ຫຼວງພະບາງ ໂຈະງານບຸນຊ່ວງເຮືອປະເພນີທີ່ຍຶ່ງຄານ

 ເນື່ອງຈາກສະພາບການແຜ່ລະບາດຂອງເຊື້ອໂຄວິດ-19 ໃນທົ່ວໂລກຍັງມີຕົວເລກເພີ່ມຂຶ້ນຢ່າງຕໍ່ເນື່ອງກໍຄືບັນດາປະເທດເພື່ອນບ້ານໃກ້ຄຽງ ແລະເພື່ອປະຕິບັດຕາມຄໍາສັ່ງຂັ້ນເທິງໃນການພ້ອມກັນປ້ອງກັນການແຜ່ລະບາດຂອງເຊື້ອພະຍາດໂຄວິດ-19 ຊຶ່ງໃນປີ 2020 ນີ້ທາງນະຄອນຫຼວງພະບາງຈະບໍ່ໄດ້ຈັດໃຫ້ມີງານໂລະລາດ (ຕະ ຫຼາດນັດມວນຊົນເສັ້ນທາງກາງເມືອງ), ໂຈະງານບຸນຊ່ວງເຮືອແບບມີມວນຊົນເຂົ້າຮ່ວມເປັນຈໍານວນຫຼາຍຈະຈັດໃຫ້ເປັນພິທີຕາມຮີດຄອງປະເພນີທີ່ເຄີຍປະຕິບັດກັນຜ່ານມາ.


  ທ່ານ ຈັນສຸກ ພັນໂດລັກ ເຈົ້ານະຄອນຫຼວງພະບາງໄດ້ໃຫ້ສໍາພາດຕໍ່ທີມຂ່າວພວກເຮົາໃນວັນທີ 11 ສິງຫາ 2020 ນີ້ວ່າ: ສໍາລັບການຈັດງານບຸນຊ່ວງເຮືອນເດືອນ 9 ຫໍ່ເຂົ້າປະດັບດິນຊຶ່ງເປັນປະເພນີທີ່ຊາວຫຼວງພະບາງໄດ້ປະຕິບັດສືບທອດຕໍ່ກັນມາແຕ່ດົນນານທຸກໆປີໄດ້ພາກັນເຮັດເຂົ້າຫໍ່ເພື່ອບູຊາກິນທານໄປໃຫ້ຜູ້ທີ່ລ່ວງລັບໄປແລ້ວ ແລະກ່ອນຈະມີການຊ່ວງເຮືອກ່ອນມື້ໜຶ່ງແມ່ນໄດ້ມີງານໂລະລາດ(ຕະຫຼາດນັດມວນຊົນເສັ້ນທາງກາງເມືອງ), ຊຶ່ງເປັນກິດຈະກໍາໜຶ່ງທີ່ບັນດາພໍ່ແມ່ປະຊາຊົນຊາວຫຼວງພະບາງໄດ້ນໍາເອົາສິນຄ້າຜະລິດຕະພັນ, ເຄື່ອງປ່າຂອງດົງມາວາງຂາຍເປັນຈໍານວນຫຼາຍຢູ່ເສັ້ນທາງດັ່ງກ່າວເມື່ອເຫັນວ່າການເຂົ້າຮ່ວມຂອງມວນຊົນເປັນຈໍານວນຫຼວງ ຫຼາຍ ແລະເພື່ອປະຕິບັດຕາມຄໍາສັ່ງຂອງຂັ້ນເທິງເພື່ອປ້ອງກັນການແຜ່ລະບາດຂອງເຊື້ອໂຄວິດ-19 ຈຶ່ງບໍ່ໃຫ້ຈັດງານໂລະລາດໃນປີນີ້ແຕ່ຈະໄດ້ມອບໃຫ້ຕະຫຼາດໄນບາຊາ (ເດີ່ນທາດຫຼວງ) ຈັດງານວາງສະແດງສິນຄ້າ-ຈໍາໜ່າຍສິນຄ້າຈໍານວນໜຶ່ງ.


  ສໍາລັບງານບຸນຊ່ວງເຮືອເດືອນ 9 ຫໍ່ເຂົ້າປະດັບດິນທີ່ຍຶ່ງຄານແມ່ນຈະຈັດພຽງແບບເປັນພິທີ ແລະ ຈະມີການຄອບໄຫວ້ບູຊາສະຖານທີ່ສັກສິດຂອງເມືອງເປັນຕົ້ນແມ່ນລ້ອງແມ່ນໍ້າຄານຈຸດບ້ານຫາດຫ່ຽນ ແລະຈະຈັດໃຫ້ມີການຊ່ວງເຮືອ 15 ສີພາຍ 1 ຄູ່ພາຍປ່ຽນແລວນໍ້າກັນພໍເປັນພິທີ, ຈຸດທີສອງແມ່ນຍຶ່ງດົງບ້ານສັງຄະໂລກຈັດໃຫ້ມີເຮືອຊ່ວງຂະໜາດນ້ອຍ 1 ຄູ່ ເພື່ອພາຍບູຊາໜ້ານໍ້າ ແລະຈຸດຍຶ່ງຄານ ແລະນໍ້າຂອງຂຶ້ນໄປຄອບໄຫວ້ຢູ່ພາບັງ, ປາກຄານຈຸດບ້ານໂພນສະອາດ ແລະ ຈະໄດ້ຈັດໃຫ້ມີເຮືອ ຊ່ວງພຽງ 4 ລໍາໃນນັ້ນເຮືອນາງດໍານາງດອນພາຍເປີດໜ້ານໍ້າ ແລະພາຍເຮືອບູຊາພໍເປັນພິທີບໍ່ປະລະຮີດໃຫ້ໝອງບໍ່ປະລະຄອງໃຫ້ເສົ້າທັງນີ້ກໍເພື່ອໃຫ້ບັນລຸຈຸດປະສົງໃນການຮັກສາຮີດຄອງປະເພນີໄວ້ເຖິງຈະພົບບັນຫາການແຜ່ລະບາດໂຄວິດ-19 ກໍຕາມທາງຊາວຫຼວງພະບາງກໍ່ບໍ່ໄດ້ຢຸດຂາດຕົວ ແລະໄດ້ບູຊົມບູຊາບັນດາສະຖານທີ່ສັກສິດຕ່າງໆ ຕາມຄວາມເຊື່ອຖື.

 ສະນັ້ນປີນີ້ຈຶ່ງໄດ້ແຈ້ງເຖິງບັນດາຜູ້ທີ່ຈະເດີນທາງຈາກຕ່າງແຂວງກໍຄືພາຍໃນບັນດາເມືອງອ້ອມຂ້າງແຂວງທີ່ຈະເຂົ້າມາທ່ຽວຊົມຮ່ວມເຊຍງານບຸນຊ່ວງເຮືອເດືອນ 9 ຫໍ່ເຂົ້າປະດັບດິນທີ່ຍຶ່ງຄານ ນະຄອນຫຼວງພະບາງ ແຂວງຫຼວງພະບາງ ປີນີ້ຈະບໍ່ໄດ້ຈັດງານໃຫຍ່ຄືປີທີ່ຜ່ານມາຈະມີພຽງເຮັດພິທີແບບບູຊາຄອບໄຫວ້ສະຖານທີ່ເທົ່ານັ້ນສໍາລັບປີ 2020 ນີ້ທ່ານເຈົ້ານະຄອນກ່າວ.

__________

ຂ່າວ: ສີສຸວັນ, ຮູບພາບ: ໜັງສືພິມເສດຖະກິດ-ສັງຄົມ

แชร์