ອາຊຽນ ຫາລືຄວບຄຸມມົນລະພິດໝອກຄວັນຂ້າມຜ່ານຊາຍແດນ

  ກອງປະຊຸມທາງໄກລະດັບລັດຖະມົນຕີດ້ານມົນລະພິດໝອກຄວັນຂ້າມຜ່ານຊາຍແດນໃນຂົງເຂດແມ່ນໍ້າຂອງຕອນລຸ່ມຄັ້ງທີ 9 ໄດ້ຈັດຂຶ້ນໃນວັນທີ 14 ສິງຫາ 2020 ທີ່ກົມອຸຕຸນິຍົມ ແລະອຸທົກກະສາດກະຊວງຊັບພະຍາກອນທໍາມະຊາດ ແລະສິ່ງແວດລ້ອມໂດຍເປັນປະທານຮ່ວມຂອງທ່ານ ໄຊນະຄອນ ອິນທະວົງ ຮອງລັດຖະມົນຕີກະ ຊວງຊັບພະຍາກອນທຳມະຊາດ ແລະສິ່ງແວດລ້ອມ ແລະທ່ານ ຢິ ມິນ ສະເວ ຮອງລັດຖະມົນຕີກະຊວງຊັບພະຍາກອນທຳມະຊາດ ແລະສິ່ງແວດລ້ອມມຽນມາມີບັນດາທ່ານຮອງລັດຖະມົນຕີຈາກປະເທດກໍາປູເຈຍ, ຫວຽດນາມ, ໄທ ແລະກອງເລຂາອາຊຽນພ້ອມດ້ວຍບັນດາປະເທດສະມາຊິກລວມທັງຜູ້ຕາງໜ້າຈາກບັນດາກະຊວງກ່ຽວ ຂ້ອງເຂົ້າຮ່ວມ.


ໃນກອງປະຊຸມທ່ານ ໄຊນະຄອນ ອິນທະວົງ ໃນນາມເປັນປະທານຮ່ວມກອງປະຊຸມໄດ້ກ່າວຕ້ອນຮັບ ແລະກ່າວເປີດກອງປະຊຸມຢ່າງເປັນທາງການຊຶ່ງໄດ້ກ່າວເຖິງສະພາບ ການລະບາດຂອງພະຍາດປອດອັກເສບ (COVID-19) ແລະ ສະພາບຂອງການປ່ຽນແປງດິນຟ້າອາກາດ ແລະ ການເພີ່ມຂຶ້ນຂອງມົນລະພິດບັນຫາກ່ຽວກັບມົນລະພິດໝອກຄວັນຂ້າມຊາຍແດນທີ່ໄດ້ເກີດຂຶ້ນໃນຕົ້ນປີຜ່ານມາທີ່ເຂດພາກເໜືອຂອງພາກພື້ນອາຊຽນເຊິ່ງເຫດການດັ່ງກ່າວໄດ້ກໍ່ໃຫ້ເກີດຜົນກະທົບດ້ານລົບຢ່າງຮຸນແຮງຕໍ່ກັບຄຸນນະພາບອາກາດຊຶ່ງຮຽກຮ້ອງໃຫ້ປະເທດສະມາຊິກຕ້ອງໄດ້ເຮັດວຽກຮ່ວມກັນເພື່ອສຸມໃສ່ການຫຼຸດຜ່ອນມົນລະພິດໝອກຄວັນ ແລະ ໄຟໄໝ້ປ່າໂດຍສະເພາະການຈັດຕັ້ງປະຕິບັດວຽກງານ ຫຼືກິດຈະກຳຕ່າງໆ ເພື່ອຊຸກຍູ້ການຫຼຸດຜ່ອນ ແລະຄວບຄຸມການເກີດໄຟປ່າ ແລະການແຜ່ຂະຫຍາຍຂອງມົນລະພິດຂ້າມຊາຍແດນແມ່ນຈະມີຄວາມຫຍຸ້ງຍາກຂຶ້ນເປັນທະວີຄູນກໍ່ຕາມສະນັ້ນເພື່ອຮອງຮັບກັບສະພາບທີ່ເກີດຂຶ້ນໃນປະຈຸບັນບັນດາປະເທດສະມາຊິກຕ້ອງມີການປະສານງານຮ່ວມກັນເປັນແຕ່ໄລຍະ ເພື່ອຄົ້ນຫາແນວທາງຕອບໂຕ້ກັບບັນຫາ ແລະສິ່ງທ້າທາຍດັ່ງກ່າວ.
  ກອງປະຊຸມຄັ້ງນີ້ບັນດາປະເທດສະມາຊິກໄດ້ລະດົມແນວຄວາມຄິດເຫັນເພື່ອພ້ອມກັນ ແລະເຮັດວຽກຮ່ວມກັນຢ່າງມີປະສິດທິພາບເພື່ອໃຫ້ບັນລຸຕາມວິໄສທັດກ່ຽວກັບການເປັນປະຊາຄົມປາສະຈາກໝອກຄວັນພາຍໃນປີ 2020 ຊຶ່ງນອນຢູ່ໃນພັນທະຂອງແຜນງານການຮ່ວມມືອາຊຽນດ້ານການຄວບຄຸມມົນລະພິດ, ດ້ານໝອກຄວັນ ແລະສັນຍາອາຊຽນດ້ານມົນລະພິດໝອກຄວັນຂ້າມຜ່ານຊາຍແດນນອກນັ້ນຍັງໄດ້ເຫັນດີເປັນເອກະພາບໃຫ້ມີການສືບຕໍ່ຂະຫຍາຍເວລາໃນການຈັດຕັ້ງປະຕິບັດແຜນດໍາເນີນງານການຮ່ວມມືອາຊຽນ, ດ້ານການຄວບຄຸມມົນລະພິດທາງໝອກຄວັນ ແລະ ສັນຍາອາຊຽນ, ດ້ານມົນລະພິດໝອກຄວັນຂ້າມຜ່ານຊາຍແດນສຳລັບ 2020-2025.

แชร์