ສກຈຮ ຈຳປາສັກ ມອບເງິນຊ່ວຍເຫຼືອວຽກງານຕ້ານການລະບາດໂຄວິດ-19

ເພື່ອເປັນການປະກອບສ່ວນຊ່ວຍເຫຼືອສັງຄົມສະຖາບັນການເງິນຈຸລະພາກທີ່ຮັບເງິນຝາກ (ສກຈຮ) ຈໍາປາສັກຈໍາກັດ ໄດ້ມອບເງິນຈໍານວນ 30 ລ້ານກີບ ໃຫ້ແກ່ແຂວງຈໍາປາສັກ ເພື່ອປະກອບສ່ວນຊ່ວຍເຫຼືອວຽກງານຕ້ານ ແລະສະກັດກັ້ນການລະບາດຂອງພະຍາດໂຄວິດ-19.

  ພິທີມອບເງິນຊ່ວຍເຫຼືອຄັ້ງນີ້ໄດ້ມີຂຶ້ນໃນວັນທີ 12 ສິງຫາ 2020 ຜ່ານມາທີ່ຫ້ອງວ່າການປົກຄອງແຂວງຈໍາປາສັກ, ໂດຍເປັນກຽດຕ້ອນຮັບ ແລະ ກ່າວຮັບໂດຍທ່ານ ມະໄລທອງ ກົມມະສິດ ຮອງເຈົ້າແຂວງໆຈໍາປາສັກ, ທັງເປັນຜູ້ຊີ້ນໍາວຽກງານເສດຖະກິດຂັ້ນແຂວງ, ກ່າວມອບໂດຍທ່ານ ໜູເຄືອບ ສິດທິເດດ ຜູ້ອໍານວຍການສະຖາບັນການເງິນຈຸລະພາກທີ່ຮັບເງິນຝາກຈໍາປາສັກຈໍາກັດ, ມີບັນດາທ່ານແຂກຜູ້ໃຫຍ່ຂັ້ນແຂວງ ແລະພະນັກງານວິຊາການຈາກສະຖາບັນເຂົ້າຮ່ວມ.

   ຈຸດປະສົງໃນການມອບທຶນສົມທົບຊ່ວຍເຫຼືອໃນຄັ້ງນີ້ກໍ່ແມ່ນເພື່ອເປັນການປະກອບສ່ວນຊ່ວຍເຫຼືອສັງຄົມ, ຊຶ່ງຍາມໃດ ສກຈຮ ຈໍາປາສັກກໍ່ໄດ້ມີຄວາມຕື່ນຕົວປະກອບສ່ວນຢ່າງຕັ້ງໜ້າຕໍ່ສັງຄົມ, ສໍາລັບຈໍານວນເງິນທີ່ໄດ້ນໍາມາມອບເພື່ອປະກອບສ່ວນຊ່ວຍເຫຼືອວຽກງານຕ້ານ ແລະສະກັດກັ້ນການລະບາດຂອງພະຍາດໂຄວິດ-19 ແມ່ນມີຈໍານວນ 30 ລ້ານກີບ ເພື່ອມອບໃຫ້ແຂວງຈໍາປາສັກນໍາໃຊ້ຕາມທ່າແຮງເຂົ້າໃນວຽກງານດັ່ງກວ່າ.

 ສໍາລັບການແຜ່ລະບາດຂອງພະຍາດໂຄວິດ-19 ໃນ ສປປ ລາວ ສະບັນການເງິນຈຸລະພາກທີ່ຮັບເງິນຝາກຈໍາປາສັກແມ່ນຖືວ່າໄດ້ຮັບຜົນກະທົບພຽງເລັກນ້ອຍ,ຊຶ່ງຜ່ານມາລູກຄ້າ ແລະການດໍາເນີນງານຢູ່ພາຍໃນ ສກຈຮ ຈໍາປາສັກລູກຄ້າໄດ້ມີການຂໍເລື່ອນຊໍາລະເປັນຈໍານວນເພີ່ມຂຶ້ນ, ເນື່ອງຈາກວ່າແຫຼ່ງລາຍຮັບທີ່ແນ່ນອນບໍ່ພຽງພໍເພື່ອນໍາມາຊໍາລະເງິນກູ້ ແລະການດໍາເນີນການເກັບກູ້ ແລະຂະຫຍາຍການບໍລິການກໍ່ມີຄວາມຫຍຸ້ງຍາກເພີ່ມຂຶ້ນໃນການເຂົ້າເຖິງລູກຄ້າເນື່ອງຈາກມາດຕາການຈໍາກັດການເດີນທາງ.

แชร์