ປະຊາຊົນຄຸ້ມຄອງດອນຖໍ້າເງິນດີໃຈດີໃຈທີ່ຈະໄດ້ເຮັດນາແຊງ

 ປະຊາຊົນຄຸ້ມດອນຖໍ້າເງິນ ຫຼືວ່າບ້ານດອນຖໍ້າເງິນໃນເມື່ອກ່ອນທີ່ຂຶ້ນກັບ ເມືອງໄຊພູທອງ ແຂວງສະຫວັນນະເຂດ ຕ່າງກໍ່ມີຄວາມພາກພູມໃຈທີ່ຈະໄດ້ເຮັດນາແຊງຢ່າງສະດວກສະບາຍໃນອີກປີຂ້າງໜ້າຊຶ່ງພາຍຫຼັງທີ່ມີໂຄງການປັບປຸງ-ຍົກລະດັບລະບົບຊົນລະປະທານຄັນທະຈານຊຶ່ງເປັນໂຄງການພັດທະນາໂຄງລ່າງພື້ນຖານກະສິກໍາຕາມແລວເສດຖະກິດຕາເວັນອອກ-ຕາເວັນຕົກ ໂດຍໂຄງການດັ່ງກ່າວໄດ້ຖືກຈັດຕັ້ງປະຕິບັດຢູ່ຄຸ້ມດອນຖໍ້າເງິນທີ່ມີປະຊາຊົນທໍາມາຫາກິນ ແລະ ດໍາລົງຊີວິດຈໍານວນ 56 ຄອບຄົວ, 42 ຫຼັງຄາເຮືອນ, ມີພົນລະເມືອງ 240 ກວ່າຄົນ ໂດຍບໍລິເວນດອນຖໍ້າເງິນທີ່ເປັນດອນກາງແມ່ນໍ້າຂອງມີລວງກວ້າງດອນປະມານເກືອບ 2.000 ແມັດ ແລະຍາວປະມານ 4.200 ແມັດ ໂດຍປະຊາຊົນເຂດນີ້ຢຶດຖືເອົາການປູກ-ການລ້ຽງໃນນີ້ເນື້ອທີ່ນາປີ 74 ເຮັກຕາ.

ຕາມການໃຫ້ສໍາພາດຂອງບໍລິສັດ ຈະເລີນໄຊກໍ່ສ້າງ-ສ້ອມແປງຊົນລະປະທານໃຫ້ຮູ້ວ່າ: ບໍລິສັດຂອງຕົນໄດ້ທໍາການປັບປຸງ-ກໍ່ສ້າງລະບົບຊົນລະປະທານຄັນທະຈານ ແລະໄດ້ຂະຫຍາຍການກໍ່ສ້າງມາຮອດຄຸ້ມດອນຖໍ້າເງິນຕື່ມອີກຊຶ່ງໂຄງການດັ່ງກ່າວເປັນຈັກສູບນໍ້າແບບເຮືອນແພຊຶ່ງປະກອບມີຈັກສູບນໍ້າ 2 ຊຸດ ທີ່ມີປະສິດທິພາບດູດສົ່ງນໍ້າຂອງຂຶ້ນໃສ່ເນື້ອທີ່ການຜະລິດໄດ້ບໍ່ຫຼຸດ 120 ລິດຕໍ່ວິນາທີ ໂດຍໃຊ້ກໍາລັງມໍເຕີໄຟຟ້າ N-45KW-380V-50HZ ຊຶ່ງໄດ້ກໍ່ສ້າງເຮືອນຈັກສູບນໍ້າ, ຈັດຊື້ ແລະ ຕິດຕັ້ງຈັກສູບນໍ້າ, ວາງທໍ່ສົ່ງນໍ້າ ແລະກໍ່ສ້າງອ່າງຜ່ອນຈາກນັ້ນກໍ່ໄດ້ທໍາການສ້າງຄອງເໝືອງ 4 ເສັ້ນຍາວ 2.775 ແມັດ ແລະທໍ່ສົ່ງນໍ້າ 350 ແມັດ ໃນນີ້ມີຄອງເໝືອງແມ່ທີ່ເປັນເບຕົງຈໍານວນ 1 ເສັ້ນຍາວ 875 ແມັດ ແລະຄອງເໝືອງຂັ້ນສາມມີ 3 ເສັ້ນຍາວ 1900 ແມັດ, ສາມາດສະໜອງນໍ້າໃນການຜະລິດນາແຊງເກືອບ 70 ກວ່າ ເຮັກຕາ, ປະຈຸບັນການກໍ່ສ້າງສໍາເລັດໄປແລ້ວ 45%.

  ເພື່ອເປັນການຊຸກຍູ້ການຜະລິດຂອງປະຊາຊົນໃນເຂດຄຸ້ມດອນຖໍ້າເງິນໃນທ້າຍເດືອນກໍລະກົດແລ້ວນີ້, ທ່ານເຈົ້າແຂວງສະຫວັນນະເຂດ ສັນຕິພາບ ພົມວິຫານ ພ້ອມການນໍາພະແນກກະສິກໍາ ແລະປ່າໄມ້ແຂວງ, ອຸດສາຫະກໍາ-ການຄ້າ,ປກສ ແຂວງ, ຫ້ອງວ່າການປົກຄອງແຂວງແລະການນໍາຂອງເມືອງໄຊພູທອງໂດຍທ່ານເຈົ້າເມືອງກໍ່ໄດ້ຮ່ວມກັນລົງເບິ່ງ ແລະ ຕິດຕາມການຜະລິດທັງໃຫ້ກໍາລັງໃຈປະຊາຊົນຊຶ່ງທ່ານເຈົ້າແຂວງກໍ່ໄດ້ພົບປະໂອ້ລົມກັບອໍານາດການປົກຄອງ ແລະ ປະຊາຊົນທີ່ມາໃຫ້ການຕ້ອນຮັບອັນສໍາຄັນແມ່ນທ່ານເຈົ້າແຂວງໄດ້ແນະນໍາໃຫ້ປະຊາຊົນໄດ້ພ້ອມກັນຮ່ວມແຮງຮ່ວມໃຈສ້າງຄວາມສາມັກຄີເປັນປຶກແຜ່ນມີຄວາມຫ້າວຫັນໃນການຕ້ານປາກົດ ການຫຍໍ້ທໍ້ຕ່າງໆ ສຸມໃສ່ໃນການຜະລິດໃຫ້ຫຼາຍ ແລະ ອີກບໍ່ນານໃກ້ນີ້ກໍ່ຈະໄດ້ເຮັດນາແຊງຕື່ມອີກອັນເປັນການເພີ່ມລາຍໄດ້ໃຫ້ປະຊາຊົນຕື່ມອີກຊີວິດການເປັນຢູ່ກໍ່ຈະດີຂຶ້ນ.

แชร์