ແຂວງເຊກອງ ເຜີຍແຜ່ກົດໝາຍວ່າດ້ວຍອາຊີວະສຶກສາ

 ວັນທີ 12 ສິງຫາ 2020 ນີ້ທີ່ໂຮງຮຽນເຕັກນິກ-ວິຊາຊີບ ແບບປະສົມແຂວງເຊກອງ ໄດ້ຈັດກອງປະຊຸມການເຜີຍແຜ່ກົດໝາຍ ວ່າດ້ວຍອາຊີວະສຶກສາຂຶ້ນ ໂດຍ ມີທ່ານ ໜູພັນ ອຸດສາ ຫົວໜ້າກົມອາຊີວະສຶກສາກະຊວງສຶກສາທິການ ແລະກີລາ, ທ່ານ ພອນແກ້ວ ຕົ້ນວໍລະຈິດ ຫົວໜ້າກົມໂຄສະນາ ແລະຕີຄວາມໝາຍກົດໝາຍ, ກໍາມາທິການກົດໝາຍສະພາແຫ່ງ ຊາດ, ທ່ານ ຄໍາຜາຍ ສຸນີວັນ ຮອງຫົວໜ້າພະແນກສຶກສາທິການ ແລະ ກີລາແຂວງ; ພ້ອມນີ້ກໍມີຂະແໜງ ການກ່ຽວຂ້ອງອ້ອມຂ້າງແຂວງ ແລະຄູ-ອາຈານພາຍໃນໂຮງຮຽນ ເຂົ້າຮ່ວມ.

  ທ່ານ ໜູພັນ ອຸດສາ ໄດ້ອະທິ ບາຍວ່າ: ກົດໝາຍວ່າດ້ວຍອາ ຊີວະສຶກສາ (ສະບັບປັບປຸງ) ປີ 2019 ປະກອບມີ 17 ໝວດ 14 ພາກ 99 ມາດຕາກົດໝາຍສະບັບນີ້ໄດ້ກຳນົດຫຼັກການ, ລະບຽບການ, ມາດຕະການກ່ຽວກັບການ ຄຸ້ມຄອງ, ການຕິດຕາມກວດກາເພື່ອແນໃສ່ສ້າງ ແລະພັດທະນາກຳລັງແຮງງານລາວໃຫ້ມີຄວາມ ຮູ້ຄວາມສາມາດຕອບສະໜອງ ໄດ້ຄວາມຕ້ອງການຂອງຕະຫຼາດ ແຮງງານທັງພາຍໃນ ແລະຕ່າງ ປະເທດແນໃສ່ໃຫ້ເຂົາເຈົ້າມີວຽກເຮັດງານທໍກ.

    ນອກນັ້ນ, ກົດໝາຍສະບັບນີ້ ຍັງໄດ້ເວົ້າເຖິງບຸກຄະລາກອນ ໂດຍ ເນັ້ນມາດຕະຖານຄູສອນວິຊາຊີບ ຕ້ອງເປັນບຸກຄົນທີ່ມີຫຼັກໝັ້ນ, ທັດສະນະການເມືອງຖືກຕ້ອງ, ມີຄຸນສົມບັດ, ມີຈັນຍາບັນ, ມີມະນຸດສໍາພັນທີ່ດີ, ຮັກອາຊີບຄູ ແລະເປັນ ແບບຢ່າງທີ່ດີໃຫ້ແກ່ຜູ້ຮຽນ, ມີຄວາມຮູ້ມີຄວາມສາມາດທາງດ້ານ ວິຊາສະເພາະ, ມີຄວາມສາມາດ ທາງດ້ານການສຶກສາອົບຮົມ, ການສິດສອນ, ການວັດຜົນ ແລະການປະເມີນຜົນ.

     ຂະນະທີ່ທ່ານ ຄໍາຜາຍ ສຸນີວັນ ກໍໄດ້ມີຄໍາເຫັນວ່າ: ກົດໝາຍອາຊີວະສຶກສາແມ່ນມີຄວາມສໍາຄັນຕໍ່ຂະແໜງການສຶກສາ ຊຶ່ງເປັນບ່ອນ ອີງໃນການພັດທະນາວຽກງານອາ ຊີວະສຶກສາໃຫ້ມີປະສິດທິພາບໄປ ຄຽງຄູ່ກັບການບໍາລຸງຍົກລະດັບ ການສິດສອນຂອງຄູ-ອາຈານໃນ ແຕ່ລະຊັ້ນເພື່ອໃຫ້ກົງກັບວິໄສທັດ ຂອງໂຮງຮຽນຕັ້ງໄວ້ຄື: ສ້າງທຸກ ເງື່ອນໄຂ, ໃສ່ໃຈພັດທະນາ, ສະຖານ ທີ່ສຶກສາດີເດັ່ນ, ເນັ້ນຄຸນນະພາບ.

--------

ໂດຍ: ແວວຕາ

แชร์