ໂຮມຊຸມນຸມສະຫຼອງວັນສື່ມວນຊົນ ແລະການພິມຈໍາໜ່າຍຄົບຮອບ 70 ປີ

  ໃນວັນທີ 14 ສິງຫາ 2020 ທີ່ ນະຄອນຫຼວງວຽງຈັນ ກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວ (ຖວທ) ໄດ້ຈັດພິທີໂຮມຊຸມນຸມເພື່ອສະເຫຼີມສະຫຼອງວັນສື່ມວນຊົນ ແລະການພິມຈໍາໜ່າຍຄົບຮອບ 70 ປີ (13/8/ 1950-13/8/2020)ໃຫ້ກຽດເຂົ້າຮ່ວມຂອງທ່ານ ທອງລຸນ ສີສຸລິດ ນາຍົກລັດຖະມົນຕີ, ທ່ານ ກິແກ້ວ ໄຂຄໍາພິທູນ ລັດຖະມົນຕີກະຊວງ ຖວທ; ມີຄະນະນໍາກະຊວງ ຖວທ, ກົມ-ກອງວິຊາການ, ພະນັກງານສື່ມວນຊົນ-ການພິມຈໍາໜ່າຍທັງພາກລັດ, ເອກະຊົນ ແລະແຂກຖືກເຊີນເຂົ້າຮ່ວມ.


   ທ່ານ ກິແກ້ວ ໄຂຄໍາພິທູນ ໄດ້ຍົກໃຫ້ເຫັນວ່າ: ໃນທ່າມກາງບັນຍາກາດທີ່ທົ່ວພັກ, ທົ່ວລັດ, ທົ່ວກໍາລັງປະກອບອາວຸດ ແລະທົ່ວປວງຊົນລາວບັນດາເຜົ່າພວມພ້ອມກັນຕັ້ງຫນ້າຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກ, ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີຄັ້ງທີ VIII ກໍຄືກອງປະຊຸມ 3 ຂັ້ນຢ່າງເປັນຂະບວນຟົດຟື້ນໂດຍສະເພາະໃນຂົງເຂດວຽກງານ ຖວທ ກໍພວມຂຸ້ນຂ້ຽວກະກຽມກອງປະຊຸມໃຫຍ່ສະໄຫມທີ V ຂອງອົງຄະນະພັກກະຊວງ ຖວທ ຊຶ່ງຈະໄຂຂຶ້ນໃນຕໍ່ຫນ້ານີ້ໃຫ້ບັນລຸຕາມຄາດຫມາຍທີ່ວາງໄວ້, ມື້ນີ້ເປັນມື້ຫນຶ່ງທີ່ເຕັມໄປດ້ວຍຄວາມຫມາຍຄວາມສໍາຄັນທາງດ້ານປະຫວັດສາດທີ່ຫນັກແຫນ້ນເພື່ອພ້ອມກັນລະນຶກ 70 ປີວັນສື່ມວນຊົນ ແລະພິມຈໍາຫນ່າຍທີ່ໄດ້ປະກອບສ່ວນໃນຂະບວນການປະຕິບັດພາລະກິດການຕໍ່ສູ້ປົດປ່ອຍປະເທດຊາດໃນແຕ່ລະໄລຍະນັບແຕ່ວັນທີ 13 ສິງຫາ 1950 ຈົນເຖິງປະຈຸບັນກໍຄືໄລຍະສ້າງສາ ແລະພັດທະນາປະເທດຊາດ”.


  ໂອກາດດຽວກັນ, ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີກະຊວງ ຖວທ ກໍໄດ້ຂຶ້ນລາຍງານຕໍ່ພິທີໂຮມຊຸມນຸມໂດຍທ່ານໄດ້ຍົກໃຫ້ເຫັນມູນເຊື້ອແຫ່ງການກໍາເນີດ ແລະເຕີບໃຫຍ່ຂະຫຍາຍຕົວຂອງສື່ມວນຊົນ ແລະການພິມຈໍາໜ່າຍຕະຫລອດໄລຍະ 70 ປີຜ່ານມາຊຶ່ງໄດ້ມີຫລາຍຜົນງານອັນພົ້ນເດັ່ນໃນການປະກອບສ່ວນໃນພາລະກິດຕໍ່ສູ້ປົດປ່ອຍຊາດ; ປົກປັກຮັກສາ ແລະສ້າງສາພັດທະນາປະເທດຊາດ, ໃນໄລຍະໃໝ່ສື່ມວນຊົນ ແລະການພິມຈໍາໜ່າຍລາວຍັງສາມາດຮັກສາບົດບາດການເປັນກະບອກສຽງອັນແຫຼມຄົມຂອງພັກ-ລັດ, ເປັນຜູ້ແນະນໍາ ແລະສ້າງຄວາມເຂົ້າໃຈທີ່ຖືກຕ້ອງໂດຍໄດ້ຮັບຄວາມເຊື່ອຖືໃນການສະຫນອງຂໍ້ມູນຂ່າວສານ, ສາລະຄວາມຮູ້, ສາລະບັນເທີງໃຫ້ແກ່ເປົ້າໝາຍຂອງຕົນ, ທັງສາມາດເຊື່ອມຕໍ່ຂໍ້ມູນຂ່າວສານໃນພາກພື້ນ ແລະສາກົນ.
 ຈາກນັ້ນກໍໄດ້ມີພິທີມອບລາງວັນໂດຍທ່ານ ກິແກ້ວ ໄຂຄໍາພິທູນ ລັດຖະມົນຕີກະຊວງ ຖວທ ໄດ້ໃຫ້ກຽດຂຶ້ນມອບລາງວັນແກ່ບັນດາອົງການສື່ມວນຊົນ ແລະການພິມຈໍາໜ່າຍທີ່ມີຜົນງານດີເດັ່ນໃນການປະກອບສ່ວນເຂົ້າໃນໂຄສະນາຕ້ານໄພພິບັດລະດັບຊາດໃນໄລຍະຜ່ານມາ.


  ໃນໂອກາດເຂົ້າຮ່ວມພິທີໂຮມຊຸມນຸມຄັ້ງນີ້ ທ່ານ ທອງລຸນ ສີສຸລິດ ຍັງໄດ້ມີຄຳເຫັນໂອ້ລົມໂດຍສະແດງຄວາມຍ້ອງຍໍຊົມເຊີຍຕໍ່ບັນດານັກຮົບສື່ມວນຊົນ ແລະການພິມຈໍາໜ່າຍທຸກພາກສ່ວນທີ່ໄດ້ອຸທິດເຫື່ອແຮງສະຕິປັນຍາເຮັດສໍາເລັດພາລະກິດທີ່ມີກຽດສະຫງ່າຂອງຕົນ, ພ້ອມທັງສະແດງຄວາມຊົມເຊີຍຕໍ່ສື່ມວນຊົນລາວທີ່ໄດ້ມີການພັດ ທະນາໄປຢ່າງບໍ່ຢຸດຢັ້ງ,ເວລາໃດກໍເປັນກະບອກສຽງອັນແຫຼມຄົມໃຫ້ແກ່ພັກ ແລະລັດຖະບານຢ່າງຫ້າວຫັນ, ຢູ່ຄຽງບ່າຄຽງໄຫລ່ໃນພາລະກິດທີ່ສຳຄັນຂອງຊາດບໍ່ວ່າຈະຢູ່ໃນໄລຍະຕໍ່ສູ້ກູ້ຊາດກໍຄືໃນໄລຍະສ້າງສາພັດທະນາປະເທດຊາດຈົນເຖິງປະຈຸບັນ,ພ້ອມນັ້ນທ່ານນາຍົກຍັງໄດ້ເນັ້ນໜັກໃຫ້ສື່ມວນຊົນ ແລະການພິມຈໍາໜ່າຍສືບຕໍ່ເອົາໃຈໃສ່ວຽກງານທີ່ສໍາຄັນຈໍານວນໜຶ່ງເພື່ອພ້ອມກັນເຮັດສໍາເລັດໜ້າທີ່ການເມືອງກໍຄືຄວາມຮຽກຮ້ອງຕ້ອງການຂອງການພັດທະນາໃນໄລຍະໃໝ່, ພ້ອມທັງໃຫ້ສື່ມວນຊົນທຸກຂະແໜງການປັບປຸງເນື້ອໃນຂ່າວໃຫ້ມີຄວາມຫຼາກຫຼາຍ, ສອດຄ່ອງກັບສະພາບການປ່ຽນແປງໃໜ່ໂດຍສະເພາະໃນຍຸກສື່ສັງຄົມອອນລາຍ, ທີ່ສຳຄັນແມ່ນໃຫ້ປັບປຸງວິຖີການດຳລົງຊີວິດແບບໃໝ່ເພື່ອເຮັດໃຫ້ການປະຕິບັດວຽກງານສື່ມວນຊົນໄດ້ຮັບການພັດທະນາ ແລະເຕີບໃຫຍ່ເຂັ້ມແຂງຂຶ້ນໄປເລື້ອຍໆ.

----------------

--------------

 #ຫນັງສືພິມເສດຖະກິດສັງຄົມ

แชร์