ຫຼວງພະບາງ ໃຊ້ງົບປະມານ 1 ຕື້ກວ່າກີບ ປັບປຸງແຫຼ່ງທ່ອງທ່ຽວຕາດກວາງຊີ ແລະພູສີ

  ແຂວງຫຼວງພະບາງໃຊ້ງົບປະມານ 1 ຕື້ກວ່າກີບ ປັບປຸງແຫຼ່ງທ່ອງທ່ຽວນໍ້າຕົກຕາດກວາງຊີ ແລະພູສີເພື່ອແນໃສ່ໃນການອານຸລັກແບບຍືນຍົງ ແລະການອໍານວຍຄວາມສະດວກໄວ້ຮອງຮັບແກ່ນັກທ່ອງທ່ຽວຊຶ່ງລວມມີທັງໝົດ 8 ກິດຈະກໍາ ໂດຍແມ່ນບໍລິສັດ ສີສະນະ ກໍ່ສ້າງ ເປັນຜູ້ຮັບເໝົາກໍ່ສ້າງໄລຍະການກໍ່ສ້າງ 1 ປີ ໄດ້ເລີ່ມລົງມືກໍ່ ສ້າງແຕ່ວັນທີ 8 ສິງຫາ 2020 ຫາວັນທີ 8 ສິງຫາ 2021 ຈະໃຫ້ສໍາເລັດ.


   ທ່ານ ນາງ ສຸດາພອນ ຄົມທະວົງ ຫົວໜ້າພະແນກ ຖວທ ແຂວງຫຼວງພະບາງໃຫ້ສໍາພາດຕໍ່ທິມຂ່າວພວກເຮົາວ່າ: ການປັບປຸງສະຖານທີ່ແຫຼ່ງທ່ອງທ່ຽວທັງສອງ ແຫ່ງນີ້ກໍເພື່ອແນໃສ່ໃນການອານຸລັກແບບຍືນຍົງ ແລະການອໍານວຍຄວາມສະດວກໄວ້ຮອງຮັບແກ່ນັກທ່ອງທ່ຽວທັງເປັນການຊຸກຍູ້ການທ່ອງທ່ຽວຂອງແຂວງຫຼວງພະບາງໃຫ້ມີໃບໜ້າອັນໃໝ່ທັງຮັບປະກັນເຮັດໃຫ້ການດຶງດູດນັກທ່ອງທ່ຽວພາຍໃນເຂົ້າທຽວນັບມື້ຫຼາຍຂຶ້ນ ແລະເຮັດໃຫ້ການທ່ອງທ່ຽວແບບລາວທ່ຽວລາວໄດ້ມີບັນຍາກາດທີ່ຄຶກຄື້ນກວ່າເກົ່າສໍາລັບການປັບປຸງແຫຼ່ງທ່ອງທ່ຽວຄັ້ງນີ້ໂດຍໄດ້ຮັບງົບປະມານຈາກແຂວງເພື່ອພັດທະນາສິ່ງອຳນວຍຄວາມສະດວກຢູ່ພາຍໃນອຸທິຍານນໍ້າຕົກຕາດ

ກວາງຊີ ແລະທາດພູສີລວມມີ 8 ກິດຈະກໍາເຊັ່ນ: ປັບປຸງພູມມີທັດບໍລິເວນດອນກ້ອງຂົວ, ປັບປຸງບໍລິເວນອ່າງອາບນໍ້າທີ 3, ກໍ່ສ້າງຮົ້ວກັນຄົນບຸກລຸກ, ປັບປຸງບໍລິເວນພື້ນທາງຍ່າງອ້ອມທາດພູສີ, ເຄື່ອງກວດບັດເຂົ້າຊົມລະບົບບາໂຄດ, ສ້າງທາງຄົນພິການປັບປຸງເນື້ອທີ່ເດີ່ນພາຍໃນຕາດກວາງຊີໃຫ້ກວ້າງຂວາງ ແລະ ມີຄວາມສວຍງາມກວ່າເກົ່າ ແລະປັບປຸງທາງຂຶ້ນຕາດລວມມູນຄ່າທັງໝົດ 1.700 ລ້ານກວ່າກີບ ໂດຍແມ່ນບໍລິສັດ ສີສະນະ ກໍ່ສ້າງ ເປັນຜູ້ຮັບເໝົາກໍ່ສ້າງ ແລະປັບປຸງໄລຍະການກໍ່ສ້າງ 1 ປີ ໂດຍໄດ້ເລີ່ມລົງມືການກໍ່ສ້າງຕັ້ງແຕ່ວັນທີ 8 ສິງຫາ 2020 ຫາວັນທີ 8 ສິງຫາ 2021 ຈະໃຫ້ສໍາເລັດ 100%.


  ທ່ານ ນາງ ສຸດາພອນ ຄົມທະວົງ ໃຫ້ຕື່ມອີກວ່າ: ໃນປີທີ່ຜ່ານມາພະແນກຖະແຫຼງຂ່າວວັດທະນະທຳ ແລະທ່ອງທ່ຽວຍັງໄດ້ຮັບທືນຊ່ວຍເຫຼືອຈາກໂຄງການພັດທະນາພື້ນຖານໂຄງລ່າງເພື່ອການທ່ອງທ່ຽວເຊັ່ນ: ປັບປຸງຫ້ອງນໍ້າສະອາດໃຫ້ໄດ້ມາດຕະຖານອາຊຽນ ແລະ ປະກອບສິ່ງອໍານວຍຄວາມສະດວກຕ່າງໆເຂົ້າໃນການພັດທະນາວຽກງານທ່ອງທ່ຽວຂອງແຂວງຕື່ມອີກ.

--------------

ຂ່າວ: ສີສຸວັນ, ຮູບພາບ: ໜັງສືພິມເສດຖະກິດ-ສັງຄົມ

แชร์