ໂຄງການປັບປຸງ-ຍົກລະດັບຊົນລະປະທານຄັນທະຈັນສ້າງສຳເລັດເກືອບ 50%

  ໂຄງການປັບປຸງ-ຍົກລະດັບລະບົບຊົນລະປະທານຄັນທະຈານ ເມືອງໄຊພູທອງ ແຂວງສະຫວັນນະເຂດ ຊຶ່ງເປັນໜຶ່ງໃນໂຄງການຍ່ອຍຂອງການພັດທະນາໂຄງລ່າງພື້ນຖານກະສິກໍາຕາມແລວເສດຖະກິດຕາເວັນອອກ-ຕາເວັນຕົກ (ໂຄງການ ພຄກ) ຊຶ່ງແມ່ນບໍລິສັດຈະເລີນໄຊກໍ່ສ້າງ-ສ້ອມແປງຊົນລະປະທານເປັນຜູ້ຮັບເໝົາກໍ່ສ້າງ ແລະສ້ອມແປງຊຶ່ງໄດ້ເລີ່ມລົງມືກໍ່ສ້າງແຕ່ກາງເດືອນພະຈິກປີ 2019 ເປັນຕົ້ນມາ ແລະມາຮອດປະຈຸບັນແມ່ນສໍາເລັດໄປແລ້ວເກືອບ 50% ນີ້ແມ່ນການເປີດເຜີຍຂອງທ່ານ ບຸນເພັງ ສຸລິຍະວົງ ຜູ້ບໍລິຫານໂຄງການຂອງບໍລິສັດຈະເລີນໄຊກໍ່ສ້າງ-ສ້ອມແປງ ຊົນລະປະທານໃນໂອກາດທີ່ທ່ານເຈົ້າ ແຂວງສະຫວັນນະເຂດ ທ່ານ ສັນຕິພາບ ພົມວິ ຫານ ພ້ອມພະແນກການຂອງແຂວງ ແລະເມືອງໄຊພູທອງລົງຕິດຕາມເບິ່ງໂຄງການກໍ່ສ້າງຊຶ່ງເປົ້າໝາຍແມ່ນເລັ່ງລັດໃຫ້ໂຄງການນີ້ໄດ້ດໍາເນີນການກໍ່ສ້າງສໍາເລັດໂດຍໄວອັນເປັນການສະໜອງນໍ້າໃສ່ເນື້ອທີ່ການຜະລິດກະສິກໍາຂອງປະຊາຊົນໄດ້ຢ່າງມີປະສິດທິພາບ.

  ຊຶ່ງໂຄງການດັ່ງກ່າວຕົກເປັນມູນຄ່າເກືອບ 2 ລ້ານໂດລາສະຫະລັດ ປະກອບມີວຽກ, ກໍ່ສ້າງ ແລະຕິດຕັ້ງຫົວງານຊຶ່ງມີຈັກສູບນໍ້າ 2 ຫົວງານ, ໃນນີ້ຫົວງານທີ 1 ຢູ່ບ້ານຄັນທະຈານເປັນຈັກສູບ ນໍ້າແກນຕັ້ງປະກອບມີ ເຄື່ອງສູບນໍ້າ 3 ຊຸດ ທີ່ມີປະສິດຕິພາບດູດສົ່ງນໍ້າ ບໍ່ໍຫຼຸດ 710 ລິດຕໍ່ວິນາທີ ຊຶ່ງໄດ້ສ້າງເຮືອນຈັກສູບນໍ້າ, ວຽກຈັດຊື້ ແລະຕິດຕັ້ງ, ວຽກກໍ່ສ້າງທໍ່ສົ່ງນໍ້າ, ການກໍ່ສ້າງອ່າງຜ່ອນນໍ້າສາມາດສະໜອງນໍ້າໃສ່ເນື້ອທີ່ການຜະລິດນາແຊງໄດ້ 351 ເຮັກຕາ, ຫົວ ງານທີ 2 ແມ່ນຢູ່ບ້ານດອນຖໍ້າ ເງິນຊຶ່ງເປັນຈັກສູບນໍ້າເຮືອນແພປະກອບມີເຄື່ອງສູບນໍ້າ 2 ຊຸດ ມີປະສິດທີພາບການດູດສົ່ງນໍ້າບໍ່ຫຼຸດ 120 ລິດຕໍ່ວິນາທີຕໍ່ຊຸດ ໂດຍມີກໍາລັງມໍເຕີໄຟຟ້າ, ຊຶ່ງໄດ້ດໍາເນີນໜ້າວຽກຄື: ກໍ່ສ້າງເຮືອນຈັກສູບນໍ້າ, ຈັດຊື້ ແລະ ຕິດຕັ້ງຈັກສູບນໍ້າ, ກໍ່ສ້າງທໍ່ສົ່ງນໍ້າ, ສ້າງອ່າງຜ່ອນນໍ້າມີປະຊາຊົນຈະເຮັດນາແຊງໄດ້ 76 ເຮັກຕາ, ວຽກລະບົບຄອງເໝືອງຊຶ່ງໄດ້ກໍ່ສ້າງລະບົບຄອງເບຕົງຈໍານວນ 18 ເສັ້ນ ແລະທໍ່ນໍ້າ 2 ເສັ້ນຍາວ 12.610 ແມັດ ແລະທໍ່ສົ່ງນໍ້າຍາວ 920 ແມັດໃນນີ້ຢູ່ຈຸດຄັນທະຈານມີ 14 ເສັ້ນມີຄອງເໝືອງແມ່ 1 ເສັ້ນ ຍາວ 1.340 ແມັດ, ວຽກດິນສໍາເລັດແລ້ວເບື້ອງວຽກເບຕົງຍັງບໍ່ໄດ້ປະຕິບັດ, ຄອງເໝືອງຂັ້ນສອງ 3 ເສັ້ນຍາວ 2.470 ແມັດ ວຽກດິນສ້າງສໍາເລັດ ແລະ ວຽກເບຕົງປະຕິບັດໄດ້ 30% ແລະ ຄອງເໝືອງຂັ້ນສາມມີ 10 ເສັ້ນຍາວ 6.025 ແມັດ ວຽກດິນປະຕິບັດສໍາເລັດ ແລະ ວຽກເບຕົງປະຕິບັດໄດ້ 61% ແລະວຽກລະບົບຄອງເໝືອງຢູ່ບ້ານດອນຖໍ້າເງິນມີ 4 ເສັ້ນຍາວ2.775 ແມັດ ແລະທໍ່ສົ່ງນໍ້າຍາວ 350 ແມັດ ໃນນີ້ຄອງເໝືອງແມ່ມີ 1 ເສັ້ນ ຍາວ 875 ແມັດວຽກດິນປະຕິບັດສໍາເລັດ ແລະວຽກເບຕົງແມ່ນໃນໄລຍະກໍາລັງຂົນວັດຖຸອຸປະກອນເຂົ້າພາກສະໜາມ, ຄອງເໝືອງຂັ້ນສາມມີ 3 ເສັ້ນຍາວ 1.900 ແມັດ, ວຽກດິນສໍາເລັດແລ້ວສ່ວນວຽກເບຕົງກໍາລັງດໍາເນີນການກໍ່ສ້າງ.

  ຈາກນັ້ນກໍໄດ້ດໍາເນີນການກໍ່ສ້າງເສັ້ນທາງເຂົ້າຫົວງານ 1 ເສັ້ນຍາວ 1.040 ແມັດ ກວ້າງ 4 ແມັດ ສໍາເລັດ 100%, ຊຶ່ງພາຍຫຼັງໂຄງການກໍ່ສ້າງສໍາເລັດມີປະຊາ ຊົນບ້ານຄັນທະຈານ ແລະບ້ານດອນຖໍ້າເງິນຈໍານວນ 267 ຫຼັງຄາເຮືອນ ຈໍານວນ 256 ຄອບຄົວ ມີພົນລະເມືອງ 1.737 ຄົນ ໄດ້ຮັບຜົນປະໂຫຍດຈາກການນໍາໃຊ້ນໍ້າທີ່ດູດຂຶ້ນຈາກນໍ້າຂອງໃສ່ເນື້ອທີ່ການຜະລິດມີນາປີ 688 ເຮັກຕາ,ນາແຊງ 427 ເຮັກຕາ ຈາກນີ້ກໍມີປະຊາຊົນບ້ານອ້ອມຂ້າງອີກມີ,ບ້ານດອນຫວາຍ,ເວີນຄູນ ແລະບ້ານໂພນສົ້ມໂຮງໄດ້ທໍາການປູດພືດຜັກຕ່າງໆຈໍານວນຫຼວງຫຼາຍ.

แชร์