ສອງພາກສ່ວນເຊັນສັນຍາຮ່ວມມືດ້ານທຸລະກິດ

   ໃນວັນທີ 12 ສິງຫາ 2020 ທີ່ສໍານັກງານໃຫຍ່ທະນາຄານຮ່ວມພັດທະນາ ຫຼື JDB ໄດ້ມີພິທີເຊັນສັນຍາວ່າດ້ວຍການຮ່ວມມືທາງດ້ານທຸລະກິດລະຫວ່າງທະນາ ຄານຮ່ວມພັດທະນາ (JDB) ແລະສະຖາບັນການເງິນຈຸລະພາກ ເພັດອຸໄລ ຈໍາກັດ ໂດຍໃຫ້ກຽດເຂົ້າຮ່ວມໃນພິທີຄັ້ງນີ້ມີທ່ານ ສູນທອນ ຈັນທະວົງ ຮອງປະທານສະພາບໍລິຫານທະນາຄານຮ່ວມພັດທະນາ,ທ່ານ ເພັດ ວົງຂັນຕິ ປະທານກຸ່ມບໍລິສັດ ເພັດໄລພອນກຣຸບ, ມີບັນດາຄະນະອໍານວຍການ ແລະຄະນະຜູ້ບໍລິຫານທັງສອງຝ່າຍເຂົ້າ ຮ່ວມຢ່າງພ້ອມພຽງ.

  ໃນການເຊັນສັນຍາຄັ້ງນີ້ຝ່າຍທະນາຄານຮ່ວມພັດທະນາແມ່ນເຊັນໂດຍທ່ານ ສາຄອນ ຍໍພັນໄຊ ຮອງຜູ້ອໍານວຍການໃຫຍ່ທະນາຄານຮ່ວມພັດທະນາ ແລະສະຖາບັນການເງິນຈຸລະພາກ ເພັດອຸໄລ ຈໍາກັດ ເຊັນໂດຍທ່ານ ຈັນທາ ມິ່ງບຸບຜາ ຜູ້ອໍານວຍການໃຫຍ່ສະຖາບັນການເງິນຈຸລະພາກເພັດອຸໄລ ຈໍາກັດ, ທັງສອງຝ່າຍໄດ້ຕົກລົງເຫັນດີເປັນເອກະພາບໃນການອອກຜະລິດຕະພັນບັດຮ່ວມກັນຄືບັດ Co-Brand ເພື່ອອໍານວຍຄວາມສະດວກໃຫ້ກັບລູກຄ້າຂອງສະຖາບັນການເງິນຈຸລະພາກ ເພັດອຸໄລຈໍາກັດ, ບົນພື້ນຖານການຮ່ວມມືທາງທຸລະກິດຕ່າງຝ່າຍຕ່າງມີຜົນປະໂຫຍດ.

  ໃນພິທີດັ່ງກ່າວທ່ານ ສາຄອນ ຍໍພັນໄຊ ຮອງຜູ້ອໍານວຍການໃຫຍ່ທະນາຄານຮ່ວມພັດທະນາກໍ່ໄດ້ປະກອບຄໍາຄິດຄໍາເຫັນວ່າ: ມີຄວາມຮູ້ສຶກເປັນກຽດເປັນຢ່າງຍິ່ງທີ່ໄດ້ຕ້ອນຮັບສະຖາບັນການເງິນຈຸລະພາກ ເພັດອຸໄລ ທີ່ໄດ້ມີການຮ່ວມມືກັນຖືວ່າເປັນຄູ່ຄ້າທຸລະກິດກັນມາໃນໄລຍະໜຶ່ງແລ້ວໂຄງການຮ່ວມມືລະຫວ່າງທະນາຄານຮ່ວມພັດ ທະນາ ແລະສະຖາບັນການເງິນຈຸລະພາກເພັດອຸໄລຈະໄດ້ຮ່ວມມືອອກຜະລິດຕະພັນບັດ CoBand ຊຶ່ງເປັນບັດ ATM ຂອງ JDB ຊຶ່ງເປັນລູກຄ້າຂອງສະຖາບັນການເງິນຈຸລະພາກ ເພັດອຸໄລ ເປັນການຍົກລະດັບການຮ່ວມມືອີກຂັ້ນໜຶ່ງໃນການບໍລິການແກ່ສັງຄົມກໍ່ຄືລູກຄ້າຈະໄດ້ໃຊ້ບໍລິການເພື່ອຄວາມສະດວກສະບາຍຫຼາຍດ້ານ, ສາ ມາດຖອນເງິນໃນຕູ້ ATM ຂອງທະນາຄານຮ່ວມພັດທະນາ ແລະທະນາຄານອື່ນໆໃນ ສປປ ລາວທີ່ເຂົ້າຮ່ວມໂຄງການໃນປະຈຸບັນແລະຈະໄດ້ຮັບສິດທິພິເສດ ແລະເງື່ອນ ໄຂຫຼາຍຢ່າງທີ່ທາງທະນາຄານຮ່ວມພັດທະນາຈັດໂປໂມຊັ່ນເປັນແຕ່ລະໄລຍະ.

  ຈາກນັ້ນ ທ່ານ ຈັນທາ ມິ່ງບຸບຜາ ຜູ້ອໍານວຍການໃຫຍ່ສະຖາບັນການເງິນຈຸລະພາກ ເພັດອຸໄລ ກໍ່ໄດ້ມີຄໍາເຫັນຕໍ່ພິທີໃນຄັ້ງຄັ້ງນີ້ທ່ານໄດ້ສະແດງຄວາມຮູ້ສຶກພາກພູມ ໃຈທີ່ໄດ້ມີໂອກາດຮ່ວມມືກັບທະນາຄານຮ່ວມພັດທະນາໃນການສ້າງຜະລິດຕະພັນບັດ ATM Co-Brand ເວລາລູກຄ້າມີຄວາມຕ້ອງການທຶນຮອນກໍ່ສາມາດຕອບສະ ໜອງໄດ້ຕາມເງື່ອນໄຂຂອງທະນາຄານຮ່ວມພັດທະນາ, ຖືວ່າເປັນການອໍານວຍຄວາມສະດວກໃຫ້ລູກຄ້າສາມາດເຂົ້າເຖິງແຫຼ່ງທຶນທີ່ໝັ້ນຄົງ ແລະ ຈະພັດທະນາໃຫ້ດີທີ່ສຸດເພື່ອເຮັດໃຫ້ບັດຂອງພວກເຮົາເປັນທີ່ນິຍົມຢູ່ໃນສັງຄົມ.

 ປະຈຸບັນທະນາຄານຮ່ວມພັດທະນາໄດ້ຮ່ວມມືກັບຫຼາຍອົງກອນ ແລະຫຼາຍບໍລິສັດເພື່ອບໍລິການດ້ານການເງິນທີ່ຄົບວົງຈອນໃຫ້ກັບລູກຄ້າທຸກລະດັບຢ່າງເທົ່າທຽມກັນປະ ຕິບັດນະໂບຍາຍຕ່າງຝ່າຍມີຜົນປະໂຫຍດຕາມຄໍາຂວັນທີ່ວ່າ :“ ເຕີບໃຫຍ່ໄປພ້ອມກັນ“.

___________

ຂ່າວ:ຄໍາຕົ້ນ ວໍລະຈັກ

ຮູບພາບ: ໜັງສືພິມເສດຖະກິດ-ສັງຄົມ

แชร์