ຫາລື ການຄຸ້ມຄອງບັນດາຮ້ານກິນດື່ມ ບັນເທີງ-ຄາລາໂອເກະ

  ວັນທີ 6 ສິງຫາຜ່ານມາທີ່ຫ້ອງການຖະແຫຼງຂ່າວ, ວັດທະນະທໍາ ແລະທ່ອງທ່ຽວເມືອງຄູນຄໍາ ແຂວງຄໍາມ່ວນ ໄດ້ຈັດກອງປະຊຸມປຶກສາຫາລືໃນການຄຸ້ມຄອງບັນດາຮ້ານກິນດື່ມບັນເທີງ-ຄາລາໂອເກະໂດຍພາຍໃຕ້ການເປັນປະທານຂອງທ່ານ ແກ້ວຍອດຄໍາ ແກ້ວມະນີ ຫົວໜ້າຫ້ອງການຖະແຫຼງຂ່າວ, ວັດທະນະທໍາ ແລະ ທ່ອງທ່ຽວເມືອງ, ມີບັນດາຫົວໜ້າຫ້ອງການພ້ອມດ້ວຍພະນັກງານວິຊາການຕະຫຼອດຮອດຜູ້ປະການຮ້ານກິນດື່ມ-ບັນເທີງຄາລາໂອເກະພາຍໃນເມືອງເຂົ້າຮ່ວມ.

  ທ່ານ ແກ້ວຍອດຄໍາ ແກ້ວມະນີ ຫົວໜ້າຫ້ອງການຖະແຫຼງຂ່າວ, ວັດທະນະທໍາ ແລະທ່ອງທ່ຽວເມືອງໄດ້ຜ່ານດໍາລັດວ່າດ້ວຍການບັນເທີງ ສະບັບເລກ 315/ລບ, ລົງວັນທີ 2 ຕຸລາ 2017 ແລະ ແຈ້ງການສະບັບເລກທີ 697/ຫສນຍ, ລົງວັນທີ 30 ມິຖຸນາ 2020 ວ່າດ້ວຍສືບຕໍ່ປະຕິບັດມາດຕະການຜ່ອນຜັນປ້ອງກັນ, ຄວບ ຄຸມ, ຕ້ານ, ສະກັດກັ້ນ ແລະແກ້ໄຂການລະບາດພະຍາດໂຄວິດ-19 ໄລຍະ 3, ຫຼັງຈາກນັ້ນຜູ້ທີ່ເຂົ້າຮ່ວມກອງປະຊຸມຍັງໄດ້ພັດປ່ຽນກັນປະກອບຄໍາຄິດຄໍາເຫັນຕໍ່ກອງປະຊຸມຢ່າງກົງໄປກົງມາ ແລະ ມີຄວາມເອກກະພາບກັນໃນການຈັດຕັ້ງປະຕິບັດຜ່ອນຜັນໃນການບໍລິການອາຫານ ແລະ ເຄື່ອງດື່ມຕາມປົກກະຕິແຕ່ຕ້ອງໄດ້ຮັກສາໄລຍະຫ່າງທາງສັງຄົມເປັນຕົ້ນແມ່ນຈັດໂຕະຕັ່ງຫ່າງກັນຕາມບົດແນະນໍາຂອງນາຍົກລັດຖະມົນຕີ ແລະສືບຕໍ່ປິດບັນດາຮ້ານບັນເທີງຄາລາໂອເກະພາຍໃນເມືອງຄູນຄໍາຕາມລະ ບຽບການທີ່ວາງອອກແຕ່ລະໄລຍະ.

  ທ່ານ ແກ້ວຍອດຄໍາ ແກ້ວມະນີ ຫົວໜ້າຫ້ອງການຖະແຫຼງຂ່າວ, ວັດທະນະທໍາ ແລະ ທ່ອງທ່ຽວປະທານກອງປະຊຸມໄດ້ມີຄໍາເຫັນຊີ້ນໍາຕໍ່ກອງປະຊຸມທ່ານໄດ້ຍົກໃຫ້ເຫັນດ້ານຕັ້ງໜ້າ ແລະດ້ານຫຍໍ້ທໍ້ໃນການຈັດຕັ້ງປະຕິບັດໜ້າທີ່ວຽກງານຕ່າງໆ, ເປັນຕົ້ນແມ່ນບັນຫາ ການຜ່ອນຜັນ, ປ້ອງກັນ, ຄວບຄຸມ, ຕ້ານ, ສະກັດກັ້ນ ແລະແກ້ໄຂການ ແຜ່ລະບາດພະຍາດໂຄວິດ-19 ຮຽກຮ້ອງມາຍັງບັນດາຜູ້ປະກອບການຮ້ານກິນດື່ມບັນເທີງ-ຄາລາໂອເກະເອົາໃຈໃສ່ຕໍ່ມາດຕະການດັ່ງກ່າວຢ່າງເຂັ້ມງວດ.

______________

ຂ່າວ: ທ່ານ ສີນົງ ແກ້ວໜູພັນ

ຮູບພາບ: ໜັງສືພິມເສດຖະກິດ-ສັງຄົມ

แชร์