ອັດຕະປື ເຜີຍແຜ່ເອກະສານກ່ຽວກັບວຽກງານສ່ວຍສາອາກອນ

   ແນໃສ່ຮັບປະກັນໃຫ້ວຽກງານສ່ວຍສາອາກອນເປັນຕົ້ນແມ່ນການຈັດເກັບພັນທະອາກອນຢູ່ແຕ່ລະຂະແໜງການໃນທົ່ວແຂວງອັດຕະປືເຂົ້າງົບປະມານຖືກຕ້ອງ, ຄົບ ຖ້ວນຕາມລະບຽບກົດໝາຍວ່າດ້ວຍສ່ວຍສາອາກອນສະບັບປັບປຸງໄດ້ຮັບຜົນດີຂຶ້ນຢ່າງຕັ້ງໜ້າ ແລະປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຕາມແນວທາງຂອງພັກເທື່ອລະກ້າວ.

  ດັ່ງນັ້ນ, ມາໃນວັນທີ 13 ສິງຫາ 2020 ທີ່ຫໍປະຊຸມໃຫຍ່ແຂວງອັດຕະປື ສ່ວຍສາອາກອນປະຈຳ ແຂວງອັດຕະປື ໄດ້ຈັດກອງປະຊຸມເຜີຍແຜ່, ແນະນຳເອກະສານ ກ່ຽວກັບວຽກງານສ່ວຍສາອາກອນໂດຍການເປັນປະທານຂອງ ທ່ານ ເລັດ ໄຊຍະພອນ ເລຂາພັກແຂວງເຈົ້າແຂວງອັດຕະປື, ທ່ານ ຄຳເຜີຍ ໂສມຖາວອນ ຫົວໜ້າພະ ແນກການເງິນເເຂວງ, ມີຫົວໜ້າ-ຮອງຫົວໜ້າພະແນກການ, ຂະແໜງການກ່ຽວຂ້ອງ, ຮອງເຈົ້າເມືອງຈາກ 5 ເມືອງ ແລະຜູ້ປະກອບການທຸລະກິດເຂົ້າຮ່ວມ.

  ເອກະສານທີ່ນຳມາເຜີຍແຜ່ກ່ຽວກັບວຽກງານສ່ວຍສາອາກອນໃນກອງປະຊຸມດັ່ງກ່າວນີ້ປະກອບມີເອກະສານການຄຸ້ມຄອງຈັດເກັບຄ່າທຳນຽມທາງ, ເອກະສານການຄຸ້ມຄອງຈັດເກັບພາສີທີ່ດິນ, ການຄຸ້ມຄອງຈັດເກັບລາຍຮັບອາກອນລາຍໄດ້ຈາກການໂອນສິດນໍາໃຊ້ທີ່ດິນ, ການຄຸ້ມຄອງນຳໃຊ້ການເກັບເງິນ ແລະ ເອກະສານການຈົດ ທະບຽນເຂົ້າສູ່ລະບົບອາກອນມູນຄ່າເພີ່ມພ້ອມນີ້ຍັງມີການເຜີຍແຜ່ບັນດາເອກະສານຄໍາສັ່ງແນະນຳຕ່າງໆກ່ຽວກັບການຈັດເກັບລາຍຮັບຂອງກະຊວງການເງິນ ແລະຄໍາສັ່ງຕ່າງໆຂອງເຈົ້າ ແຂວງອັດຕະປືອີກຈໍານວນໜຶ່ງຊຶ່ງໃນກອງປະຊຸມໄດ້ມີການເປີດໂອກາດໃຫ້ແຕ່ລະຂະແໜງການ ແລະພາກສ່ວນຜູ້ປະກອບການທຸລະກິດໄດ້ປະກອບຄຳເຫັນເພື່ອພ້ອມກັນຊອກຫາວິທີທາງປົດລອກຂໍ້ຫຍຸ້ງຍາກໃນບາງບັນຫາຂອງການຈັດເກັບລາຍຮັບໃນທຸກໆຫົວໜ່ວຍໃຫ້ຮັບການແກ້ໄຂດີຂຶ້ນ.

  ໃນກອງປະຊຸມ ທ່ານ ເລັດ ໄຊຍະພອນ ເລຂາພັກແຂວງເຈົ້າ ແຂວງອັດຕະປື ໄດ້ຍົກໃຫ້ເຫັນວ່າທຸກເອກະສານທີ່ໄດ້ນຳມາເຜີຍແຜ່ໃນເທື່ອນີ້ຂໍໃຫ້ບັນດາສະຫາຍຈົ່ງໄດ້ສືບຕໍ່ຜັນຂະຫຍາຍເຊື່ອມຊຶມໃຫ້ພະນັກງານທີ່ຢູ່ໃນຄວາມຮັບຜິດຊອບຂອງຕົນແຕ່ລະຂະແໜງການ ແລະ ພໍ່ແມ່ປະຊາຊົນໃນທົ່ວແຂວງອັດຕະປືໂດຍສະເພາະຜູ້ທີ່ຍັງບໍ່ ທັນໄດ້ເສຍພັນທະອາກອນຕາມລະບຽບການດັ່ງກ່າວຕ້ອງໃຫ້ປະຕິບັດຕາມບັນດານິຕິກຳໃຫ້ທັນເວລາ ແລະ ມີຄວາມເປັນເອກະພາບໃນທົ່ວແຂວງໂດຍຜ່ານລະບົບທະນາ ຄານ ຫຼືຕາມລະບຽບການຂອງກະຊວງການເງິນວາງອອກນັ້ນໃຫ້ມີຄວາມລະອຽດຊັດເຈນເພື່ອບຸກທະລຸດ້ານການຈັດເກັບລາຍຮັບໃນສົກປີ 2020 ໃຫ້ໄດ້ຕາມທິດທາງແຜນການທີ່ໄດ້ກຳນົດໄວ້ແລະຮັບປະກັນໄດ້ການຈັດຕັ້ງປະຕິບັດເກັບລາຍຮັບໃຫ້ມີປະສິດທິຜົນສູງກວ່າເກົ່າ.

___________

ຂ່າວ: ເທວາ

ຮູບພາບ: ໜັງສືພິມເສດຖະກິດ-ສັງຄົມ

แชร์