ເດັກຂາດສານອາຫານຢູ່ແຂວງເຊກອງມີອັດຕາຫຼຸດລົງ

 ກອງປະຊຸມຄະນະກຳມະການໂພຊະນາການຂັ້ນແຂວງໄດ້ໄຂຂຶ້ນໃນວັນທີ 12 ກຸມພາ 2019 ທີ່ຫ້ອງວ່າການແຂວງເຊກອງໂດຍການເປັນປະທານຂອງ ທ່ານ ຖາວອນ ພົມມະໄລລຸນ ຮອງເຈົ້າແຂວງ,ປະທານຄະນະກຳມະການດ້ານໂພຊະນາການຂັ້ນແຂວງ, ມີທ່ານ ວິສັນ ອິນທະວົງ ຫົວໜ້າພະແນກສາທາລະນະສຸກແຂວງ, ຮອງປະທານຄະນະກຳມະການຂັ້ນແຂວງ, ມີບັນດາຄະນະກຳມະການດ້ານໂພຊະນາການຂັ້ນແຂວງພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ນາງ ບຸນທະໜອມ ນາກ ລີລາ ຫົວໜ້າຂະແໜງອະນາໄມ ແລະສົ່ງເສີມສຸຂະພາບ ໄດ້ສະຫຼຸບລາຍງານຄືນການຈັດຕັ້ງປະຕິບັດວຽກງານດ້ານໂພຊະນາການໃນປີ 2018 ແລະທິດທາງແຜນການ ປີ 2019 ວ່າ: ແຂວງເຊກອງມີຜູ້ຂາດສານອາຫານຫຼາກຫຼາຍໃນ ການນໍາມາບໍລິໂພກ ໂດຍອີງໃສ່ຜົນ ການສໍາຫຼວດເຫັນວ່າອາຫານທີ່ມີຂາຍຕາມທ້ອງຕະລາດມີພຽງ 70 ລາຍການ ແລະກໍມີລາຄາແພງ; ຊຶ່ງການຂາດສານອາຫານເປັນ ບັນຫາດ້ານສາທາລະນະສຸກຂອງ ສປປ ລາວ ເວົ້າລວມໃນທົ່ວປະ ເທດ, ຈາກຜົນການສໍາຫຼວດ LSIS ປີ 2011-2012 ເດັກລວງສູງບໍ່ ໄດ້ມາດຕະຖານ 44% ແລະປີ 2017 ມີ 33%, ເດັກນໍ້າໜັກຕໍ່າ LSIS ປີ 2011-2012 ມີ 27% ແລະປີ 2017 ມີ 21,1%, ເວົ້າ ສະເພາະແຂວງເຊກອງ ເດັກລວງ ສູງບໍ່ໄດ້ມາດຕະຖານ LSIS ປີ 2011-2012 ມີ 62,7% ແລະປີ 2017 ມີ 49,9%, ເດັກນໍ້າໜັກຕໍ່າ LSIS ປີ 2011-2012 ມີ 46% ແລະປີ 2017 ມີ 34,8%; ແຕ່ຜົນການຈັດຕັ້ງປະຕິບັດເດັກລວງສູງບໍ່ໄດ້ມາດຕະຖານປີ 2017 ມີ 20%, ປີ 2018 ມີ 30%, ເດັກນໍ້າໜັກຕໍ່າປີ 2017 ມີ 29% ປີ 2018 ມີ 21%; ຊຶ່ງເດັກເປົ້າ ໝາຍໄດ້ປະເມີນໂພຊະນາການ ທົ່ວແຂວງ ປະກອບມີເດັກລຸ່ມ 5 ປີ 14.080 ຄົນ, ເດັກກັ່ນຕອງ 10.853 ຄົນ, ໃນນີ້ ກະທັນຫັນ (ຈ່ອຍ) ປານກາງມີ 2.177 ຄົນ ເທົ່າກັບ 20%, ຮ້າຍແຮງ 1.824 ຄົນ ເທົ່າກັບ 17%, ຊໍາເຮື້ອຕໍ່ແບບ ເຕ້ຍປານກາງ 2.374 ຄົນ ເທົ່າ ກັບ 22%, ຮ້າຍ ແຮງ 2.895 ຄົນ ເທົ່າກັບ 27%, ນໍ້າໜັກຫຼຸດມາດ ຕະຖານປານກາງ 2.222 ຄົນ ເທົ່າກັບ 20%, ຮ້າຍແຮງ 1.775 ຄົນ ເທົ່າກັບ 16%, ເດັກເປົ້າ ໝາຍໄດ້ຮັບຜົນປະໂຫຍດມີ 4.001 ຄົນ ຈໍານວນໄດ້ກິນອາຫານ 1.795 ຄົນເທົ່າກັບ 45% ຈໍານວນດີຂຶ້ນຫຼັງກິນອາຫານ 1.544 ຄົນ ເທົ່າກັບ 86%.

  ທ່ານ ນາງ ບຸນທະໜອມ ກ່າວ ຕື່ມວ່າ: ອັດຕາການຂາດສານອາ ຫານຢູ່ແຂວງເຊກອງຈະຫຼຸດລົງ ຖ້າເບິ່ງຄວາມປ່ຽນແປງ 5 ປີ ຜ່ານມາແຕ່ກໍຍັງສູງຖ້າທຽບໃສ່ ລະດັບຊາດ ແລະທຽບໃສ່ຄາດ ໝາຍທີ່ວາງໄວ້ຍັງບໍ່ບັນລຸຕາມ ແຜນ ໂດຍສະເພາະລວງສູງບໍ່ໄດ້ ມາດຕະຖານນີ້ຄືສິ່ງທີ່ພວກເຮົາຈະຕ້ອງໄດ້ຊ່ວຍກັນໃນການຫຼຸດຜ່ອນ, ອີກດ້ານໜຶ່ງຂໍ້ມູນເດັກເຂົ້າເຖິງການຕິດຕາມການຈະເລີນເຕີບໂຕໃນສະຖານບໍລິການສາທາລະນະສຸກແຕ່ລະແຫ່ງ ແລະ ໜ່ວຍງານເຄື່ອ ນທີ່ຍັງບໍ່ທັນສູງກວມເອົາ ໜ້ອຍກວ່າ 50% ຂອງເດັກກຸ່ມ ເປົ້າໝາຍ ຊຶ່ງບໍ່ມີຄວາມໝາຍໃນ ການຕີລາຄາເດັກຂາດສານອາ ຫານ (ຕາມທິດສະດີເດັກຕ້ອງເຂົ້າເຖິງຫຼາຍກວ່າ 95%).

  ນອກນີ້ກອງປະຊຸມຍັງໄດ້ຮັບຟັງການສະຫຼຸບລາຍງານການ ເຄື່ອນໄຫວວຽກງານໂພຊະນາການ 10 ມາດຕະການຂອງພະ ແນກສາທາລະນະສຸກຊຶ່ງມີກິດຈະກໍາ ແລະເຫດການທີ່ພົ້ນເດັ່ນ ແລະທິດທາງແຜນການຈັດຕັ້ງປະ ຕິບັດວຽກງານໂພຊະນາການ ປີ 2019; 4 ມາດຕະການຂອງຫຼາຍ ຂະແໜງການອ້ອມຂ້າງ, ຮ່າງ ບົດບັນທຶກກອງປະຊຸມຄະນະກໍາ ມະການ ແລະກອງປະຊຸມໂພຊະ ນາການຂັ້ນສູນກາງ ແລະການສະ ຫຼຸບການຈັດຕັ້ງປະຕິບັດກິດຈະກໍາໃນບ້ານເຮັດທົດລອງໂພຊະນາການ; ທັງນີ້ ກໍເພື່ອເປັນການແລກປ່ຽນຖອດຖອນບົດຮຽນໃນການຈັດຕັ້ງປະຕິບັດຍຸດທະສາດແຫ່ງຊາດດ້ານໂພສະນາການໃນ 1 ປີຜ່ານມາ ແລະທິດທາງແຜນການປີ 2019 ເພື່ອໄປຜັນຂະຫຍາຍ ແລະຈັດຕັ້ງປະຕິບັດໃຫ້ສອດຄ່ອງກັບສະພາບຕົວຈິງໃນຕໍ່ໜ້າ.

ໂດຍ: ພຸດທະສອນ-ນສພ ເສດຖະກິດ-ສັງຄົມ

แชร์