ເມືອງຫົງສາ ມອບ-ຮັບໜ້າທີ່ລະຫວ່າງ ຫົວໜ້າຫ້ອງການ ຖວທ ຜູ້ເກົ່າ ແລະໃໝ່

 ຫ້ອງການຖະແຫຼງຂ່າວ, ວັດທະນະທຳ ແລະທ່ອງທ່ຽວ (ຖວທ) ເມືອງຫົງສາ ແຂວງໄຊຍະບູລີ ໄດ້ຈັດພິທີມອບ-ຮັບໜ້າທີ່ລະຫວ່າງຫົວໜ້າຫ້ອງການ ຖວທ ເມືອງຜູ້ເກົ່າ ແລະຜູ້ໃໝ່, ຂຶ້ນໃນວັນທີ 8 ກຸມພາ 2019 ທີ່ຫ້ອງການດັ່ງກ່າວ, ໂດຍການເປັນກຽດເຂົ້າຮ່ວມຂອງທ່ານນາງ ດາວວິນ ລາດຊະກິດ ຮອງເຈົ້າເມືອງຫົງສາຜູ້ຊີ້ນຳວຽກງານຂົງເຂດວັດທະນະທຳ-ສັງຄົມເມືອງ, ມີແຂກຖືກເຊີນ ແລະພະນັກງານຫ້ອງການດັ່ງກ່າວເຂົ້າຮ່ວມ.

  ໂດຍປະຕິບັດຕາມຂໍ້ຕົກລົງຂອງທ່ານເຈົ້າເມືອງຫົງສາ ສະບັບເລກທີ 24/ຈມ.ຫສ ລົງວັນທີ 4 ກຸມພາ 2019 ວ່າດ້ວຍການໂຍກຍ້າຍ ທ່ານ ສົມຍົດ ອານຸວົງ ຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະທ່ອງທ່ຽວເມືອງຜູ້ເກົ່າໄປປະຈຳການຢູ່ຫ້ອງການແນວລາວສ້າງຊາດເມືອງ, ແຕ່ງຕັ້ງທ່ານ ສີພູວົງ ວິໄລແກ້ວ ເລຂາຄະນະບໍລິຫານງານຊາວໜຸ່ມເມືອງ ໄປປະຈຳການຢູ່ຫ້ອງການ ຖວທ ເມືອງຫົງສາ.

  ໃນພິທີໄດ້ຮັບຟັງການຜ່ານບົດບັນທຶກການມອບ-ຮັບໜ້າທີ່ລະຫວ່າງຫົວໜ້າຫ້ອງການ ຖວທ ເມືອງຜູ້ເກົ່າ ແລະຜູ້ໃໝ່ໂດຍໄດ້ຍົກໃຫ້ເຫັນເຖິງຜົນງານໃນການຈັດຕັ້ງຊີ້ນຳໃນໄລຍະຜ່ານມາ ແລະສືບຕໍ່ວາງແຜນວຽກໃນຕໍ່ໜ້າຕື່ມອີກ.

  ພ້ອມນັ້ນຍັງໄດ້ຮັບຟັງການໂອ້ລົມຂອງ ທ່ານ ນາງ ດາວວິນ ລາດຊະກິດ ຮອງເຈົ້າເມືອງຫົງສາຜູ້ຊີ້ນຳວຽກງານຂົງເຂດວັດທະນະທຳ-ສັງຄົມເມືອງຕື່ມອີກ.

ໂດຍ: ກິດຕິສັກ ບົວໄລ-ນສພ ເສດຖະກິດ-ສັງຄົມ

• 14/02/2019