ໂຮມຊຸມນຸມ ສະຫຼອງວັນສ້າງຕັ້ງແນວລາວສ້າງຊາດ ຄົບຮອບ 70 ປີ

 ພິທີໂຮມຊຸມນຸມສະເຫຼີມສະຫຼອງວັນສ້າງຕັ້ງແນວລາວສ້າງຊາດຄົບຮອບ 70 ປີ (13 ສິງຫາ 1950-13 ສິງຫາ 2020) ໄດ້ຈັດຂຶ້ນໃນວັນທີ 13 ສິງຫາ 2020 ທີ່ຫໍປະຊຸມແຫ່ງຊາດໃຫ້ກຽດເຂົ້າຮ່ວມຂອງທ່ານ ບຸນຍັງ ວໍລະຈິດ ປະທານປະເທດ, ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ, ອະດີດການນໍາພັກ-ລັດ,ບັນດາລັດຖະມົນຕີ,ຮອງລັດຖະມົນຕີ,ກະຊວງ-ອົງການທຽບເທົ່າ,ຜູ້ແທນແນວລາວສ້າງຊາດ, ພະນັກງານປະຕິວັດອາວຸໂສ ແລະແຂກຖືກເຊີນເຂົ້າຮ່ວມ.

  ໃນພິທີ ທ່ານ ໄຊສົມພອນ ພົມວິຫານ ປະທານສູນກາງແນວລາວສ້າງຊາດໄດ້ຜ່ານບົດລາຍງານຫຍໍ້ມູນເຊື້ອ ແລະຜົນງານແນວລາວສ້າງຊາດໄລຍະ 70 ປີ ໂດຍມີບາງຕອນວ່າ: ພາຍຫຼັງປະເທດຊາດໄດ້ຮັບການປົດປ່ອຍຢ່າງສົມບູນແນວລາວສ້າງຊາດໄດ້ປະຕິບັດໜ້າທີ່ປຸກລະ ດົມຂົນຂວາຍສຶກສາອົບຮົມປະຊາຊົນຢ່າງກວ້າງຂວາງປະຕິບັດສອງໜ້າທີ່ຍຸດທະສາດ ແລະ ພາລະກິດປ່ຽນແປງໃໝ່ຢ່າງມີໄຊ, ສືບຕໍ່ເຕົ້າໂຮມທຸກກໍາລັງປະຕິບັດແຜນນະໂຍບາຍພັດທະນາຊົນນະບົດແກ້ໄຂຄວາມທຸກຍາກຕິດພັນກັບການສ້າງຂະບວນການແຂ່ງຂັນຮັກຊາດ, ຮັກພັດທະນາຕ່າງໆຫັນລົງກໍ່ສ້າງຮາກຖານການເມືອງ ແລະ ຈຸດສຸມພັດທະນາ ຕາມ 4 ເນື້ອໃນ 4 ຄາດໝາຍສ້າງບ້ານ ແລະກຸ່ມບ້ານພັດທະນາເພື່ອສ້າງເປັນຕົວເມືອງນ້ອຍໃນຊົນນະບົດແນໃສ່ສ້າງການຫັນປ່ຽນຢ່າງແຂງແຮງເພື່ອຫຼຸດຜ່ອນຄວາມດ້ອຍພັດທະນາໃນອະນາຄົດສັງລວມແລ້ວຕະຫຼອດໄລຍະ 70 ປີ ຜ່ານມາຍາມໃດກໍ່ໄດ້ເອົາໃຈໃສ່ປັບປຸງຕົນເອງຕາມແຕ່ລະສະໄໝຂອງການປະຕິວັດ, ປັບປຸງກົງຈັກການຈັດຕັ້ງໃຫ້ໜັກແໜ້າເຂັ້ມແຂງ, ມີລະບົບຄະນະປະຈໍາຄະນະທີ່ປຶກສາຕ່າງໆ, ສ້າງສູນຝຶກອົບຮົມ, ບໍາລຸງ,ສ້າງພະນັກງານໃຫ້ເຕີບໃຫຍ່ໃນຂະບວນການວຽກງານຕົວຈິງທາງດ້ານປະລິມານ ແລະຄຸນນະພາບເພີ່ມຈໍານວນກໍາມະການແນວລາວສ້າງຊາດໃນຂົງເຂດພັກ-ລັດເອກະຊົນ, ຊັ້ນຄົນ, ຊົນເຜົ່າ, ສາສະໜາ, ເພດໄວ ແລະຄົນເຊື້ອຊາດລາວຢູ່ຕ່າງປະເທດໄດ້ເອົາໃຈໃສ່ປະຕິບັດວຽກງານການທູດປະຊາຊົນຕາມແນວທາງການຕ່າງປະເທດຂອງພັກໃນຂົງເຂດແນວລາວສ້າງຊາດພ້ອມນັ້ນໄດ້ຮ່ວມມືກັບກຸ່ມບໍລິສັດພົງສະຫວັນດໍາເນີນໂຄງການສ້າງຄອບຄົວ ແລະບ້ານສາມັກຄີຕິດພັນກັບການແກ້ໄຂຄວາມທຸກຍາກຂອງປະຊາຊົນບັນດາເຜົ່າຢູ່ເມືອງລ້ອງຊານ ແຂວງໄຊສົມບູນ, ຊຸກຍູ້ການສ້າງກອງທຶນສາມັກຄີແນວລາວສ້າງຊາດຕິດພັນກັບການສ້າງຕົວແບບການຜະລິດປຸງແຕ່ງກະສິກໍາເປັນສິນຄ້າຢູ່ ແຂວງໄຊສົມບູນ, ສະຫວັນນະເຂດ, ຄໍາມ່ວນ, ຫົວພັນ ແລະແຂວງອື່ນໆຈໍານວນໜຶ່ງປະກອບສ່ວນພັດທະນາຊົນນະບົດແກ້ໄຂຄວາມທຸກຍາກຕາມນະໂຍບາຍຂອງພັກ-ລັດ, ປັບປຸງສາຍໄຍການຈັດຕັ້ງຮອດທ້ອງຖິ່ນຮາກຖານຈາກຄຸນນະພາບນີ້ໄປສູ່ຄຸນນະພາບໃໝ່ທີ່ເປັນລະບົບລະບຽບກວ່າເກົ່າເພື່ອເຮັດຫຼ້ອນໜ້າທີ່ການເມືອງທີ່ພັກປະຊາຊົນປະຕິວັດລາວມອບໃຫ້.

   ໃນພິທີໂຮມຊຸມນຸມຍັງໄດ້ມີການປະດັບຫຼຽນຂອງປະທານປະເທດໂດຍທ່ານ ບຸນຍັງ ວໍລະຈິດ ໄດ້ໃຫ້ກຽດປະດັບຫຼຽນຄໍາແຫ່ງຊາດໃຫ້ແກ່ອົງການແນວລາວສ້າງຊາດ, ພ້ອມທັງປະດັບຫຼຽນໄຊອິດສະຫຼະຊັ້ນIໃຫ້ແກ່ປະທານສູນກາງແນວລາວສ້າງຊາດ ແລະປະດັບຫຼຽນໄຊພັດທະນາຊັ້ນ I ໃຫ້ແກ່ນັກທຸລະກິດດີເດັ່ນຈໍານວນ 1 ທ່ານ.      ໃນໂອກາດດັ່ງກ່າວທ່ານ ບຸນຍັງ ວໍລະຈິດ ໄດ້ກ່າວບົດສູນທອນພົດຕໍ່ພິທີໂຮມຊຸມນຸມວ່າ: ຕະຫຼອດໄລຍະ 70 ປີ ຜ່ານມາອົງການແນວລາວສ້າງຊາດຂັ້ນຕ່າງໆໃນທົ່ວປະເທດໄດ້ຮັບການປັບປຸງບູລະນະຢ່າງເຕີບໃຫຍ່ເຂັ້ມແຂງນັບທັງດ້ານປະລິມານ ແລະຄຸນນະພາບໄດ້ປະກອບສ່ວນຢ່າງສຳຄັນໃຫຍ່ຫຼວງເຂົ້າໃນພາລະກິດແຫ່ງການຕໍ່ສູ້ກູ້ຊາດໃນເມື່ອກ່ອນກໍຄືໃນພາລະກິດແຫ່ງການປົກປັກຮັກສາ ແລະພັດທະນາສ້າງສາປະເທດຊາດໃນໄລຍະໃໝ່ເນື່ອງໃນໂອກາດວັນບຸນໃຫຍ່ປະຫວັດສາດອັນມີຄວາມໝາຍສຳຄັນຂອງຊາດນີ້ໃນນາມຄະນະບໍລິຫານງານສູນກາງພັກ ແລະລັດຖະບານຂໍສະແດງຄວາມຍ້ອງຍໍສັນລະເສີນຕໍ່ອົງການແນວລາວສ້າງຊາດຂັ້ນຕ່າງໆ,ພີ່ນ້ອງຮ່ວມຊາດທຸກຊົນເຜົ່າ, ທຸກຊັ້ນ ຄົນ, ເພດ-ໄວໃນທົ່ວປະເທດທີ່ໄດ້ເຊີດຊູນໍ້າໃຈຮັກຊາດຮັກລະບອບໃໝ່ສາມັກຄີເປັນອັນໜຶ່ງອັນດຽວກັນຢູ່ອ້ອມຂ້າງສູນກາງພັກ ແລະລັດຜ່ານຜ່າຄວາມຫຍຸ້ງຍາກລຳບາກ, ອຸທິດສະຕິປັນຍາ,ກຳລັງວັງຊາ,ເສຍສະລະທຸກສິ່ງທຸກຢ່າງເພື່ອຜົນປະໂຫຍດລວມຂອງປະເທດຊາດອັນແສນຮັກຂອງພວກເຮົາຕະຫຼອດໄລຍະທີ່ຜ່ານມາ.

ໃນຊຸມປີຕໍ່ໜ້ານີ້ແນວລາວສ້າງຊາດຂັ້ນຕ່າງໆໃນທົ່ວປະເທດຈົ່ງສືບຕໍ່ເສີມຂະຫຍາຍມູນເຊື້ອອັນສະຫງ່າງາມໃນຕະຫຼອດໄລຍະ 70 ປີຜ່ານມາອອກແຮງເຄື່ອນໄຫວຢ່າງຫ້າວຫັນຕາມພາລະບົດບາດ ແລະໜ້າທີ່ການເມືອງທີ່ພັກມອບໝາຍໃຫ້ໃນນັ້ນຕ້ອງເອົາໃຈໃສ່ຍົກສູງຄັນທຸງເຕົ້າໂຮມຄວາມສາມັກຄີທົ່ວປວງຊົນບົນພື້ນຖານພັນຕະພາບກຳມະກອນຊາວກະສິກອນ ແລະ ນັກຮຽນຮູ້ປັນຍາຊົນປະຕິວັດທີ່ເປັນຫຼັກແຫຼ່ງພາຍໃຕ້ການນຳພາຂອງພັກພ້ອມທັງສຶກສາອົບຮົມເຂົາເຈົ້າໃຫ້ມີຄວາມຮັບຮູ້ເຂົ້າໃຈຢ່າງຖືກຕ້ອງບັນດາແນວທາງນະໂຍບາຍ ແລະລະບຽບກົດໝາຍຂອງລັດ, ສືບຕໍ່ຕ້ານສະກັດກັ້ນການແຜ່ລະບາດຂອງພະຍາດໂຄ ວິດ-19 ຢ່າງເຄັ່ງຄັດຕາມມາດຕະການທີ່ລັດຖະບານວາງອອກໃນແຕ່ລະໄລຍະ,ຕ້ອງຕັ້ງໜ້າປະຕິບັດສິດສະເໝີພາບ, ສ້າງຄວາມປອງດອງລະຫວ່າງເຜົ່າ ແລະຊັ້ນຄົນຕ່າງໆກຳຈັດແກ້ໄຂທຸກປາກົດການ, ການກະທຳທີ່ຈະກໍໃຫ້ເກີດຄວາມຂັດແຍ່ງ, ຄວາມອາຄາດບາດໝາງກັນລະຫວ່າງເຜົ່າ, ສາສະໜາ ຫຼື ລະຫວ່າງຊັ້ນຄົນຕ່າງໆດ້ວຍການເພີ່ມທະວີຫັນລົງສູ່ຮາກຖານເພື່ອໂຄສະນາສຶກສາອົບຮົມປວງຊົນໃຫ້ຮັບຮູ້ຢ່າງເລິກເຊິ່ງກ່ຽວກັບມູນເຊື້ອຄວາມສາມັກຄີຮັກແພງຊ່ວຍເຫຼືອເພື່ອແຜ່ກັນຢູ່ຮ່ວມກັນດ້ວຍຄວາມປອງດອງ ແລະພ້ອມພຽງກັນສ້າງສາພັດທະນາປະເທດຊາດ.

 ຄຽງຄູ່ກັນນັ້ນຕ້ອງມີສະຕິລະວັງຕົວສະດຸ້ງໄວຕໍ່ການເຄື່ອນໄຫວຂອງອິດທິກຳລັງປໍລະປັກທີ່ຫວັງມ້າງເພທຳລາຍຄວາມສາມັກຄີປອງດອງລະຫວ່າງເຜົ່າ ແລະລະຫວ່າງຊັ້ນຄົນຕ່າງໆສະກັດກັ້ນການສວຍໃຊ້ບັນຫາຊົນເຜົ່າ, ສາສະໜາເພື່ອແບ່ງແຍກຄວາມສາມັກຄີກໍຄວາມວຸ້ນວາຍ ແລະ ຄວາມຫຍຸ້ງຍາກໃນການທຳມາຫາກິນຂອງປະຊາ ຊົນລາວບັນດາເຜົ່າໃນຂອບເຂດທົ່ວປະເທດສ່ວນຄະນະພັກອຳນາດການປົກຄອງທ້ອງຖິ່ນ ແລະຂະແໜງການຕ່າງໆຕ້ອງເພີ່ມທະວີການນຳພາຂອງຕົນສ້າງເງື່ອນໄຂອຳ ນວຍຄວາມສະດວກຕໍ່ການເຄື່ອນໄຫວຂອງອົງການແນວລາວສ້າງຊາດກໍຄືບັນດາອົງການຈັດຕັ້ງໃນລະບົບການເມືອງ ແລະອົງການຈັດຕັ້ງສັງຄົມອື່ນໆ.

----------------

___________

ຮູບພາບ: #ຫນັງສືພິມເສດຖະກິດສັງຄົມ

แชร์