ເມືອງໄຊພູທອງ ເຂັ້ມງວດຄຸ້ມຄອງນຳໃຊ້ເຮືອຕາມລຳແມ່ນໍ້າຂອງ

  ຫວ່າງບໍ່ດົນມາຜ່ານມານີ້, ຢູ່ທີ່ກຸ່ມບ້ານທີ 8 ຂອງເມືອງໄຊພູທອງ ແຂວງສະຫວັນນະເຂດ ກໍ່ໄດ້ເປີດກອງປະຊຸມປຶກສາຫາລືກ່ຽວກັບການປະຕິບັດຄໍາສັ່ງຂອງທ່ານເຈົ້າແຂວງສະຫວັນນະເຂດສະບັບເລກທີ 1060/ຈຂ,ສຂ, ລົງວັນທີ 01/ ກໍລະກົດ 2020 ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງນໍາໃຊ້ເຮືອປະເພດຕ່າງໆຕາມລໍາແມ່ນໍ້າຂອງ, ໂດຍການເຂົ້າຮ່ວມເປັນປະທານຂອງທ່ານ ຄໍາວິໃສ ຜຸຍຍະວົງ ເຈົ້າເມືອງໄຊພູທອງ, ມີບັນດາທ່ານກໍາມະການພັກເມືອງ, ກອງຮ້ອຍຊາຍແດນ 325 ຜູ້ຊີ້ນໍາກຸ່ມບ້ານ ແລະຫ້ອງການໂຍທາທິການ ແລະຂົນສົ່ງເມືອງ ແລະອໍານາດການປົກຄອງທັງ 7 ບ້ານເຂົ້າຮ່ວມ.
  ກອງປະຊຸມຄັ້ງນີ້ກໍ່ໄດ້ພ້ອມກັນປຶກສາຫາລືກ່ຽວກັບການປະຕິບັດຄໍາສັ່ງຂອງທ່ານເຈົ້າແຂວງໃນການຄຸ້ມຄອງນໍາໃຊ້ເຮືອປະເພດຕ່າງໆຕາມລໍາແມ່ນໍ້າຂອງ,ທັງນີ້ກໍ່ເພື່ອເປັນການເພີ່ມທະວີໃນການຈັດຕັ້ງປະຕິບັດວຽກງານຄຸ້ມຄອງ, ຊຸກຍູ້ສົ່ງເສີມ ແລະ ອໍານວຍຄວາມສະດວກໃຫ້ແກ່ບຸກຄົນ, ນິຕິບຸກຄົນທີ່ນໍາໃຊ້ເຮືອປະເພດຕ່າງໆ ເຄື່ອນ ໄຫວກິດຈະກໍາຕາມລໍາແມ່ນໍ້າຂອງໃຫ້ຖືກຕ້ອງຕາມລະບຽບກົດໝາຍ, ທັງເປັນການຈໍາກັດທ່າຂ້າມລອຍທີ່ບໍ່ຖືກຕ້ອງ ແລະແກ້ໄຂປາກົດການຫຍໍ້ທໍ້ດ້ານຕ່າງໆ ເຮັດໃຫ້ຊາຍແດນລະຫວ່າງປະເທດມີຄວາມສະຫງົບ ແລະເປັນລະບຽບຮຽບຮ້ອຍພ້ອມນັ້ນກອງປະຊຸມກໍ່ໄດ້ສ້າງຕັ້ງສາມາຄົມເຮືອ ແລະແຕ່ງຕັ້ງຫົວໜ້າ ແລະສະມາຄົມເຮືອໃນແຕ່ລະບ້ານໃຫ້ເປັນລະບົບຄົບຊຸດ, ສ່ວນລະບຽບການຕ່າງໆຂອງສະມາຄົມແມ່ນໄດ້ມອບໃຫ້ຫ້ອງການໂຍທາທິການ ແລະຂົນສົ່ງເມືອງ, ເຈົ້າແຂວງສະຫວັນນະເຂດຈຶ່ງໄດ້ອອກຄໍາສັ່ງການເຄື່ອນໄຫວຕາມລໍາແມ່ນໍ້າຂອງຕ້ອງໄດ້ຂຶ້ນທະບຽນຖືກຕ້ອງຕາມລະບຽບກົດໝາຍເປັນຕົ້ນ: ເຮືອຮັບໃຊ້ກິດຈະກໍາຄອບຄົວຂອງປະຊາຊົນ, ເຮືອຂົນ ສົ່ງຜູ້ໂດຍສານ, ເຮືອເຄື່ອນໄຫວທຸລະກິດດູດແຮ່-ຊາຍ ແລະດິນດໍາ, ເຮືອຂົນສົ່ງສິນຄ້າ ແລະເຮືອຊ່ວງປະເພນີ, ເຮືອບັນທຸກທີ່ມີນໍ້າໜັກແຕ່ 1 ໂຕນຂຶ້ນໄປແມ່ນຈັດເປັນເຮືອຂົນສົ່ງສິນຄ້າ,ຜູ້ໂດຍສານ ແລະເຮືອເຄື່ອນໄຫວທຸລະກິດດູດແຮ່-ດູດຊາຍ ແລະດິນດໍາ, ການນໍາໃຊ້ເຮືອທຸກປະເພດຂອງບຸກຄົນ, ນິຕິບຸກຄົນທີ່ມີເຮືອໄວ້ໃນຄອບຄອງຕ້ອງໄດ້ຂຶ້ນທະບຽນນໍາເຈົ້າໜ້າທີ່ໂຍທາທິການ ແລະຂົນສົ່ງແຂວງ-ນະຄອນ, ເມືອງໃຫ້ຖືກຕ້ອງຕາມລະບຽບກົດໝາຍ, ສະເພາະເຮືອຂຸດຄົ້ນແຮ່-ຊາຍ ແລະດິນດໍາໃຫ້ເຄື່ອນໄຫວກິດຈະການແຕ່ 6:00 ໂມງຫາ 8: 00 ໂມງ ຂອງແຕ່ລະວັນຕາມການອະນຸຍາດຂອງຂະແໜງການທີ່ກ່ຽວຂ້ອງ.


  ສ່ວນການຈັດຕັ້ງປະຕິບັດແມ່ນມອບໃຫ້ກອງບັນຊາການ ປກຊ-ປກສ ເມືອງ ເປັນໃຈກາງປະສານສົມທົບກັບພາກສ່ວນທີ່ກ່ຽວຂ້ອງ ແລະອໍານາດການປົກຄອງທ້ອງຖິ່ນ ກວດກາລາດຕະເວນຕາມເຂດລຽບຊາຍ ແດນເພື່ອສະກັດກັ້ນການລັກລອບຂົນສົ່ງສິນຄ້າ, ເຄື່ອງຂອງ, ອາວຸດເສິກ, ແຮ່-ຊາຍ ແລະອື່ນໆທີ່ຜິດກົດໝາຍ ແລະລະບຽບການ,ມາດຕະການຕໍ່ຜູ້ລະເມີດບຸກຄົນ,ນິຕິບຸກຄົນທີ່ລະເມີດກົດໝາຍຄໍາສັ່ງສະບັບນີ້ແມ່ນຕ້ອງຖືກດໍາເນີນຄະດີຕາມກົດໝາຍ ແລະລະບຽບການທີ່ກ່ຽວຂ້ອງ, ເຈົ້າໜ້າ ທີ່ພາກລັດ, ອໍານາດການປົກຄອງຕ່າງໆທີ່ໃຫ້ການສະໜັບສະໝູນ, ສົມຮູ້ຮ່ວມຄິດໃຫ້ມີການລະເມີດກົດໝາຍ ແລະຄໍາສັ່ງສະບັບນີ້ຕ້ອງຖືກດໍາເນີນມາດຕະການທາງວິ ໄນຕາມກົດໝາຍຢ່າງເຂັ້ມງວດ.

___________

ຂ່າວ: ພັນທະມິດ ວົງສຸທິ, ຮູບພາບ: ໜັງສືພິມເສດຖະກິດ-ສັງຄົມ

แชร์