ທະນາຄານແຫ່ງ ສປປ ລາວ ສຳເລັດກອງປະຊຸມສຳມະນາວິຊາສະເພາະ

  ອົງຄະນະພັກທະນາຄານແຫ່ງ ສປປ ລາວ (ທຫລ) ໄດ້ຈັດຕັ້ງກອງປະຊຸມສໍາມະນາວິຊາສະເພາະເພື່ອສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ຜູ້ແທນຄັ້ງທີ IV ຂອງອົງຄະນະພັກ ທຫລ ທີ່ຈະເປີດຂຶ້ນໃນຕໍ່ໜ້ານີ້ຊຶ່ງກອງປະຊຸມສໍາມະນາວິຊາສະເພາະໄດ້ຈັດຂຶ້ນວັນທີ 11 ສິງຫາ 2020 ທີ່ສະໂມສອນສະຖາບັນການທະນາ ຄານໂດຍການໃຫ້ກຽດເຂົ້າຮ່ວມຂອງທ່ານນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ,ປະທານສະພາແຫ່ງຊາດ; ພ້ອມນີ້, ຍັງມີການເຂົ້າຮ່ວມຂອງທ່ານ ສອນໄຊ ສິດພະໄຊ ກໍາມະການສໍາຮອງສູນກາງພັກ, ເລຂາຄະນະພັກ-ຜູ້ວ່າ ການ ທຫລ, ບັນດາຄະນະຜູ້ວ່າການ ທຫລ, ບັນດາກໍາມາທິການທີ່ກ່ຽວຂ້ອງຈາກສະພາແຫ່ງຊາດ, ພະນັກງານປະຕິວັດອາວຸໂສ, ຄະນະກົມ-ຄະນະອໍານວຍການທະນາຄານທຸລະກິດ ແລະພະນັກງານຫຼັກແຫຼ່ງຈາກຂະແໜງການທະນາຄານ.


   ທ່ານ ສອນໄຊ ສິດພະໄຊ ເລຂາຄະນະພັກ-ຜູ້ວ່າການທະນາຄານ ທຫລ ໄດ້ລາຍງານຄວາມຄືບໜ້າດ້ານຕ່າງໆໃນກະກຽມຄວາມພ້ອມການຈັດກອງປະຊຸມໃຫຍ່ຜູ້ ແທນຄັ້ງທີ IV ຂອງອົງຄະນະພັກ ທຫລ. ຈາກນັ້ນ, ບັນດາຄະນະກົມ ແລະຄະນະອໍານວຍການທະນາຄານທຸລະກິດ-ສະເພາະກິດກໍ່ໄດ້ລາຍງານຜົນສໍາເລັດໃນຜ່ານມາ,ສິ່ງທ້າທາຍ ແລະທິດທາງໃນຕໍ່ໜ້າທີ່ຕິດພັນກັບໜ້າທີ່ການເມືອງຕົ້ນຕໍຂອງຂະແໜງການທະນາຄານໂດຍສະເພາະການຮັກສາສະຖຽນລະພາບເງິນຕາແຫ່ງຊາດ; ການສ້າງຄວາມເຂັ້ມແຂງໃຫ້ແກ່ລະບົບສະຖາບັນການເງິນຢູ່ ສປປ ລາວ; ການຈັດຕັ້ງປະຕິບັດນະໂຍບາຍການເຂົ້າເຖິງການບໍລິການທະນາຄານ ແລະການສະໜອງທຶນໃຫ້ແກ່ວິສາຫະກິດຂະໜາດນ້ອຍ ແລະຂະໜາດກາງ; ການສະໜອງທຶນໃຫ້ແກ່ວິສາຫະກິດຂະໜາດນ້ອຍ ແລະ ກາງ ແລະ ການສະໜອງທຶນເພື່ອແກ້ໄຂຄວາມທຸກ ຍາກຊຶ່ງໃນໄລຍະຜ່ານ 5 ປີທີ່ຜ່ານມາເຖິງວ່າຈະປະເຊີນກັບສິ່ງທ້າທາຍຫຼາຍດ້ານຈາກທັງປັດໄຈພາຍນອກ ແລະປັດໄຈພາຍໃນທີ່ບໍ່ເອື້ອອໍານວຍຕໍ່ການຮັກສາສະຖຽນລະພາບເງິນຕາແຫ່ງຊາດກໍຕາມແຕ່ຍັງສາມາດຮັກສາສະເຖຍລະພາບເງິນຕາແຫ່ງຊາດໄດ້, ການລະດົມເງິນຝາກເພີ່ມຂຶ້ນສະເລ່ຍ 13,48% ຕໍ່ປີ, ສິນເຊື່ອເພີ່ມຂຶ້ນສະ ເລ່ຍ 11,22% ຕໍ່ປີ, ອັດຕາດອກເບ້ຍເງິນຝາກ ແລະເງິນກູ້ຕໍ່າລົງ ແລະໜີ້ບໍ່ອອກດອກຜົນກໍ່ບັນລຸຕາມແຜນທີ່ວາງໄວ້.
  ສໍາລັບວຽກງານການຮັກສາສະຖຽນລະພາບດ້ານການເງິນໄດ້ຫັນການຄຸ້ມຄອງໄປສູ່ການຈັດຕັ້ງປະຕິບັດນິຕິກໍາຢ່າງມີປະສິດທິພາບເພີ່ມຂຶ້ນ, ຫັນການເງິນນອກລະ ບົບເຂົ້າສູ່ລະບົບຫຼາຍຂຶ້ນ, ມີຕາໜ່າງການບໍລິການຂອງລະບົບສະຖາບັນການເງິນກວ້າງຂວາງຂຶ້ນຮອດປະຈຸບັນທະນາຄານທຸລະກິດມີທັງໝົດ 44 ແຫ່ງ ເພີ່ມຂຶ້ນ 3 ແຫ່ງ, ມີ 114 ສາຂາເພີ່ມຂຶ້ນ 26 ສາຂາ, ມີ 535 ໜ່ວຍບໍລິການເພີ່ມຂຶ້ນ 64 ໜ່ວຍ; ສໍາລັບສະຖາບັນການເງິນທີ່ຢູ່ພາຍໃຕ້ການຄຸ້ມຄອງຂອງ ທຫລ ມີທັງໝົດ 180 ແຫ່ງ ເພີ່ມຂຶ້ນ 57 ແຫ່ງ ພ້ອມກັນນັ້ນ, ກໍ່ໄດ້ນໍາສະເໜີບາງຂໍ້ຄົງຄ້າງທີ່ຕ້ອງສືບຕໍ່ແກ້ໄຂໃນຕໍ່ໜ້າ.


 ໃນໂອກາດນີ້,ທ່ານ ນາງ ປານີ ຢາທໍ່ຕູ້, ກໍາມະການກົມການເມືອງສູນກາງພັກ, ປະທານສະພາແຫ່ງຊາດໄດ້ສະແດງຄວາມຍ້ອງຍໍຊົມເຊີຍຕໍ່ໝາກຜົນທີ່ຂະແໜງການທະນາຄານຍາດມາໄດ້ໃນໄລຍະ 5 ປີ ຜ່ານມາ, ພ້ອມທັງເນັ້ນໜັກໃຫ້ຂະແໜງທະນາຄານສືບຕໍ່ຮັກສາສະຖຽນລະພາບເງິນຕາແຫ່ງຊາດໃຫ້ໝັ້ນທ່ຽງ; ສຸມໃສ່ການຊຸກ ຍູ້ການສະໜອງສິນເຊື່ອເພື່ອສົ່ງເສີມຫົວໜ່ວຍທຸລະກິດຂະໜາດນ້ອຍ ແລະກາງພ້ອມທັງກຳນົດນະໂຍບາຍສິນເຊື່ອດັ່ງກ່າວຢ່າງຈະແຈ້ງ;ເພີ່ມທະວີການຄຸ້ມຄອງ, ພັດ ທະນາລະບົບທະນາຄານ ແລະສະຖາບັນການເງິນ ແລະລະບົບການຊໍາລະຕ່າງໆໃຫ້ທັນສະໄໝ, ລວມສູນ, ປອດໄພ ແລະປັບປຸງພື້ນຖານໂຄງລ່າງໃນຂະແໜງການທະ ນາຄານໂດຍສະເພາະແມ່ນບັນດານິຕິກຳ, ການບັນຊີ ແລະກົນໄກການຄຸ້ມຄອງທະນາຄານທຸລະກິດ ແລະສະຖາບັນການເງິນໃຫ້ຄົບຖ້ວນ, ສອດຄ່ອງ ແລະຫຍັບເຂົ້າໃກ້ກັບມາດຕະຖານສາກົນເທື່ອລະກ້າວ.

_____________

ຂ່າວ: ຣັດສະໝີ ດວງສັດຈະ

ຮູບພາບ: ໜັງສືພິມເສດຖະກິດ-ສັງຄົມ

แชร์