ບໍ່ແຕນເປັນເມືອງເກີນດູນທາງດ້ານງົບປະມານ

 ເມືອງບໍ່ແຕນປີ 2020 ເປັນເມືອງເກີນດູນທາງດ້ານງົບປະມານເມື່ອທຽບໃສ່ 10 ເມືອງໃນທົ່ວແຂວງເກີນດູນ 147 ລ້ານກີບ ຫຼືເທົ່າກັບ 7,09% ຂອງແຜນລາຍ ຈ່າຍທັງໝົດຍ້ອນຫັນເອົາເງິນພາກ 60-61 ໄປຈ່າຍຢູ່ແຂວງໂດຍປະຕິບັດຕາມທິດຊີ້ນໍາຂອງຂັ້ນເທິງວາງອອກຈຶ່ງເຮັດໃຫ້ເມືອງບໍ່ແຕນເປັນເມືອງກຸ້ມຕົນເອງທາງດ້ານງົບປະມານ.

ທ່ານ ຊົມພູ ວຽງໄຊ ຫົວໜ້າຫ້ອງການໆເງິນເມືອງບໍ່ແຕນແຂວງໄຊຍະບູລີໄດ້ໃຫ້ຮູ້ວ່າ: ໃນປີ 2020 ເມືອງບໍ່ແຕນຈັດຕັ້ງປະຕິບັດແຜນງົບປະມານແຫ່ງລັດລວມຍອດລາຍຮັບທັງໝົດ 2,22 ຕື້ກີບ ໃນນີ້ລາຍຮັບສ່ວຍສາອາກອນ 2,1 ຕື້ກີບ ເທົ່າກັບ 97,30% ຂອງແຜນລາຍຮັບພາຍໃນເມືອງທັງໝົດ, ທຽບໃສ່ແຜນປີຜ່ານມາຫຼຸດ ລົງ 29,35%, ລາຍຮັບຊັບສິນຂອງລັດ 60 ລ້ານກີບ ເທົ່າກັບ 2,70% ຂອງແຜນລາຍຮັບພາຍໃນ,ທຽບໃສ່ປີຜ່ານມາຫຼຸດລົງ 14,28%, ດ້ານລາຍຈ່າຍທັງໝົດ 2,7 ຕື້ກີບທຽບ ໃສ່ປີຜ່ານມາຫຼຸດລົງ 77,70% ໃນນັ້ນຈ່າຍບໍລິຫານ 1,4 ຕື້ກີບ,ທຽບໃສ່ປີຜ່ານມາຫຼຸດລົງ 7,05%, ຈ່າຍບໍລິຫານວິຊາການທັງໝົດ 615 ລ້ານກີບ,ທຽບໃສ່ປີຜ່ານມາຫຼຸດລົງ 26,17%ໃນນີ້ມີຂະແໜງສາທາລະນະສຸກ 170 ລ້ານກີບ ລວມທັງກອງທຶນຢາໂດຍລວມແລ້ວເມືອງບໍ່ແຕນປີ 2020 ຖືວ່າເປັນເມືອງເກີນດູນ 147 ລ້ານກີບ ເທົ່າກັບ 7,09% ຂອງແຜນລາຍຈ່າຍທັງໝົດ, ຜ່ານການຈັດຕັ້ງປະຕິບັດ 6 ເດືອນຕົ້ນ ປີຜ່ານມາສາມາດເກັບລາຍຮັບໄດ້ທັງໝົດ 1,72 ຕື້ກີບ ເທົ່າກັບ77,82% ຂອງແຜນການປີໃນນີ້ຮັບສ່ວຍສາອາ ກອນປະຕິບັດໄດ້ 16 ຕື້ກີບ ເທົ່າກັບ 78,49% ຂອງແຜນປີ,ລາຍຮັບຊັບສິນຂອງລັດປະຕິບັດໄດ້ 32 ລ້ານກີບ ເທົ່າກັບ 53,59% ຂອງແຜນປີ, ເມືອງຄຸ້ມຄອງຕາມແຜນ 744 ລ້ານກີບ ປະຕິບັດໄດ້ 526 ລ້ານກີບເທົ່າກັບ 70,75% ຂອງແຜນການປີ, ຫ້ອງການອ້ອມຂ້າງເມືອງຕາມແຜນ 615 ລ້ານກີບ ປະຕິບັດໄດ້ 263 ລ້ານກີບ ເທົ່າກັບ42,85% ຂອງແຜນປີ,ບ້ານຄຸ້ມຄອງຕາມແຜນ 1,4 ຕື້ກີບ ປະຕິບັດໄດ້ 1,2 ຕື້ກີບ ເທົ່າກັບ 77,7% ຂອງແຜນປີ,ດ້ານລາຍຈ່າຍທັງໝົດ 980 ລ້ານກີບ ເທົ່າກັບ47,28% ຂອງແຜນປີ, ຈ່າຍເງິນນໍ້າມັນ ແລະເງິນພາກຕ່າງໆຕາມຕົວເລກອານຸມັດທີ່ມີຄວາມຈໍາເປັນ.

  ທ່ານຍັງໃຫ້ຮູ້ຕື່ມວ່າ: 6 ເດືອນທ້າຍ ປີເມືອງບໍ່ແຕນຈະສູ້ຊົນເກັບລາຍຮັບໃຫ້ໄດ້ 493 ລ້ານກີບ, ລາຍຮັບສ່ວຍສາອາກອນຕ້ອງປະຕິບັດໃຫ້ໄດ້ 465 ລ້ານກີບ ເທົ່າ ກັບ 21,51% ຂອງແຜນປີ, ລາຍຮັບຊັບສິນຂອງລັດຕ້ອງປະຕິບັດໃຫ້ໄດ້ 28 ລ້ານກີບເທົ່າກັບ 46,41% ຂອງແຜນການປີ, ສ່ວນການປະຕິບັດລາຍຈ່າຍທັງໝົດ 1,9 ຕື້ກີບ ເທົ່າກັບ 52,72% ຂອງແຜນປີໂດຍຈະເລັ່ງໃສ່ປັບປຸງແບບແຜນວິທີເຮັດວຽກກົນໄກ-ຄຸ້ມຄອງບໍລິຫານລັດໃຫ້ມີຄວາມຮັດກຸມເພື່ອແນໃສ່ສ້າງລາຍຮັບເຂົ້າງົບປະມານຕາມທ່າແຮງທີ່ບົ່ມຊ້ອນ, ປະສານສົມທົບກັບຫ້ອງການທີ່ມີລາຍຮັບບໍລິຫານວິຊາການເພື່ອເກັບກໍາຂໍ້ມູນຫົວໜ່ວຍສະຖິຕິຂໍ້ມູນຕອນດິນ ແລະລາຍຮັບປະເພດອື່ນໆ, ສົ່ງເສີມການເງິນຂັ້ນບ້ານໃຫ້ມີການເຄື່ອນໄຫວຕາມພາລະບົດບາດທີ່ຖືກຕ້ອງຕາມລະບຽບກົດໝາຍບົນຈິດໃຈປະຢັດມັດທະຍັດມີຄວາມໂປ່ງໃສ.

__________

ຂ່າວ: ບຸນທີ, ຮູບພາບ: ໜັງສືພິມເສດຖະກິດ-ສັງຄົມ

                   

แชร์