ທນບ ເປີດສາຂາໃໝ່ຮັບໃຊ້ປະຊາຊົນແຂວງໄຊສົມບູນ

 ທະນາຄານນະໂຍບາຍ (ທນບ) ໄດ້ຈັດຕັ້ງການເປີດ ທນບ ສາຂາໄຊສົມບູນເປັນແຫ່ງທີ 10 ເພື່ອຮັບໃຊ້ປະຊາຊົນຕາມແນວທາງນະໂຍບາຍຂອງພັກ ແລະແຜນພັດທະ ນາເສດຖະກິດ-ສັງຄົມຂອງລັດຖະບານໃນການແກ້ໄຂຄວາມທຸກຍາກ, ຈຸດສຸມພັດທະນາຂອງລັດຖະບານ-ຂອງທ້ອງຖິ່ນ ແລະບ້ານ 3 ສ້າງຊຶ່ງຈັດຂຶ້ນໃນວັນທີ 14 ສິງ ຫາ 2020 ທີ່ເມືອງອານຸວົງ ເທສະບານແຂວງໄຊສົມບູນພາຍໃຕ້ການເປັນປະທານຮ່ວມຂອງທ່ານ ສອນໄຊ ສິດພະໄຊ ກຳມະການສຳຮອງສູນກາງພັກ, ເລຂາຄະນະ ພັກ, ຜູ້ວ່າການທະນາຄານແຫ່ງ ສປປ ລາວ (ທຫລ) ແລະ ທ່ານ ພົນຕີ ຄຳລຽງ ອຸທະໄກສອນ ເລຂາຄະນະພັກແຂວງ, ເຈົ້າແຂວງໄຊສົມບູນ, ພ້ອມນີ້ກໍມີຮອງເລຂາຄະນະພັກແຂວງ-ປະທານສະພາປະຊາຊົນແຂວງ, ຮອງເຈົ້າແຂວງໄຊສົມບູນ, ຄະນະກົມຈາກ ທຫລ, ຄະນະອຳນວຍການທະນາຄານທຸລະກິດ-ສະເພາະກິດ, ບັນດາເຈົ້າເມືອງ, ຫົວໜ້າພະແນກການອ້ອມຂ້າງແຂວງ-ເມືອງ ແລະພາກສ່ວນກ່ຽວຂ້ອງເຂົ້າຮ່ວມ.

  ທ່ານ ວຸດທິ ເລື່ອນວິໄລວົງ ຜູ້ອໍານວຍການ ທນບ ໄດ້ລາຍງານສະພາບການເຄື່ອນໄຫວທນບກໍ່ຄືການກະກຽມຄວາມພ້ອມໃນການສ້າງຕັ້ງ ທນບ ສາຂາໄຊສົມບູນຊຶ່ງມີບົດບາດໜ້າທີ່ໃນການປະຕິບັດແນວທາງນະໂບາຍຂອງພັກ-ລັດຖະບານ ໃນການປະກອບສ່ວນແກ້ໄຂຄວາມທຸກຍາກຂອງປະຊາຊົນດ້ວຍການນຳເອົາແຫຼ່ງທຶນດອກເບ້ຍນະໂຍບາຍເພື່ອປ່ອຍສິນເຊື່ອໃຫ້ປະຊາຊົນໃນເມືອງເປົ້າໝາຍ, ຈຸດສຸມຂອງລັດຖະບານ-ທ້ອງຖິ່ນ ແລະ ປະຕິບັດນະໂຍບາຍ 3 ສ້າງ ໂດຍສະເພາະຢູ່ແຂວງໄຊສົມບູນປະ ກອບມີ 5 ໜ່ວຍບໍລິການໃນນີ້ມີເມືອງລ້ອງຊານ, ເມືອງອານຸວົງ, ເມືອງຮົ່ມ, ເມືອງລ້ອງແຈ້ງ ແລະເມືອງທ່າໂທມ ຊຶ່ງປະຈຸບັນມີພະນັກງານທັງໝົດ 29 ຄົນ, ຍິງ 11 ຄົນ. ທນບ ເລີ່ມເຄື່ອນໄຫວຢູ່ແຂວງດັ່ງກ່າວນັບແຕ່ປີ 2008 ເປັນຕົ້ນມາໄດ້ສະໜອງສີນເຊື່ອໃຫ້ແກ່ປະຊາຊົນບັນດາເຜົ່າພາຍໃນແຂວງຈໍານວນເງິນທັງໝົດ 199,73 ຕື້ກີບ ເປັນທຶນໄລຍະສັ້ນ 60,78 ຕື້ກີບ, ໄລຍະກາງ 24 ຕື້ກີບ ແລະໄລຍະຍາວ 114,96 ຕື້ກີບ, ມາຮອດເດືອນພຶດສະພາ 2020 ທົ່ວແຂວງໄຊສົມບູນມີຍອດສີນເຊື່ອທັງໝົດ 60,07 ຕື້ກີບ ສາມາດເຂົ້າເຖິງ 5 ເມືອງ, 87 ບ້ານ ເທົ່າກັບ 97,75% (ຂອງບ້ານທັງໝົດ 89 ບ້ານ,ຍັງ 2 ບ້ານບໍ່ທັນເຂົ້າເຖິງ), ບ້ານທຸກຍາກເຂົ້າເຖິງ 75% ຂອງບ້ານທຸກຍາກ, ມີ 1.046 ກຸ່ມກູ້ຢືມເງິນກວມ 53% ຂອງຈຳນວນຄອບຄົວທັງໝົດ, ມີລາຍບຸກຄົນ 63 ຄົນ, ຄອບຄົວທຸກຍາກເຂົ້າ ເຖິງສິນເຊື່ອ 1.384 ຄອບຄົວ.

    ຜ່ານການເຄື່ອນໄຫວປະກອບສ່ວນສະໜອງສິນເຊື່ອຂອງ ທນບ ຜ່ານມາເຮັດໃຫ້ປະຊາຊົນໃນເຂດຊົນນະບົດໃນກຸ່ມເປົ້າໝາຍມີທຶນທຳການຜະລິດສ້າງລາຍຮັບໃຫ້ຄອບຄົວເຮັດໃຫ້ຊີວິດການເປັນຢູ່ນັບມື້ດີຂຶ້ນເທື່ອລະກ້າວຊຶ່ງເປັນປະກອບສ່ວນອັນສຳຄັນໃນການແກ້ໄຂຄວາມທຸກຍາກຂອງປະຊາຊົນໃນແຂວງໄຊສົມບູນເຮັດໃຫ້ຈໍານວນເມືອງ, ບ້ານ ແລະຄອບຄົວທຸກຍາກຫຼຸດລົງເທື່ອລະກ້າວ.

  ຈາກນັ້ນ, ທ່ານ ນາງ ໂພທິຈັນ ທໍາມະເທວາ ວ່າການຫົວໜ້າກົມຄຸ້ມຄອງທະນາຄານທຸລະກິດ ທຫລ ກໍ່ໄດ້ອ່ານໃບອະນຸຍາດຂອງທະນາຄານແຫ່ງ ສປປ ລາວ ໃນການສ້າງຕັ້ງ ທນບ ໄຊສົມບູນຢ່າງເປັນທາງການຊຶ່ງເປັນການຍົກລະດັບການເຄື່ອນໄຫວຂອງທະນາຄານດັ່ງກ່າວສູງຂຶ້ນກວ່າເກົ່າ ແລະກໍ່ເປັນທະນາຄານແຫ່ງທຳອິດຂອງແຂວງໄຊສົມບູນທີ່ໄດ້ຮັບການສ້າງຕັ້ງເປັນສາຂາ.

  ທ່ານຜູ້ວ່າການ ທຫລ ເນັ້ນໃຫ້ພະນັກງານທນບຈົ່ງສູ້ຊົນປະຕິບັດທິດທາງໜ້າທີ່ຈຸດສຸມໃນການສະໜອງແຫຼ່ງທຶນປະກອບສ່ວນໃນການແກ້ໄຂຄວາມທຸກຍາກຂອງປະ ຊາຊົນຢູ່ແຂວງໄຊສົມບູນໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ, ເພີ່ມການຮ່ວມມືກັບອຳນາດການປົກຄອງທ້ອງຖິ່ນທຸກຂັ້ນ ແລະ ຂະແໜງການໃນການສະ ໜອງແຫຼ່ງທຶນນະໂຍບາຍຂອງລັດຖະບານຕິດພັນກັບແຜນພັດທະນາເສດຖະກິດ-ສັງຄົມຂອງແຂວງ, ຂອງເມືອງ, ບັນດາຈຸດສຸມພັດທະນາຂອງລັດຖະບານຂອງທ້ອງ ຖິ່ນ ແລະບັນດາບ້ານ 3 ສ້າງໃຫ້ນັບມື້ມີປະສິດທິຜົນສູງ, ເພີ່ມຄົ້ນຄວ້າກຳແໜ້ນແນວທາງຂອງພັກ, ນະໂຍບາຍຂອງລັດ,ບັນດາມະຕິຄຳສັ່ງຂອງຂັ້ນເທິງ,ລະບຽບ, ກົດ ໝາຍ,ເອົາໃຈໃສ່ປັບປຸງແກ້ໄຂຂໍ້ຄົງຄ້າງໃນຜ່ານມາໂດຍສະເພາະຂໍໃຫ້ອົງການປົກຄອງຂັ້ນຕ່າງໆໃຫ້ການຮ່ວມມືໃນວຽກງານສະໜອງແຫຼ່ງທຶນ ແລະຕ້ອງມີຄຸນນະພາບ, ປະສິດທິຜົນ ແລະມີການຄຸ້ມຄອງ, ຊຸກຍູ້ປະຊາຊົນສາມາດນໍາຜົນຜະລິດສູ່ສັງຄົມ ແລະຄືນເງິນແກ່ທະນາຄານເພື່ອຈະນໍາແຫຼ່ງທຶນດັ່ງກ່າວໃຫ້ແກ່ຄົນອື່ນຕໍ່ໄປ.

  ທ່ານເຈົ້າແຂວງໄຊສົມບູນໄດ້ກ່າວວ່າ: ແຂວງໄຊສົມບູນ ເປັນແຂວງຕັ້ງໃໝ່, ເສດຖະກິດຍັງອ່ອນນ້ອຍ, ມີປະຊາຊົນທຸກຍາກ4.397 ຄອບຄົວຊຶ່ງມີຄວາມຕ້ອງການແຫຼ່ງທຶນຈໍານວນຫຼາຍສົມຄວນ ແລະໃນຜ່ານມາຄະນະປະຈໍາພັກແຂວງໄດ້ເພີ່ມທະວີການແກ້ໄຂຄວາມທຸກຍາກເປັນບັນຫາສໍາຄັນຮີບດ່ວນ, ເປັນຕັບບີ, ເປັນໜ້າທີ່ການເມືອງຂອງຄະນະພັກ-ອໍານາດການປົກຄອງທຸກຂັ້ນໂດຍໄດ້ແຕ່ງຕັ້ງທ່ານຮອງເຈົ້າແຂວງເປັນຫົວໜ້າຄະນະ ແລະມີພະແນກການ-ຂະແໜງການກ່ຽວຂ້ອງເຂົ້າຮ່ວມແນ ໃສ່ເຮັດໃຫ້ເສດຖະກິດມີການຂະຫຍາຍຕົວ, ເຮັດໃຫ້ຄອບຄົວທຸກຍາກຫຼຸດລົງເທື່ອລະກ້າວ, ສະເໜີໃຫ້ ທນບ ເພີ່ມການນໍາໃຊ້ແຫຼ່ງທຶນເຂົ້າເຖິງປະຊາຊົນໃຫ້ຖືກເປົ້າ ໝາຍ ແລະມີປະສິດທິຜົນສູງ, ເພີ່ມການສະໜອງແຫຼ່ງທຶນສິນເຊື່ອໃຫ້ແກ່ປະຊາຊົນບັນດາເຜົ່າຢູ່ 5 ເມືອງຕິດພັນກັບແຜນພັດທະນາເສດຖະກິດສັງຄົມຂອງແຂວງ, ຂອງເມືອງປະກອບສ່ວນແກ້ໄຂຄວາມທຸກຍາກຂອງປະຊາຊົນໃຫ້ບັນລຸຕາມຄາດໝາຍທີ່ກຳນົດໄວ້ເນື່ອງຈາກວ່າບ້ານທຸກຍາກ, ຄອບຄົວທຸກຍາກຂອງແຂວງຍັງກວມອັດ ຕາສ່ວນສູງ.

---------------

ຂ່າວ: ຣັດສະໝີ ດວງສັດຈະ

ຮູບພາບ: ໜັງສືພິມເສດຖະກິດ-ສັງຄົມ

แชร์