ທ່ຽວບ້ານນາຍາງໃຕ້ ສໍາພັດວິຖີຊີວິດເຜົ້າລື້ທີ່ຮັກສາໄດ້ເອກະລັກດັ້ງເດີມ

 ບ້ານນາຍາງໃຕ້ ເມືອງນໍ້າບາກ ແຂວງຫຼວງພະບາງ ເປັນບ້ານຂອງຊົນເຜົ່າລື້ທີ່ຍັງຮັກສາໄດ້ເອກະລັກຮີດຄອງປະເພນີດັ້ງເດີມໄວ້ຈົນເຖິງປະຈຸບັນຈົນກາຍເປັນທີ່ຍອມ ຮັບຈາກນັກທ່ອງທັງພາຍໃນ ແລະ ຕ່າງປະເທດທີ່ຢາກໄປທ່ຽວຊົມບ້ານນາຍາງເບິ່ງວິຖີຊີວິດຂອງປະຊາຊົນເມື່ອມາທ່ຽວຫຼວງພະບາງ, ປະຈຸບັນບ້ານນາຍາງໃຕ້ຖືກຈັດເປັນບ້ານທ່ອງທ່ຽວແບບປະຊາຊົນມີສ່ວນຮ່ວມຂອງເມືອງນໍ້າບາກ.

  ທ່ານ ນາງ ແສງມະນີ ສີລິສັກ ປະຊາຊົນບ້ານນາງຍາງໃຕ້ຕາງໜ້າກຸ່ມເຮືອນພັກແຮມດັ້ງເດີມໄດ້ໃຫ້ສໍາພາດຕໍ່ສື່ຂ່າວສັງຄົມວ່າ: ບ້ານນາຍາງໃຕ້ມີທັງໝົດ 147 ຄອບຄົວ, ໃນນັ້ນມີເຮືອນອະນຸລັກໄວ້ໃຫ້ນັກທ່ອງທ່ຽວພັກແຮມ, ເຮືອນປະຊາຊົນຮັບແຂກມີ 30  ຄອບຄົວ, ຄອບຄົວໜຶ່ງທີ່ປະຊາຊົນໃຫ້ພັກແມ່ນສາມາດຮັບໄດ້ 4-6 ຄົນ, ລາຄາເລີ່ມ 40-50 ພັນກີບຕໍ່ ຄືນ, ຖ້າແຂກຈະຮັບປະທານອາຫານນໍາແມ່ນຜູ້ໜຶ່ງຕ້ອງຈ່າຍເພີ່ມ 30.000 ກີບ,ຕໍ່ຄົນຕໍ່ຄາບ,ປີຜ່ານມາໄດ້ມີແຂກຕ່າງປະເທດໄປນອນພັກແຮມນໍາປະຊາຊົນນັບຫຼາຍຮ້ອຍຄົນ,ສາມາດສ້າງລາຍຮັບໃຫ້ກັບປະຊາຊົນດີພໍສົມຄວນ,ມາປະຈຸບັນເຮືອນອະນຸລັກແບບດັ້ງເດີມແທ້ໆຂອງເຜົ້າລື້ຍັງເຫຼືອພຽງ 8 ຫຼັງເທົ່ານັ້ນ, ທັງນີ້ກໍຍ້ອນການຂະຫຍາຍຕົວຂອງເສດຖະກິດຈຶ່ງເຮັດໃຫ້ການພັດທະນາຂອງແຕ່ລະຄອບຄົວຕ້ອງຫັນປ່ຽນໄປຕາມຍຸກສະໄໝໂດຍບໍ່ໄດ້ຄິດເຖິງດ້ານການອະນຸລັກສິ່ງດັ້ງເດີມກໍຄືເຮືອນເກົ່າແກ່ທີ່ບັນພະບູລຸດສ້າງມາເມື່ອເສດຖະກິດດີກໍ່ຕ້ອງທຸບ-ມ້າງສ້າງເປັນເຮືອນກໍ່ມຸງກະເບື້ອງ.

  ສະນັ້ນພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວແຂວງຫຼວງພະບາງເຫັນໄດ້ຄວາມສໍາຄັນໃນການອະນຸລັກເຮືອນດັ້ງເດີມຂອງເຜົ່າລື້ເພື່ອການທ່ອງທ່ຽວແບບຍືນຍົງຈຶ່ງໄດ້ມີການຈັດຝຶກອົບຮົມໃຫ້ກັບປະຊາຊົນຍ້ອນວ່າຊາວບ້ານນາຍາງໃຕ້ແມ່ນບ້ານຊົນເຜົ່າລື້,ຖືເອົາການຕໍ່າຫູກທໍໄໝ ແລະຍ້ອມຜ້າດ້ວຍສີທໍາມະຊາດ ແລະຍັງຮັກສາໄດ້ມູນເຊື້ອວັດທະນະທໍາຂອງເຜົ່າລື້ໄວ້ ແລະ ທາງອໍາການປົກຄອງເມືອງນໍ້າບາກແຂວງຫຼວງພະບາງກໍໄດ້ຄັດເລືອກເອົາເປັນບ່ອນທ່ອງທ່ຽວແບບປະຊາຊົນມີສ່ວນຮ່ວມເປັນບ້ານທໍາອິດຂອງເມືອງຊຶ່ງໄດ້ຈັດຕັ້ງມາແຕ່ຕົ້ນປີ  2018  ເຫັນວ່າໄດ້ຮັບຄວາມສົນໃຈຈາກແຂກນັກທ່ອງທ່ຽວຕ່າງປະເທດດີພໍສົມຄວນ. 

_________

ຂຽນໂດຍ: ສີສຸວັນ

ຮູບພາບ: #ຫນັງສືພິມເສດຖະກິດສັງຄົມ

แชร์