ຊາວບ້ານນາຮ່ອງໃຫຍ່ກຽມສ້າງນໍ້າປະປາຊຸມຊົນ

 ພາຍຫຼັງທີ່ກອງທຶນຫຼຸດຜ່ອນຄວາມທຸກຍາກ (ທລຍ) ໄດ້ທົດລອງປະຕິບັດໂຄງການໃນຮູບແບບ CFA ຫຼືຊຸມຊົນເປັນເຈົ້າການມາແລ້ວໃນປີຜ່ານມານີ້,ຊຶ່ງສາມາດຕອບສະໜອງຕາມຄວາມຮຽກຮ້ອງຕ້ອງການຂອງພໍ່ແມ່ປະຊາຊົນບໍ່ວ່າຈະເປັນດ້ານຄຸນນະພາບຂອງໂຄງການທີ່ໄດ້ຮັບ, ການປະກອບສ່ວນ ແລະ ປະຊາຊົນມີລາຍຮັບຈາກກິດຈະກຳຕ່າງໆຂອງໂຄງການ, ຊຶ່ງເປັນຜູ້ລົງມືເຮັດເອງ, ຈັດການບໍລິຫານທຶນດ້ວຍຊຸມຊົນກໍ່ຄືເປັນຜູ້ສ້າງ, ປົກປັກຮັກສາ ແລະນຳໃຊ້.
   ດັ່ງນັ້ນເພື່ອເຮັດໃຫ້ວຽກງານດັ່ງກ່າວໄດ້ສືບຕໍ່ຜັນຂະຫຍາຍ, ຖອດຖອນບົດຮຽນ ແລະ ປະຕິບັດຢ່າງມີປະສິດທິຜົນໃນຕໍ່ໜ້າມາໃນວັນທີ 3 ສິງຫາຜ່ານມາ, ທລຍ ແຂວງສາລະວັນ, ນຳໂດຍທ່ານ ກິພະຈັນ ໂພສາລີ ຫົວໜ້າ ທລຍ ແຂວງສາລະວັນພ້ອມດ້ວຍຄະນະໄດ້ລົງປະເມີນ, ຮັບຮອງແບບ ແລະລິເລີ່ມໂຄງການຍ່ອຍຢູ່ບ້ານນາ ຮ່ອງໃຫຍ່ ເມືອງຕຸ້ມລານ, ໂດຍມີທ່ານ ວັນເພັງ ອິນທະສອນ ຮອງເຈົ້າເມືອງໆຕຸ້ມລານຜູ້ຊີ້ນຳວຽກງານເສດຖະກິດ ແລະຫ້ອງການທີ່ກ່ຽວຂ້ອງຕະຫຼອດຮອດພໍ່ແມ່ປະ ຊາຊົນເຂົ້າຮ່ວມ.
 ປະຊາຊົນບ້ານນາຮ່ອງໃຫຍ່ເມືອງຕຸ້ມລານໄດ້ມີການແບ່ງງານ,ແບ່ງຄວາມຮັບຜິດຊອບໂດຍສະເພາະໄດ້ມີການປຶກສາຫາລືຮັບຮອງແບບແຜນການຈັດຕັ້ງປະຕິບັດ ແລະລິເລີ່ມໂຄງການເປັນຕົ້ນ: ທົບທວນຄືນທີມງານການເງິນບ້ານ, ທີມງານຈັດຊື້-ຈັດຈ້າງ ແລະທີມງານກໍ່ສ້າງບ້ານທີ່ໄດ້ແຕ່ງຕັ້ງມາແລ້ວ, ທັງໄດ້ມີການຄັດເລືອກເອົານາຍ ຊ່າງບ້ານ, ຄັດເລືອກເອົາກຳມະກອນທີ່ຈະມາຮັບໃຊ້ໂຄງການດັ່ງກ່າວໂດຍແນໃສ່ຄອບຄົວທີ່ທຸກທີ່ສຸດມີສ່ວນຮ່ວມຫຼາຍຂຶ້ນ ແລະ ເພື່ອເຮັດໃຫ້ເຂົາເຈົ້າມີລາຍໄດ້ເຂົ້າຄອບ ຄົວ. ໂຄງການທີ່ຈະໄດ້ຈັດຕັ້ງປະຕິບັດໃນຮູບແບບ CFA ຫຼືຊຸມຊົນເປັນເຈົ້າການແມ່ນໂຄງການກໍ່ສ້າງນໍ້າປະປາຊຸມຊົນຢູ່ບ້ານນາຮ່ອງໃຫຍ່, ມີຂະໜາດຄວາມກວ້າງຂອງອ່າງ 2,5 x 2,5 ແມັດ, ຄວາມສູງຂອງອ່າງ 6 ແມັດ, ຄວາມເລິກການເຈາະນໍ້າບາດານ 45-60 ແມັດ ແລະຄຸນນະພາບຂອງນໍ້າຕ້ອງໄດ້ຜ່ານການວິໄຈ, ຮັບຮອງຈາກພະແນກສາທາແຂວງລວມມູນຄ່າການກໍ່ສ້າງທັງ ໝົດ 130 ລ້ານກວ່າກີບ,ໃນນັ້ນທຶນ ທລຍ ສະໜັບສະໜູນ 110 ລ້ານກວ່າກີບ ແລະຊຸມຊົນປະກອບສ່ວນ 10 ລ້ານກວ່າກີບ ພາຍຫຼັງທີ່ໄດ້ສຳເລັດການຝຶກອົບຮົມໃຫ້ນາຍຊ່າງ ແລະຄວາມກຽມພ້ອມຂອງທີມງານຂັ້ນບ້ານຈຶ່ງຈະໄດ້ຈັດຕັ້ງປະຕິບັດຄາດວ່າໄດ້ເລີ່ມຕົ້ນໃນທ້າຍເດືອນສິງຫາ 2020 ນີ້ ແລະຈະໃຫ້ສຳເລັດໃນເດືອນຕຸລາ 2020.
 ຖ້າຫາກໂຄງການກໍ່ສ້າງນໍ້າປະປາຊຸມຊົນສຳເລັດແມ່ນສາມາດຕອບສະໜອງໃຫ້ປະຊາຊົນພາຍໃນບ້ານໄດ້ຫຼຸດຜ່ອນການນຳໃຊ້ແຮງງານໄປຕັກນໍ້າມາໄວ້ໃຊ້ ແລະເຮັດໃຫ້ແຕ່ລະຄອບຄົວມີຄວາມສະດວກສະບາຍ, ທັງໄດ້ສ້າງເງື່ອນໄຂເຮັດໃຫ້ປະຊາຊົນເຮັດສວນຄົວບ້ານນາຮ່ອງໃຫຍ່ມີພົນລະເມືອງທັງໝົດເກືອບ 1.000 ຄົນ, ຍິງ 402 ຄົນ ແລະມີຄົວເຮືອນທັງໝົດ 89 ຄອບຄົວ.

____________

ຂ່າວ: ວິໄລວອນ ສິດທິໄຊ, ໜັງສືພິມເສດຖະກິດ-ສັງຄົມ

 

แชร์