ກາງປີ ນວ ມີລົດໃໝ່ຂື້ນທະບຽນ 22 ພັນກວ່າຄັນ ເກັບລາຍຮັບໄດ້ 10 ຕື້ກວ່າກີບ

  ກອງຄຸ້ມຄອງພາຫະນະ ແລະການຂັບຂີ່ນະຄອນຫຼວງວຽງຈັນແມ່ນໄດ້ເອົາໃຈໃສ່ປະຕິບັດໜ້າທີ່ວຽກງານຂອງຕົນຂະນະທີ່ ຊຶ່ງ 6 ເດືອນຕົ້ນປີມີລົດມາຂຶ້ນທະບຽນທັງ ໝົດຈຳນວນ 22.552 ຄັນ, ສາມາດເກັບລາຍຮັບໄດ້ທັງໝົດ 10 ຕື້ກວ່າກີບ ທຽບແຜນການໄດ້ 38,5% ຖ້າທຽບໃສ່ປີ 2019 ຫຼຸດລົງ.

  ທ່ານ ບຸນປອນ ບຸນສົມຫວັງ ຫົວໜ້າກອງຄຸ້ມຄອງພາຫະນະ ແລະການຂັບຂີ່ນະຄອນຫຼວງວຽງຈັນໃຫ້ສຳພາດນັກຂ່າວໜັງສືພິມເສດຖະກິດ-ສັງຄົມຮູ້ວ່າ: ໄລຍະ 6 ເດືອນຜ່ານມາທາງກອງແມ່ນໄດ້ສຸມໃສ່ທິດຊີ້ນຳຂອງນະຄອນຫຼວງໃນການແກ້ໄຂບັນຫາຕາມທິດ 3 ຫຼຸດ 3 ເພີ່ມ ໂດຍສະເພາະແມ່ນຫຼຸດຜ່ອນອຸບັດເຫດຕາມທ້ອງຖະໜົນໂດຍການຮັບປະກັນການກວດກາເຕັກນິກພາຫະນະໃຫ້ໄດ້ຕາມມາດຕະຖານເພີ່ມຄວາມຮັບຜິດຊອບທາງດ້ານການເມືອງຂອງສະມາຊິກພັກ-ພະນັກງານລັດ ຖະກອນ ແລະເພີ່ມຄວາມສາມາດໃນການເກັບລາຍຮັບໃຫ້ໄດ້ຕາມແຜນການ, ຫັນເອົາມະຕິກອງປະຊຸມໃຫຍ່ຄັ້ງທີ VI ຂອງອົງຄະນະພັກ ແລະແຜນພັດທະນາເສດ ຖະກິດ-ສັງຄົມຂອງນະຄອນຫຼວງວຽງຈັນ, ມະຕິຄຳສັ່ງ, ຄຳແນະນຳຂອງລັດມາສ້າງເປັນແຜນການ, ໂຄງການເພື່ອປັບປຸງ ແລະຍົກລະດັບຄຸນນະພາບຂອງວຽກວິຊາສະເພາະໃນການບໍລິການຂຶ້ນທະບຽນ,ກວດກາເຕັກນິກ ແລະສອບເສັງການຂັບຂີ່ໄດ້ດັ່ງນີ້: ໄດ້ຂະຫຍາຍການບໍລິການໄປສູ່ບັນດາເມືອງທີ່ຫ່າງໄກໂດຍໄດ້ໄປສ້າງຕັ້ງສາຂາກອງຄຸ້ມຄອງພາຫະນະ ແລະການຂັບຂີ່ຢູ່ເມືອງນາຊາຍທອງເພື່ອບໍລິການຂຶ້ນທະບຽນ, ສອບເສັງການຂັບຂີ່ໃຫ້ປະຊາຊົນໄດ້ສະດວກສະບາຍຂຶ້ນຊຶ່ງເປີດໃຫ້ບໍລິການແຕ່ວັນທີ 6 ມັງກອນ 2020 ເປັນຕົ້ນມາ.

  ສຳເລັດການສ້າງຕັ້ງສູນຝຶກລົດລາກຊຶ່ງເປັນແຫ່ງທຳອິດຂອງ ສປປ ລາວ ສູນແຫ່ງນີ້ຈະໄດ້ສຳເລັດການສ້າງຕັ້ງສູນຝຶກລົດລາກ (E1) ຊຶ່ງຈະອຳນວຍຄວາມສະດວກໃຫ້ຜູ້ຂັບຂີ່ສາມາດຂັບລົດຂົນສົ່ງເຂົ້າໄປປະເທດອ້ອມຂ້າງທີ່ມີສັນຍາ ແລະອະນຸສັນຍາເພື່ອເປັນການຍົກລະດັບຄວາມຮູ້ຄວາມສາມາດໃຫ້ນັກຂັບຂີ່ລາວເຮົາ,ທາງດ້ານຂໍ້ມູນຂ່າວສານແມ່ນໄດ້ເຊື່ອມໂຍງຂໍ້ມູນພາຫະນະ ແລະທັງໝົດທົ່ວປະເທດ,ຊຶ່ງສາມາດກວດສອບຂໍ້ມູນໄດ້ລະຫວ່າງແຂວງຕໍ່ແຂວງ, ກະຊວງ ຍທຂ, ພະແນກ ຍທຂ ປະຈຳ ແຂວງແລະພາກສ່ວນຕຳຫຼວດ, ສາມາດອຳນວຍຄວາມສະດວກໃຫ້ແກ່ການກວດກາພາຫະນະຂອງເຈົ້າໜ້າທີ່ໄດ້ໄວຂຶ້ນ.

  ວຽກງານຄຸ້ມຄອງຍານພາຫະນະສາມາດຂຶ້ນທະບຽນລົດທຸກປະເພດຮອດ 6 ເດືອນຕົ້ນປີໄດ້ທັງໝົດຈຳນວນ 22.552 ຄັນ, ໂອນຊື່, ຕໍ່ທະບຽນ, ແຈ້ງເສຍຫາຍ 4.190 ເທື່ອຄັນ, ຍົກຍ້າຍສຳນວນໄປຕ່າງແຂວງ 1.539 ເທື່ອຄັນ, ອອກໃບອະນຸຍາດກວດກາເຕັກນິກໄດ້ 41.085 ເທື່ອຄັນ, ວຽກງານຄຸ້ມຄອງການຂັບຂີ່, ໃນໄລຍະ 6 ເດືອນຕົ້ນປີສາມາດສອບເສັງໄດ້ທັງໝົດ 3.132 ຄົນ, ປ່ຽນໃບເກົ່າ, ເສຍຫາຍ, ຕໍ່ອາຍຸໃບ, ຍົກຍ້າຍ 13.420 ໃບ.

  ກອງຄຸ້ມຄອງພາຫະນະສາມາດສ້າງລາຍຮັບໄດ້ທັງໝົດ 10 ຕື້ກວ່າກີບ ມອບພັນທະເຂົ້າງົບປະມານໄດ້ 6 ຕື້ສອງຮ້ອຍລ້ານກວ່າກີບ ທຽບແຜນການໄດ້ 38,5% ຖ້າທຽບໃສ່ປີ 2019 ຖືວ່າຫຼຸດຄາດໝາຍ, ເນື່ອງຈາກສະພາບການລະບາດຂອງພະຍາດອັກເສບປອດ ຫຼືໂຄວິດ-19 ເຮັດໃຫ້ການບໍລິການຂອງພວກເຮົາໄດ້ຢຸດເປັນເວລາ 1 ເດືອນ ເທົ່າກັບວ່າໃນ 6 ເດືອນຕົ້ນປີນີ້ພວກເຮົາແມ່ນໄດ້ເຮັດວຽກແທ້ໆ 5 ເດືອນ.

  ທິດທາງແຜນການໃນຕໍ່ໜ້າສືບຕໍ່ປະຕິບັດໜ້າທີ່ວິຊາສະເພາະຂອງກອງໃນການຂຶ້ນທະບຽນ, ກວດກາເຕັກນິກ ແລະການຮຽນ-ການສອນ ແລະສອບເສັງການຂັບຂີ່ເລັ່ງເກັບລາຍຮັບ ແລະມອບງົບປະມານໃຫ້ໄດ້ຕາມແຜນການສືບຕໍ່ຕິດຕາມ ແລະເຝົ່າລະວັງການລະບາດຂອງພະຍາດໂຄວິດຢ່າງໃກ້ຊິດຈາກຄະນະສະເພາະກິດເພື່ອສາ ມາດຮັບມືໄດ້.

 

แชร์