ມອບ-ໂອນ ບ້ານຄຳປ່າແໜ ເມືອງຈຳພອນໄປຂື້ນກັບເມືອງຊົນນະບູລີ

   ພິທີມອບ-ໂອນ ບ້ານຄຳປ່າແໜ ເມືອງຈຳພອນ ໄປຂຶ້ນກັບເມືອງຊົນນະບູລີ ແຂວງສະຫວັນນະເຂດ ຈັດຂຶ້ນໃນວັນທີ 14 ສິງຫາ 2020 ທີ່ສະໂມສອນບ້ານຄຳປ່າແໜ, ໂດຍການເຂົ້າຮ່ວມເປັນປະທານຂອງທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ,ການນຳຂັ້ນແຂວງ,ພ້ອມດ້ວຍເຈົ້າເມືອງ ແລະຄະນະຂອງທັງສອງເມືອງອຳນາດການປົກຄອງບ້ານ ແລະປະຊາຊົນບ້ານຄຳປ່າແໜເຂົ້າຮ່ວມ. ພິເສດຍັງມີທ່ານ ເກຍ ອູ໊ສິດ ທິເດດ ນັກພັດທະນາດີເດັ່ນທັງເປັນຜູ້ພັດທະນາບ້ານດັ່ງກ່າວກໍ່ໄດ້ເຂົ້າຮ່ວມໃນພິທີຄັ້ງນີ້.
 ທ່ານ ຄຳລຸຍ ຍາດຕິວົງ ເຈົ້າເມືອງຈຳພອນ ກ່າວລາຍງານສະພາບຂອງບ້ານຄຳປ່າແໜ ແລະສະພາບການເຄື່ອນໄຫວຂອງຄະນະຮັບຜິດຊອບຂັ້ນເມືອງໃນການດຳເນີນຂັ້ນຕອນໃຫ້ແກ່ການກະກຽມມອບ-ໂອນບ້ານວ່າ: ບ້ານຄຳປ່າແໜ ແມ່ນບ້ານໜຶ່ງຂອງເມືອງຈຳພອນ ຊຶ່ງຫ່າງຈາກຕົວເມືອງໄປຫາທິດຕາເວັນອອກປະມານ 18 ກິໂລ ແມັດ, ມີເນື້ອທີ່ທັງໝົດ 153.743 ເຮັກຕາ, ມີພົນລະເມືອງທັງໝົດ 826 ຄົນ, ຍິງ 392 ຄົນ, ມີ 154 ຄອບຄົວ, ມີ 116 ຫຼັງຄາເຮືອນ, ປະຊາຊົນເຊື່ອຖືສາສະໜາພຸດ, ເປັນເຜົ່າກະຕາງ, ມີອາຊີບເຮັດນາເປັນຕົ້ນຕໍ, ປູກຝັງ ແລະລ້ຽງສັດເປັນສຳຮອງ, ສະພາບພູມສັນຖານເປັນທົ່ງພຽງສະຫລັບຊັບຊ້ອນກັບປ່າໂຄກເລັກໜ້ອຍ, ມີເສັ້ນທາງໄປມາສະດວກສະບາຍເຊື່ອມຈອດເຖິງເມືອງ ແລະບ້ານອື່ນໆໄດ້. ແຕ່ເຖິງຢ່າງໃດກໍຕາມບ້ານຄຳປ່າແໜຍັງມີຂໍ້ຈຳກັດຫຼາຍດ້ານເປັນຕົ້ນ: ປະຊາຊົນຍັງຂາດເຂີນເຂົ້າກິນເປັນຈຳນວນຫຼາຍຄອບຄົວໃນປີ 2019 ການຜະລິດນາປີຂອງປະຊາຊົນຖືກກະທົບຈາກໄພແຫ້ງແລ້ງບວກໃສ່ສະພາບດິນຟ້າອາກາດທີ່ບໍ່ອຸດົມສົມ ບູນຈຶ່ງເຮັດໃຫ້ມີຜົນຜະລິດຕົກຕໍ່າເຊິ່ງເປັນສາເຫດເຮັດໃຫ້ບ້ານຄຳປ່າແໜ ບໍ່ທັນຮັບປະກັນທາງດ້ານສະບຽງອາຫານ, ລວມທັງຄວາມສະຫງົບ ແລະຄວາມເປັນລະບຽບ ຮຽບຮ້ອຍໃນສັງຄົມ, ການຈັດຕັ້ງລະບົບການເມືອງຂອງອົງການປົກຄອງບ້ານບໍ່ທັນເຂັ້ມແຂງໃນການນຳພາປະຊາຊົນເພື່ອແກ້ໄຂຄວາມທຸກຍາກກໍຄືການຫຼຸດຜ່ອນການໄປຂໍທານ, ພາຍຫລັງທີ່ທາງໂຮງງານຜະລິດນໍ້າດື່ມ ແລະນໍ້າກ້ອນໂລມາຄຳໄດ້ມອບໂຄງການແກ້ໄຂຄວາມທຸກຍາກບ້ານຄຳປ່າແໜແລ້ວເມືອງຈຳພອນກໍໄດ້ເອົາໃຈໃສ່ເປັນພິເສດໂດຍກຳນົດເປົ້າໝາຍຈຸດສຸມເພື່ອລຶບລ້າງຄວາມທຸກຍາກຂອງປະຊາຊົນແນໃສ່ບໍ່ໃຫ້ປະຊາຊົນໄປຂໍທານໂດຍສ້າງໂຄງການຈັດສັນອາຊີບຄົງທີ່, ຈັດສັນບ່ອນທຳມາ ຫາກິນໃຫ້ປະຊາຊົນໂດຍຫັນເອົາພະນັກງານຈາກເມືອງ, ພະແນກການຂອງແຂວງລົງມາສືບຕໍ່ຈັດຕັ້ງປະຕິບັດໜ້າວຽກຈຸດສຸມຫຼາຍຢ່າງເປັນຕົ້ນທາງດ້ານວຽກງານກະສິກຳນຳພາໃນການປູກ ຝັງ-ລ້ຽງສັດ, ຈັດຕັ້ງຝຶກອົບຮົມສ້າງຄອບຄົວຕົວແບບຍົກສະມັດຕະພາບການຜະລິດເຂົ້າ, ການນຳໃຊ້ເຕັກນິກນາຫວ່ານ, ນາຢອດ ແລະນາດຳ, ການປູກພືດໃນເຮືອນຮົ່ມ, ການປູກພືດຜັກສວນຄົວ, ການປູກເຫັດ, ການລ້ຽງປາ, ຈັດຕັ້ງກຸ່ມຕໍ່າຫູກທີ່ສ້າງລາຍຮັບໃຫ້ແກ່ຄອບຄົວແຕ່ການຈັດຕັ້ງປະຕິບັດແມ່ນພົບຂໍ້ຫຍຸ້ງຍາກຍ້ອນຂາດເຂີນທາງດ້ານງົບປະມານໃນການຊຸກຍູ້ສົ່ງເສີມ.


  ຈາກນັ້ນເຈົ້າເມືອງຂອງທັງສອງເມືອງຄື: ເມືອງຈຳພອນໂດຍ ທ່ານ ຄຳລຸຍ ຍາດຕິວົງ ແລະ ທ່ານ ສຸວິໄລ ຫຼວງສະລາດ ເຈົ້າເມືອງຊົນນະບູລີໄດ້ຮ່ວມເຊັນບົດບັນທຶກມອບ-ໂອນຕາມຂໍ້ຕົກລົງຂອງເຈົ້າ ແຂວງສະຫວັນນະເຂດ ວ່າດ້ວຍການມອບໂອນບ້ານຄືນໃໝ່ເພື່ອໃຫ້ເໝາະສົມກັບສະພາບຕົວຈິງຂອງທ້ອງຖິ່ນທີ່ເຫັນດີໃຫ້ມອບ-ໂອນ ບ້ານຄຳປ່າແໜພ້ອມດ້ວຍເຂດແດນຄຸ້ມຄອງຂອງບ້ານໄປຂຶ້ນກັບອຳນາດການປົກຄອງ ເມືອງຊົນນະບູລີ ແຂວງສະຫວັນນະເຂດ.
  ໂອກາດເຂົ້າຮ່ວມພິທີມອບ-ໂອນ ບ້ານຄຳປ່າແໜຄັ້ງນີ້ທ່ານ ສັນຕິພາບ ພົມວິຫານ ຍັງໄດ້ເນັ້ນໜັກໃຫ້ການນຳຂອງເມືອງຊົນນະບູລີ ຕ້ອງໄດ້ລົງໃກ້ຊິດຕິດແທດກັບປະ ຊາຊົນ, ນຳພາປະຊາຊົນສ້າງສາພັດທະນາເພື່ອປ່ຽນແປງຮູບແບບວິຖີການດຳລົງຊີວິດຂອງປະຊາຊົນໃຫ້ມີການພັດທະນາດີຂຶ້ນ, ທາງພາກສ່ວນກະສິກຳ ແລະ ປ່າໄມ້ກໍ່ຕ້ອງໄດ້ນຳພາເອົາໃຈໃສ່ຊຸກຍູ້ໃນການປູກ, ການລ້ຽງຂອງປະຊາຊົນໃຫ້ກຸ້ມຢູ່ກຸ້ມກິນສ້າງໃຫ້ປະຊາຊົນມີຊີວິດການເປັນຢູ່ນັບມື້ດີຂຶ້ນເປັນກ້າວໆ.

แชร์