ວິທະຍາໄລຄູປາກເຊ ຍ້ອງຍໍນັກສຶກສາຮຽນດີຮຽນເກັ່ງ

  ເມື່ອອາທິດຜ່ານມາວິທະຍາໄລຄູປາກເຊ ຈັດພິທີປະກາດນັກສຶກສາ 9 ຄົນ ທີ່ຮຽນດີຮຽນເກັ່ງມີຄຸນສົມບັດໄດ້ຮັບການຍ້ອງຍໍໂດຍເປັນກຽດເຂົ້າຮ່ວມຂອງທ່ານ ພອນ ພູວັນໂນ ຜູ້ອຳນວຍການວິທະຍາໄລຄູປາກເຊ (ວຄປ),ທ່ານນາງ ສຸດສະດາ ວົງບັນດິດ ຮອງຜູ້ອຳນວຍການວິທະຍາໄລຄູປາກເຊ (ວຄປ), ມີຫົວໜ້າແຕ່ສາຍວິຊາ, ພະ ນັກງານຄູ-ອາຈານນິສິດນັກສຶກສາເຂົ້າຮ່ວມ 100 ກ່ວາຄົນ.

 ນັກສຶກສາທີ່ໄດ້ຮັບການຍ້ອງຍໍທັງໝົດແມ່ນ 100 ຄົນ ຍິງ 64 ຄົນໃນນີ້ 9 ຄົນ ຍິງ 5 ຄົນ ແມ່ນຈະໄດ້ສະເໜີຮັບການຍ້ອງຍໍຂັ້ນກົມສ້າງຄູກະຊວງສຶກສາທິການ-ກີລາທີ່ມີຄະແນນເກດສະເລ່ຍ 3.50-4.00 ເທົ່າກັບ 3,05% ຄື: ສາຍຄູອະນຸບານປະຖົມມີ 1 ຄົນ ຍິງ 0 ຄົນ, ສາຍວິທະຍາສາດທຳມະຊາດມີ 4 ຄົນ ຍິງ 2 ຄົນ, ສາຍວິທະຍາສາດສັງຄົມມີ 4 ຄົນ ຍິງ 3 ຄົນ ສຳລັບຜູ້ທີ່ມີຄະແນນສູງສຸດເກດສະເລ່ຍ 4.00 ຄື: ທ້າວ ຮັກສະໝອນ ກ້ອນສີລາ ແມ່ນຮຽນປີສຸດທ້າຍລະບົບປະລິນ ຍາຕີສາຍຄູ-ອະນຸບານປະຖົມ, ອີກ 8 ຄົນແມ່ນເກດສະເລ່ຍ 3,50-3,77, ແລະ91 ຄົນ ແມ່ນໄດ້ຮັບການຍ້ອງຍໍຈາກວິທະຍາໄລຄູປາກເຊຄະແນນສະເລ່ຍ 3,00-3,49 ເທົ່າກັບ 30,84% ຄື: ສາຍຄູ-ອະນຸບານປະຖົມມີ 49 ຄົນ ຍິງ 38 ຄົນ, ສາຍວິທະຍາສາດທຳມະຊາດມີ 20 ຄົນ ຍິງ 12 ຄົນ, ສາຍວິທະຍາສາດສັງຄົມມີ 20 ຄົນຍິງ 7 ຄົນ ແລະສາຍພາສາຕ່າງປະເທດມີ 2 ຄົນ ຍິງ 2 ຄົນ.

  ສຳລັບນັກສຶກສາທີ່ໄດ້ຮັບໃບຍ້ອງຍໍຂັ້ນຕ່າງໆນັ້ນມີແນວຄິດອຸ່ນອ່ຽນທຸ່ນທ່ຽງເຊື່ອໝັ້ນຕໍ່ການນຳພາຂອງພັກ-ລັດ, ມີຄຸນສົມບັດສິນທຳປະຕິວັດຕັ້ງໜ້າຝຶກຜົນຫຼໍ່ຫຼອມຕົນເອງ, ຕັ້ງໃຈຄົ້ນຄວ້າຊອກຮູ້ນຳຄູ-ອາຈານ, ຜູ້ມີປະສົບການ ແລະ ສື່ສິ່ງພິມ, ສື່ເອເລັກໂຕຣນິກ ແລະ ຈາກປະສົບການຕົວຈິງຊຶ່ງຜົນໄດ້ຮັບໃນການຮຽນເຫັນວ່າດີຂຶ້ນໃນແຕ່ລະວິຊາເປັນກ້າວ, ເປັນແບບຢ່າງໃຫ້ແກ່ໝູ່ເພື່ອນ, ຊ່ວຍເຫຼືອຜູ້ທີ່ຮຽນອ່ອນ, ຄົ້ນຄວ້າຮໍ່າຮຽນຄົບຕາມຫຼັກສູດສາຂາວິຊາ, ອອກແຮງແຂ່ງຂັນສ້າງຜົນງານການເຄື່ອນໄຫວໃນກິດຈະກຳຕ່າງໆ ຕາມການມອບໝາຍເຊັ່ນ: ເຄື່ອນໄຫວວຽກງານນອກຫຼັກສູດ, ວຽກງານກີລາກາຍະກຳ, ວຽກງານສີລະປະວັນນະຄະດີ, ອອກແຮງ ງານຮັກສາສິ່ງແວດລ້ອມ, ການປ້ອງກັນຄວາມສະຫງົບເວນຍາມໃນສະຖາບັນ,ການບໍລິການສັງຄົມ, ການເຄື່ອນໄຫວກິດຈະກຳເສີມຫຼັກສູດຕະຫຼອດຮອດການປະກອບສ່ວນເຂົ້າໃຫ້ແກ່ສະຖາບັນ (ວຄປ) ແລະວຽກງານດ້ານອື່ນໆ ກໍປະຕິ ບັດຢ່າງຈູບຈ້າວຫ້າວຫັນ.

   ນອກນີ້ນັກສຶກສາແຕ່ລະສາຍປີສຸດທ້າຍຍັງໄດ້ຮັບໃບກຽດຕິຄຸນຈາກຜູ້ອຳນວຍການວິທະຍາໄລຄູປາກເຊທີ່ໄດ້ປະກອບສ່ວນທຶນຮອນເພື່ອນຳໄປບູລະນະກໍ່ສ້າງປັບປຸງປົວແປງອາຄານສະຖານທີ່ໃຫ້ພຽບພ້ອມຮັບໃຊ້ໃນການຈັດການຮຽນ-ການສອນຕໍ່ໜ້າຢ່າງມີຄຸນນະພາບດີກວ່າເກົ່າ.

แชร์