ເຊກອງ ຖືການຜະລິດເປັນສິນຄ້າສ້າງເສດຖະກິດສ້າງລາຍຮັບປະຊາຊົນ

 ໃນໄລຍະ 5 ປີຜ່ານມາແຂວງເຊກອງໄດ້ຍົກສູງປັບປຸງຊີວິດການເປັນຢູ່ຂອງປະຊາຊົນດ້ວຍການຊຸກຍູ້ຢ່າງແຂງແຮງໃນການພັດທະນາເສດຖະກິດໂດຍຖືເອົາການຜະລິດເປັນສິນຄ້າ, ສົ່ງເສີມຫົວຄິດປະດິດສ້າງຂອງປະຊາຊົນ, ປຸກລະດົມແນວຄວາມຄິດເພີ່ງຕົນເອງ, ກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງເພື່ອແນໃສ່ໃຫ້ເສດຖະ ກິດຂະຫຍາຍຕົວໄດ້ຢ່າງຕໍ່ເນື່ອງເປັນການສ້າງລາຍຮັບທີ່ຍືນຍົງແກ້ປະຊາຊົນໄປພ້ອມກັບດ້ານຕ່າງໆ.

   ຕາມການເປີດເຜີຍຂອງທ່ານ ເຫຼັກໄຫຼ ສີວິໄລ ເລຂາພັກແຂວງເຊກອງຮູ້ວ່າ: 5 ປີ ຜ່ານມາແຂວງເຊກອງໄດ້ມີຜົນງານຫຼາຍດ້ານສຳລັບການພັດທະນາເສດຖະກິດ ໂດຍໄດ້ຍົກສູງປັບປຸງຊີວິດການເປັນຢູ່ຂອງປະຊາຊົນດ້ວຍການຊຸກຍູ້ຢ່າງແຂງແຮງໃນການພັດທະນາເສດຖະກິດ-ສັງຄົມ ຖືເອົາການຊຸກຍູ້ການຜະລິດເປັນສິນຄ້າ, ສົ່ງ ເສີມຫົວຄິດປະດິດສ້າງຂອງປະຊາຊົນ, ປຸກລະດົມແນວຄິດເພິ່ງຕົນເອງ, ກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງແນໃສ່ເຮັດໃຫ້ເສດຖະກິດຂະຫຍາຍຕົວຢ່າງຕໍ່ເນື່ອງໄປພ້ອມກັບດ້ານຕ່າງໆເປັນຕົ້ນວຽກງານກະສິກຳ ແລະປ່າໄມ້.

  ການຜະລິດສະບຽງອາຫານທົ່ວແຂວງມີເນື້ອທີ່ປູກຝັງທັງໝົດ 23.159 ເຮັກຕາກວມເອົາ 15,48% ຂອງເນື້ອທີ່ກະສິກໍາທັງໝົດ, ໃນ 5 ປີຜ່ານມາສາມາດຜະລິດເຂົ້າໄດ້ 2 ແສນກວ່າໂຕນ ແລະສະເພາະໃນປີ 2020 ຜະລິດເຂົ້າໄດ້ 42 ພັນກວ່າໂຕນ, ສະເລ່ຍເຂົ້າເປືອກໃສ່ຫົວຄົນປະມານ 350-400 ກິໂລຕໍ່ ຄົນຕໍ່ປີ, ຂະຫຍາຍ ແລະປັບປຸງຊົນລະປະທານທັງໝົດ 158 ແຫ່ງ, ຊຸກຍູ້ສົ່ງເສີມການລ້ຽງສັດ-ການປູກພືດເປັນສິນຄ້າຕາມທ່າແຮງຂອງແຕ່ລະທ້ອງຖິ່ນເພື່ອສ້າງວຽກເຮັດງານທໍາ ແລະລາຍໄດ້ທີ່ໝັ້ນຄົງໃຫ້ປະຊາຊົນ.

  ໄປພ້ອມໆກັນບັນດາຫ້າງຮ້ານ-ຫົວໜ່ວຍທຸລະກິດຕ່າງໆໄດ້ຮັບການຄຸ້ມຄອງ ແລະກວດກາປົກກະຕິ, ການພັດທະນາພື້ນຖານໂຄງລ່າງໄດ້ຮັບການປັບປຸງ ແລະກໍ່ສ້າງໃໝ່ຫຼາຍໂຄງການ, ໂດຍປະຈຸບັນທົ່ວແຂວງມີເສັ້ນທາງເຂົ້າເຖິງບ້ານແລ້ວ 195 ບ້ານກວມເອົາ 98,98% ຂອງບ້ານທັງໝົດ, ການກໍ່ສ້າງອາຄານສະຖານທີ່ພັກອາ ໄສຂອງລັດຖະການ ແລະປະຊາຊົນເພີ່ມຂຶ້ນໃນແຕ່ລະປີ, ລະບົບສື່ສານຂໍ້ມູນກວມພື້ນທີ່ຂອງແຂວງ 90%, ໄດ້ຂະຫຍາຍໄຟຟ້າເຂົ້າຫາບ້ານໃນທົ່ວແຂວງ ແລະຂົງເຂດອື່ນໆກໍມີທ່າຂະຫຍາຍຕົວ.

  ແນວໃດກໍດີສຳລັບແຜນການພັດທະນາເສດຖະກິດ-ສັງຄົມ 5 ປີ 2021-2025 ທ່ານ ເຫຼັກໄຫຼ ສີວິໄລ ກ່າວຕື່ມວ່າ: ແຂວງໄດ້ຕັ້ງເປົ້າໝາຍເຮັດໃຫ້ເສດຖະກິດຂະຫຍາຍຕົວ 7% ຕໍ່ປີ ແລະຮອດປີ 2025 ລວມຍອດຜະລິດຕະພັນພາຍໃນ GDP ບັນລຸໄດ້ 2.821 ຕື້ກີບ, ດ້ວຍອັດຕາລາຍໄດ້ສະເລ່ຍ 20,7 ລ້ານກີບ ຫຼືປະ ມານ 2.300 ໂດລາຕໍ່ຄົນຕໍ່ປີໃນນັ້ນຜະລິດຕະພັນກະສິກໍາ-ປ່າໄມ້ເພີ່ມຂຶ້ນ 7% ກວມເອົາ 41,7%; ອຸດສາຫະກໍາເພີ່ມຂຶ້ນ 9,8% ກວມເອົາ 26,0% ແລະການບໍລິການເພີ່ມຂຶ້ນ 5% ກວມເອົາ 32,4% ຂອງ GDP.

------------

ຂ່າວ: ສັນຍາ

ຮູບພາບ: ໜັງສືພິມເສດຖະກິດ-ສັງຄົມ

แชร์