ສກຂ ຫຼວງພະບາງ ຮັບມະຫາຊົນຜູ້ກ້າວໜ້າເຂົ້າເປັນສະມາຊິກພັກສຳຮອງ

  ພະແນກສຶກສາທິການ ແລະກີລາແຂວງຫຼວງພະບາງ ໄດ້ຈັດພິທີຮັບມະຫາຊົນຜູ້ກ້າວໜ້າເຂົ້າເປັນສະມາຊິກພັກສຳຮອງຈຳນວນ 9 ສະຫາຍ, ຍິງ 2 ສະຫາຍ ເມື່ອວັນທີ 11 ສິງຫາ 2020 ຜ່ານມາ ທີ່ພະແນກດັ່ງກ່າວໂດຍການໃຫ້ກຽດເຂົ້າຮ່ວມຂອງ ທ່ານ ຊາຍສະຫວັນ ຈັນມານິດ ຮັກສາການຫົວໜ້າພະແນກສຶກສາທິການ ແລະກີລາແຂວງຫຼວງພະບາງ, ມີສະຫາຍຮອງເລຂາ ໜ່ວຍພັກຫ້ອງການພະແນກ, ສະມາຊິກໜ່ວຍພັກສົມບູນ, ສຳຮອງ, ມະຫາຊົນຜູ້ກ້າວໜ້າ ແລະສະຫາຍພະ ນັກງານທີ່ກ່ຽວຂ້ອງເຂົ້າຮ່ວມ.

   ທ່ານ ອຳພອນ ສີປະເສີດ ຄະນະໜ່ວຍພັກຫ້ອງການພະແນກສຶກສາທິການ ແລະກີລາແຂວງໄດ້ຂຶ້ນ ຜ່ານມະຕິຕົກລົງຂອງຄະນະປະຈຳພັກແຂວງພະບາງ ວ່າດ້ວຍການອະນຸມັດຮັບຮອງເອົາມະຫາຊົນຜູ້ກ້າວໜ້າເຂົ້າເປັນສະມາຊິກພັກສຳຮອງຂອງປະຊາຊົນປະຕິວັດລາວຈຳນວນ 9 ສະຫາຍ, ຍິງ 2 ສະຫາຍ, ມະຫາຊົນຜູ້ກ້າວໜ້າຈຳນວນ 9 ສະຫາຍນີ້ເຫັນວ່າມີຄຸນທາດການເມືອງໜັກແໜ້ນ,ປະຕິບັດລະບຽບວິໄນຂອງພັກປະຊາຊົນປະຕິວັດລາວໄດ້ດີ ແລະມີຄຸນສົມບັດຄົບຖ້ວນແລ້ວຈຶ່ງໄດ້ສະເໜີໃຫ້ທ່ານ ມີນາ ຈັນມະນີ  ຮອງເລຂາຄະນະໜ່ວຍພັກຫ້ອງການພະແນກສຶກສາທິການ ແລະກີລາແຂວງຂຶ້ນມອບໃບຢັ້ງຢືນຮັບຮອງເອົາຢ່າງສົມກຽດ.

 ໂອກາດດຽວກັນສະຫາຍ ອຳພອນ ສີປະເສີດ ຍັງໄດ້ຜ່ານມະຕິຕົກລົງຂອງຄະນະປະຈຳພັກແຂວງວ່າດ້ວຍການມອບບັດສະມາຊິກພັກສົມບູນຂອງພັກປະຊາຊົນປະຕິວັດລາວທີ່ຄົບຕາມມາດຖານເງື່ອນ ໄຂໄດ້ຮັບບັດໃນຮອບທີ V ຊຸດທີ 5 ຈຳນວນ 280 ສະຫາຍ, ຍິງ 67 ສະຫາຍ, ຜ່ານຂໍ້ຕົກລົງຂອງ ທ່ານເຈົ້າແຂວງຫຼວງພະບາງວ່າດ້ວຍການແຕ່ງຕັ້ງຫົວໜ້າ-ຮອງ ຫົວໜ້າຂະແໜງຂອງພະແນກສຶກສາທິການ ແລະກີລາແຂວງຫຼວງພະບາງ ຈຳນວນ 4 ທ່ານ, ຍິງ 1 ທ່ານຄື: ທ່ານ ບຸນເສັງ ພິລາວັນ ເປັນຫົວໜ້າຂະແໜງການສຶກສາກ່ອນໄວຮຽນ,ທ່ານນາງ ສີພະຈັນ ລິນທະວົງ ເປັນຮອງຫົວໜ້າຂະແໜງການສຶກສາກ່ອນໄວຮຽນ, ທ່ານ ຄຳຕັນ ທອນລັດສະໝີ ເປັນຮອງຫົວໜ້າຂະແໜງການສຶກສານອກໂຮງຮຽນ ແລະການຝຶກອົບຮົມວິຊາຊີບຂັ້ນພື້ນຖານ ແລະທ່ານ ສົມພອນ ດີລິວົງ ເປັນຮອງຫົວໜ້າຂະແໜງສາມັນສຶກສາ, ຜ່ານຂໍ້ຕົກລົງຂອງທ່ານຫົວໜ້າພະແນກສຶກສາທິການ ແລະກີລາແຂວງຫຼວງພະບາງວ່າດ້ວຍການປັບປຸງ, ຊັບຊ້ອນພະນັກງານ-ລັດຖະກອນ ພາຍໃນພະແນກສຶກສາ ທິການ ແລະກີລາແຂວງຫຼວງພະບາງ, ນອກຈາກນີ້ໃນພິທີຍັງໄດ້ຮັບຟັງການເຜີຍແຜ່ເອກະສານທີ່ສຳຄັນກ່ຽວວັນປະຫວັດສາດຂອງຊາດອີກຕື່ມ.

แชร์