7 ເດືອນ ບ້ານໃຫຍ່ນໍ້າຢ້າງຈັດເກັບລາຍຮັບໄດ້ 13,14%

 ວັນທີ 6 ສິງຫາ 2020 ຢູ່ຫ້ອງການບ້ານໃຫຍ່ນໍ້າຢ້າງເມືອງວຽງທອງ ແຂວງບໍລິຄຳໄຊ ທ່ານ ອາລຸນສັກ ປະທໍາມະວົງຮອງເຈົ້າເມືອງວຽງທອງຜູ້ຊີ້ນໍາວຽກງານຂົງ ເຂດເສດຖະກິດໄດ້ລົງຊຸກຍູ້ການເກັບລາຍຮັບເຂົ້າງົບປະມານໃນປີ 2020 ຢູ່ບ້ານໃຫຍ່ນໍ້າຢ້າງ, ມີພະນັກງານຫ້ອງການ-ການເງິນເມືອງ, ການຈັດຕັ້ງບ້ານເຂົ້າຮ່ວມ.

 ທ່ານ ມູນ ຄຸນປະເສີດ ນາຍບ້ານໃຫຍ່ນໍ້າຢ້າງໄດ້ຜ່ານບົດລາຍງານໃນການຈັດຕັ້ງປະຕິບັດການເກັບລາຍຮັບເຂົ້າງົບປະມານໃນໄລຍະ 7 ເດືອນຜ່ານມາ ແລະແຜນການເດືອນຕໍ່ໜ້າວ່າ: ບ້ານໃຫຍ່ນໍ້າຢ້າງໄດ້ຮັບຕົວເລກເກັບລາຍຮັບເຂົ້າງົບປະມານທີ່ຫ້ອງການ-ການເງິນ ມອບໃຫ້ໃນປີ 2020 ແມ່ນ 171,1 ລ້ານກີບ ຊຶ່ງເກັບຈາກອາ ກອນມອບເໝົາ 187 ພື້ນຖານ, ຄ່າເຊົ່າ 29 ພື້ນຖານ, ທີ່ດີນ 690 ຕອນ ແລະ ຄ່າບໍລິການອື່ນໆ, ສາມາດປະຕິບັດເກັບລາຍຮັບໄດ້ 53,29 ລ້ານກີບ ເທົ່າກັບ 13,14% ຂອງແຜນປີ, ທຽບໃສ່ໄລຍະດຽວກັນຂອງປີຜ່ານມາແມ່ນຫຼຸດລົງ 25,12%, ຄາດຄະເນລາຍຮັບໄລຍະ 5 ເດືອນທ້າຍປີແມ່ນ 83,2 ລ້ານກີບ.

  ການຈັດເກັບລາຍຮັບບໍ່ໄດ້ຮັບຕາມແຜນການທີ່ວາງໄວ້ກໍເພາະວ່າບາງຂະແໜງການທຸລະກິດໄດ້ຢຸດເຊົາກິດຈະການ, ບາງຂະ ແໜງການທີ່ເປີດພັດບໍ່ສາມາດດຳເນີນໄດ້ຕາມຈຸດປະສົງສາເຫດກໍ່ມາຈາກສະພາບການແຜ່ລະບາດຂອງພະຍາດໂຄວິດ-19 ທີ່ມີຜົນສະທ້ອນໃນທົ່ວສັງຄົມ ແລະ ທຸກມຸມໂລກ, ອີກສາເຫດໜຶ່ງກໍ່ມາຈາກນະ ໂຍບາຍຂອງພັກ-ລັດ ທີ່ມີຕໍ່ບັນດາຂະແໜງທຸລະກິດເປັນຕົ້ນແມ່ນການຜ່ອນຊຳລະພາສີອາກອນ, ການຍົກເວັ້ນຄ່າບໍລິການບາງປະເພດ ແລະອື່ນໆ.

แชร์