ໂຄງການປູກໄມ້ບົວລະພາປະກອບສ່ວນພັດທະນາຊົນລະບົດ

  ໂຄງການລົງທຶນປູກໄມ້ຂອງບໍລິສັດບົວລະພາກະສິກຳ-ປ່າໄມ້ຈຳກັດ ໃນໄລຍະຜ່ານມາໄດ້ສ້າງຜົນປະໂຫຍດຫຼາຍຢ່າງແກ່ປະຊາຊົນທີ່ເຂົ້າຮ່ວມໂຄງການພ້ອມນັ້ນຍັງປະ ກອບສ່ວນໃນການພັດທະນາເສດຖະກິດ-ສັງຄົມ ນຳອີກແນວໃດກໍດີພາຍຫຼັງທີ່ລັດຖະບານໄດ້ອະນຸມັດເນື້ອທີ່ຂອງປ່າໄມ້ຊຸດໂຊມໃຫ້ບໍລິສັດ 60 ພັນເຮັກຕາ ຖ້າຫາກບໍລິສັດຂະຫຍາຍເນື້ອທີ່ປູກໄມ້ຮອດຈຳນວນດັ່ງກ່າວຍິ່ງຈະຊ່ວຍສ້າງວຽກເຮັດງານທຳໃຫ້ປະຊາຊົນທີ່ຢູ່ໃກ້ຄຽງໂຄງການ ແລະ ຈະຊ່ວຍປັບປຸງຊີວິດການເປັນຢູ່ຂອງປະຊາ ຊົນທ້ອງຖິ່ນພ້ອມທັງເປັນການປະກອບສ່ວນຢ່າງຕັ້ງໜ້າໃນການພັດທະນາຊົນນະບົດແກ້ໄຂຄວາມທຸກຍາກເທື່ອລະກ້າວ.
   ໄປຄຽງຄູ່ກັບການພັດທະນາສວນໄມ້ປູກໃນໄລຍະຜ່ານມາບໍລິສັດບົວລະພາໄດ້ໃຫ້ການຊ່ວຍເຫຼືອໃນການປັບປຸງຊີວິການເປັນຢູ່ຂອງປະຊາຊົນທ້ອງຖິ່ນໂດຍສະເພາະໄດ້ປະກອບສ່ວນທຶນເຂົ້າໃນກອງທຶນພັດທະນາບ້ານ ແລະກອງທຶນພັດທະນາກຸ່ມບ້ານ, ເມືອງໃນເຂດໂຄງການເປັນຈຳນວນຫຼາຍພໍສົມຄວນໃນຕໍ່ໜ້າບໍລິສັດບົວລະພາຍັງຈະສືບຕໍ່ຊ່ວຍໃນທຳນອງດຽວກັນໂດຍສະເພາະຖ້າບໍລິສັດຂະຫຍາຍເນື້ອທີ່ປູກໄມ້ຂຶ້ນເປັນ 60.000 ເຮັກຕາ ຕະຫຼອດໄລຍະຂອງອາຍຸຂອງໂຄງການ (50ປີ), ບໍລິສັດຈະປະກອບທຶນເຂົ້າໃນກອງທຶນພັດທະນາບ້ານປະມານ 8,28 ແສນໂດລາ ຈາກເງິນກອງທຶນເຫຼົ່ານີ້,ອຳນາດການປົກຄອງແຕ່ລະຂັ້ນສາມາດຄຸ້ມຄອງ ແລະນຳໃຊ້ເປັນກອງທຶນສິນເຊື່ອຫຼືນຳໃຊ້ເຂົ້າໃນວຽກງານພັດທະນາເສດຖະກິດ-ສັງຄົມຮອບດ້ານ, ລວມທັງການພັດທະນາສິ່ງສາທາລະນະປະໂຫຍດຢູ່ໃນແຕ່ລະຂັ້ນການຄຸ້ມຄອງໄດ້.


   ສິ່ງທີ່ສຳຄັນບໍລິສັດບົວລະພາຕ້ອງໄດ້ລົງທຶນສ້າງ ແລະຍົກລະດັບເສັ້ນທາງເຂົ້າຫາເນື້ອທີ່ໂຄງການຊຶ່ງຄາດຄະເນຈະໄດ້ໃຊ້ງົບປະມານທັງໝົດປະມານ 51,11 ລ້ານໂດລາ, ການສ້າງ ແລະຍົກລະດັບລະບົບເສັ້ນທາງເຂົ້າຫາພື້ນທີ່ໂຄງການນີ້ຄາດວ່າປະຊາຊົນ ແລະ ອຳນາດການປົກຄອງໃນເຂດໂຄງການ ແລະ ເຂດອ້ອມຂ້າງຈະໄດ້ຮັບຜົນປະໂຫຍດມະຫາສານໃນການຕິດຕໍ່ພົວພັນວຽກງານລັດຖະບານ, ການຄ້າຂາຍແລະອື່ນໆ ນອກນີ້ການນຳໃຊ້ການປູກໄມ້ໃນລະບົບກະສິກຳ-ປ່າໄມ້ແບບປະສົມປະສານທີ່ໃຫ້ຜົນປະໂຫຍດຂ້າງຄຽງທາງດ້ານສັງຄົມ,ທາງດ້ານການຜະລິດສະບຽງອາຫານ ແລະສ້າງລາຍຮັບເສີມຢ່າງຫຼວງຫຼາຍ, ຊຶ່ງນີ້ເປັນພຽງຜົນປະໂຫຍດໃນລະດັບທ້ອງ ຖິ່ນເທົ່ານັ້ນແຕ່ໂຄງການດັ່ງກ່າວຍັງຈະສ້າງຜົນປະໂຫຍດຢ່າງຫຼວງຫຼາຍໃນລະດັບຊາດ.
   ບໍລິສັດບົວລະພາກະສິກຳ-ປ່າໄມ້ຈຳກັດ ເປັນບໍລິສັດປູກໄມ້ ແລະປຸງແຕ່ງໄມ້ທີ່ລົງທຶນຮ່ວມກັນລະຫວ່າງນັກທຸລະກິດຈາກປະເທດຊູແອດຖືຮຸ້ນ 95% ແລະນັກທຸລະ ກິດລາວຖືຮຸ້ນ 5%, ບໍລິສັດດັ່ງກ່າວໄດ້ສ້າງຕັ້ງຂຶ້ນໃນ ສປປ ລາວ ໃນປີ 1993 ມີເງິນຈົດທະບຽນ 31 ລ້ານໂດລາ ແລະ ໄດ້ລົງທຶນປະຈຸບັນ 49,6 ລ້ານໂດລາ, ສຳລັບຜະລິດຕະພັນປຸ່ງໄມ້ຂອງບໍລິສັດບົວລະພາແມ່ນຈຳໜ່າຍທັງພາຍໃນປະເທດ ແລະສົ່ງອອກໄປຫຼາຍກວ່າ 10 ປະເທດເຊັ່ນ: ມານດິບທີ່ເປັນລູກຄ້າລາຍໃຫຍ່, ຮອງລົງມາແມ່ນອາເມລິກາ, ສ.ເກົາຫຼີ, ອີຕາລີ, ຣັດເຊຍ ແລະອື່ນໆ
  ມາຮອດປີ 2018 ບໍລິສັດໄດ້ຮັບສິດນຳໃຊ້ທີ່ດິນໃນເນື້ອທີ່ປະມານ 10.628 ເຮັກຕາ ແລະໄດ້ລົງທຶນປູກໄມ້ໄປແລ້ວ 4.165 ເຮັກຕາແລະກຳລັງດຳເນີນການປູກໄມ້ 2.000 ເຮັກຕາຢູ່ປ່າຜະລິດແຫ່ງຊາດໜອງເປັດ-ນາແຊງບ້ານນາອັນເມືອງຫີນເຫີບ, ປ່າຜະລິດແຫ່ງຊາດພູເຍີຍເມືອງຊະນະຄາມ ແລະ ເມືອງເຟືອງແຂວງວຽງຈັນໂດຍສ່ວນໃຫຍ່ແມ່ນໄມ້ວິກ, ໄມ້ກະຖິນນະໂລງ, ໄມ້ສັກ ແລະ ໄມ້ດູ່ຈຳນວນໜຶ່ງ, ປະຈຸບັນບໍລິສັດບົວລະພາມີໂຮງເລື່ອຍ ແລະ ໂຮງງານເຟີນິເຈີທັນສະໄໝ 1 ແຫ່ງຢູ່ນະຄອນຫຼວງວຽງຈັນ, ນອກນັ້ນບໍລິສັດຍັງສ້າງຕັ້ງໂຮງງານໄມ້ອັດ ແລະໄມ້ຝານທີ່ທັນສະໄໝຂຶ້ນອີກໜຶ່ງແຫ່ງຢູ່ເມືອງຫີນເຫີບແຂວງວຽງຈັນເພື່ອນຳໃຊ້ວັດຖຸດິບຈາກສວນໄມ້ປູກຂອງບໍລິສັດມາຜະລິດເປັນສິນຄ້າຫຼືເປັນຜະລິດຕະພັນໄມ້ສົ່ງອອກສູ່ຕະຫຼາດຕ່າງປະເທດ.

แชร์