ຫົວໜ້າຄະນະກຳມະການເນື້ອໃນກອງປະຊຸມໃຫຍ່ຂອງພັກ ເຄື່ອນໄຫວເຮັດວຽກຢູ່ແຂວງຄຳມ່ວນ

  ທ່ານ ຄຳພັນ ພົມມະທັດ ຫົວໜ້າຄະນະໂຄສະນາອົບຮົມສູນກາງພັກທັງເປັນຫົວໜ້າຄະນະກຳມະການເນື້ອໃນກອງປະຊຸມໃຫຍ່ຂອງພັກໄດ້ເຄື່ອນໄຫວເຮັດວຽກພ້ອມໂອ້ລົມຕໍ່ການນຳພັກ-ລັດ ຂອງແຂວງຄຳມ່ວນໃນວັນທີ 12 ສິງຫາ 2020 ທີ່ເຮືອນຮັບແຂກເລກ 1 ຂອງແຂວງຄຳມ່ວນ, ຊຶ່ງໃນໂອກາດນີ້ທ່ານ ໂອໄດ ສຸດາພອນ ເຈົ້າແຂວງຄຳມ່ວນກໍ່ໄດ້ລາຍງານສະພາບລວມ, ການພັດທະນາເສດຖະກິດ-ສັງຄົມ ຂອງແຂວງໃຫ້ຮັບຊາບໂດຍລວມແຂວງຄຳມ່ວນແມ່ນຍັງຮັກສາໄດ້ສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບໂດຍພື້ນຖານ, ດ້ານການລົງທຶນຂອງລັດໃນ ປີ 2020 ມີໂຄງການລົງທຶນທີ່ສະພາໄດ້ຮັບຮອງຈຳນວນ 360 ໂຄງການລວມມີມູນຄ່າ 255,60 ຕື້ກີບ ສາມາດຈັດຕັ້ງປະຕິບັດໄດ້ 201 ໂຄງການລວມມູນຄ່າ 92,99 ຕື້ກີບ ເທົ່າກັບ 37,21%, ການລົງທຶນຂອງເອກະຊົນທັງພາຍໃນ ແລະ ຕ່າງປະເທດມີ 40 ໂຄງການມີທຶນທັງໝົດ 22.246 ຕື້ກີບ ໃນນີ້ມີກິດຈະການສຳປະທານ 6 ໂຄງການ ແລະກິດຈະການທົ່ວໄປ 34 ໂຄງການ, ທາງດ້ານການເກັບລາຍຮັບສາມາດຈັດຕັ້ງປະຕິບັດໄດ້ 367 ຕື້ກີບເທົ່າກັບ 47,10% ຂອງແຜນການປີ, ສຳລັບວຽກງານການຊຸກຍູ້ຈັດຕັ້ງດຳເນີນກອງປະຊຸມໃຫຍ່ຢູ່ຂັ້ນເມືອງແມ່ນໄດ້ສຳເລັດໃນວັນທີ 29 ມີນາ ແລະຂັ້ນຮາກຖານອ້ອມຂ້າງແຂວງແມ່ນໄດ້ສຳເລັດໃນວັນທີ 7 ສິງຫາ 2020.

ໂອກາດດັ່ງກ່າວທ່ານ ສົມໃຈ ເພັດສີນວນ ຮອງເລຂາພັກແຂວງ, ປະທານສະພາປະຊາຊົນແຂວງຄຳມ່ວນ, ຫົວໜ້າອະນຸກຳມະການເນື້ອໃນກອງປະຊຸມໃຫຍ່ຂອງແຂວງກໍ່ໄດ້ລາຍງານກ່ຽວກັບການຫ້າງຫາກະກຽມເນື້ອໃນກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງຄຳມ່ວນ, ຈາກນັ້ນທ່ານຫົວໜ້າຄະນະກຳມະການເນື້ອໃນກອງປະຊຸມໃຫຍ່ຂອງພັກກໍ່ໄດ້ໂອ້ລົມໂດຍສະເພາະແມ່ນໄດ້ເນັ້ນໃສ່ການກະກຽມດ້ານເນື້ອໃນຂອງຮ່າງລາຍງານການເມືອງ ແລະຄຳຂວັນກອງປະຊຸມໃຫຍ່ຂອງອົງຄະນະພັກ ແຂວງໃຫ້ສ່ອງແສງເຖິງການຫັນປ່ຽນຢ່າງແຂງແຮງ, ເລິກເຊິ່ງ,ຮອບດ້ານຕາມທິດຊີ້ນຳຂອງກົມການເມືອງສູນກາງພັກ, ຊອກໃຫ້ເຫັນເຖິງສາເຫດທີ່ແທ້ຈິງຂອງຂໍ້ຄົງຄ້າງໃນການປະຕິບັດຄາດໝາຍທີ່ກອງປະຊຸມໃຫຍ່ຄັ້ງທີຜ່ານມາວາງອອກເພື່ອສຸມໃສ່ພິຈາລະນາແກ້ໄຂໃນຕໍ່ໜ້າ, ການວາງແຜນພັດທະນາເສດຖະກິດໃຫ້ອີງໃສ່ຕົວເລກຊີ້ວັດຂອງແຕ່ລະຂົງເຂດໂດຍສອດຄ່ອງກັບທິດຊີ້ນຳແລະຄາດ ໝາຍໃຫຍ່ຂອງຮ່າງລາຍງານການເມືອງຊອກໃຫ້ເຫັນເຖິງສິ່ງທີ່ເອື້ອອຳນວຍທີ່ຫັນຈາກການຂຸດຄົ້ນ ແລະຂາຍຊັບພະຍາກອນທຳມະຊາດແຕ່ຢ່າງດຽວໄປສູ່ການເສີມຂະຫຍາຍທຸກຄວາມອາດສາມາດບົ່ມຊ້ອນໃຫ້ກາຍເປັນຂະແໜງການຜະລິດ ແລະ ຂະແໜງການບໍລິການຂອງແຂວງແຕ່ຕ້ອງຄຳນຶງເຖິງສິ່ງທ້າທາຍເພື່ອເປັນເຈົ້າການແກ້ໄຂ, ການກຳນົດບຸກຄະລາກອນທີ່ຫັນເປັນໜຸ່ມແລະໜັກແໜ້ນທາງດ້ານການເມືອງ, ສາມາດຕອບສະ ໜອງການຜັນຂະຫຍາຍມະຕິ ແລະ ແຜນພັດທະນາເຂົ້າໃນການນຳພາ, ເຂົ້າໃຈໜ້າທີ່ການເມືອງທີ່ວາງອອກ ແລະ ຮູ້ປະດິດສ້າງເພື່ອຜັນຂະຫຍາຍໃນຂະແໜງການຂອງຕົນ ແລະການນຳໃຊ້ກົງຈັກເສນາທິການເຂົ້າໃນການກະກຽມທາງດ້ານເນື້ອໃນ ແລະການຜັນຂະຫຍາຍຢ່າງເປັນລະບົບເພື່ອໃຫ້ຮັບຮູ້ ແລະກຳໄດ້ຈຸດລິເລີ່ມຂອງຮ່າງລາຍງານການເມືອງ,ການຕີລາຄາໃນແຕ່ລະດ້ານເພື່ອຄວາມເປັນເຈົ້າການໃນການກະກຽມເນື້ອໃນຜັນຂະຫຍາຍ ແລະເຊື່ອມຊຶມກ່ຽວກັບຜົນສຳເລັດຂອງກອງປະຊຸມໃນຂັ້ນຕໍ່ໄປ.

________

ຂ່າວ: ກອງຄຳ

ຮູບພາບ: #ຫນັງສືພິມເສດຖະກິດສັງຄົມ

แชร์