ່ພື້ນດິນຈຶ່ງຍັງມີຈໍານວນບໍ່ໜ້ອຍຍັງຢາຍຢູ່ຕາມຮົ້ວສວນຂອງປະຊາຊົນບໍ່ທັນໄດ້ ເກັບກູ້ອອກ,ດັ່ງນັ້ນຈຶ່ງຮຽກຮ້ອງສະເໜີເຖິງອົງການເກັບກູ້ລະເບີດລົງມາຊ່ວຍເກັບກູ້ອອກເພື່ອຄວາມປອດໄພຂອງປະຊາຊົນ, ໂດຍສະເພາະລູກລະເບີດທີ່ຕົກຄ້າງຢູ່ສວນມັນຕົ້ນຂອງປະຊາຊົນທີ່ບຸກເບີກໃໝ່,ເມື່ອກ່ອນແມ່ນຄ້າຍສາງແສງຂອງທະຫານຈັກກະພັດ,ຊຶ່ງເຫັນວ່າມີລູກລະເບີດ ແລະຊີ້ນສ່ວນລະເບີດຕົກຄ້າງພົ້ນຈາກໜ້າດິນຈໍານວນຫຼາຍ ແລະຍັງມີຄວາມສ່ຽງຕໍ່ປະຊາຊົນຖ້າບໍ່ໄດ້ຮັບການເກັບກູ້ອອກ.

• 20/08/2020