ປກສ ແຂວງ ເຜີຍແຜ່ວິທີສະກັດກັ້ນ ແລະຕ້ານອັກຄີໄພຢູ່ປໍ້ານໍ້າມັນ ປຕທ

  ເມື່ອວັນທີ 7 ສິງຫາ 2020 ນີ້ ພະແນກຕໍາຫຼວດສະກັດກັ້ນ ແລະຕ້ານອັກຄີໄພ ປກສ ແຂວງບໍລິຄຳໄຊ, ໄດ້ລົງເຄື່ອນໄຫວໂຄສະນາເຜີຍແຜ່ຝຶກອົບຮົມວຽກງານສະ ກັດກັ້ນ ແລະຕ້ານອັກຄີໄພ-ໄຟໄໝ້ຢູ່ທີ່ປໍ້ານໍ້າມັນ ຫຼື ປຕທ PTT ລາວຈຳກັດ, ບ້ານເວີນທາດ ເມືອງທ່າພະບາດ, ນໍາໂດຍທ່ານ ພັນຕີ ຄອນສະຫວັນ ຈະເລີນສຸກ ແລະທ່ານ ພັນຕີ ບຸນຈັນ ຄຳມະວົງ ຮອງຫົວໜ້າພະແນກຕຳຫຼວດສະກັດກັ້ນ ແລະ ຕ້ານອັກຄີໄພ ປກສ ແຂວງ, ພ້ອມທີມງານໃຫ້ກຽດເຂົ້າຮ່ວມຂອງທ່ານ ບຸນມີ ເທບບູລີ ແລະ ທ່ານ ວຽງສະຫວັນ ແກ້ວມູນຕາ ທັງສອງທ່ານແມ່ນຫົວໜ້າທີມ (safty) ເຊບຕີ້ ບໍລິສັດ PTT ລາວ ຈຳກັດ, ສາຂາແຂວງບໍລິຄຳໄຊພ້ອມດ້ວຍພະນັກງານດັ່ງກ່າວເຂົ້າຮ່ວມ.


  ທ່ານ ພັນຕີ ຄອນສະຫວັນ ຈະເລີນສຸກ ຮອງຫົວໜ້າພະແນກຕຳຫຼວດສະກັດກັ້ນ ແລະຕ້ານອັກຄີໄພ ປກສ ແຂວງ, ໄດ້ກ່າວຈຸດປະສົງ ແລະຍົກໃຫ້ເຫັນເຖິງສາເຫດ ແລະຜົນເສຍເຫຍຈາກການເກີດອັກຄີໄພ-ໄຟໄໝ້ ຊຶ່ງໄດ້ສ້າງຄວາມເສຍຫາຍທາງດ້ານຊັບສິນ, ສຸຂະພາບ ແລະ ຊີວິດຂອງປະຊາຊົນບັນດາເຜົ່າເປັນຈໍານວນຫຼວງຫຼາຍໃນແຕ່ລະປີ, ຍ້ອນເຫັນໄດ້ເຖິງຜົນເສຍຫາຍ ແລະໄພອັນຕະລາຍດັ່ງກ່າວ, ທາງພະແນກສະກັດກັ້ນ ແລະຕ້ານອັກຄີໄພ ປກສ ແຂວງຈຶ່ງລົງມາຝຶກອົບຮົມວຽກງານສະກັດກັ້ນ ແລະຕ້ານອັກຄີໄພຢູ່ປໍ້ານໍ້າມັນ PTT ລາວຈຳກັດບ້ານເວີນທາດ ເມືອງທ່າພະບາດໃນຄັ້ງນີ້, ເພື່ອໃຫ້ເຈົ້າ ຂອງປໍ້ານໍ້າມັນ, ຄະນະຮັບຜິດຊອບ ແລະພະນັກງານ

ນໍາໄປໝູນໃຊ້ເຂົ້າໃນການປົກປ້ອງສິດຜົນປະໂຫຍດ, ເພື່ອຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ, ພ້ອມທັງອະທິບາຍຄວາມຮູ້ພື້ນຖານກ່ຽວກັບການສະກັດກັ້ນ ແລະຕ້ານອັກຄີໄພ,ວິທີປະຕິບັດເມື່ອເກີດອັກຄີໄພ, ການເອົາຕົວລອດຈາກອັກຄີໄພ-ໄຟໄໝ້, ການຊ່ວຍເຫຼືອຜູ້ເຄາະຮ້າຍອອກຈາກສະຖານທີ່ເກີດເຫດ, ວິທີການນຳໃຊ້ອຸປະກອນຂັ້ນພື້ນຖານໃນການດັບມອດໄຟໃນຂັ້ນເບື້ອງຕົ້ນເຊັ່ນ: ຜົງເຄມີແຫ້ງ, ການນໍາໃຊ້ນໍ້າດັບໄຟ, ເຄມີໂຟມ, ທາດອາຍບໍ່ຕິດໄຟ ແລະອື່ນໆ, ອະທິ ບາຍເຖິງວິທີການ ກວດກາບັ້ງມອດໄຟ, ລະບົບສຽງສັນຍານເຕືອນໄພ ແລະບົບນໍ້າປະປາທີ່ຕິດຕັ້ງຕາມຈຸດຕ່າງໆໃຫ້ຢູ່ໃນສະພາບພ້ອມໃຊ້ງານຢູ່ສະເໝີ.


 ຈາກນັ້ນກໍ່ໄດ້ມີການສາທິດການນຳໃຊ້ອຸປະກອນການມອດໄຟຂັ້ນພື້ນຖານ, ການຈຳລອງເວລາມີເຫດການໄຟໄໝ້ສາງເກັບມ້ຽນນໍ້າມັນຢູ່ປໍ້ານໍ້າມັນດັ່ງກ່າວໃຫ້ບັນດາຜູ້ເຂົ້າຮ່ວມຮັບຊົມ ແລະປະຕິບັດຕົວຈິງໃນການນຳໃຊ້ບັ້ງມອດໄຟ, ການມອດໄຟຈາກຖັງແກັສ, ການແກ້ໄຂສະກັດກັ້ນຂັ້ນພື້ນຖານກ່ອນເຈົ້າໜ້າທີ່ດັບເພີງມາຊ່ວຍ ແລະວິ ທີການຊ່ວຍເຫຼືອຕົນເອງ ແລະຜູ້ເຄາະຮ້າຍອອກຈາກສະຖານທີ່ເກີດເຫດໄດ້ຢ່າງປອດໄພ.
  ພາຍຫຼັງສຳເລັດການຮັບຟັງການເຜີຍແຜ່ອາທິບາຍດ້ານທິດສະດີ ແລະ ສາທິດເຫດການຈຳລອງແລ້ວທ່ານ ພັນຕີ ຄອນສະຫວັນ ຈະເລີນສຸກ ຮອງຫົວໜ້າພະແນກຕຳຫຼວດສະກັດກັ້ນ ແລະຕ້ານອັກຄີໄພ ປກສ ແຂວງ, ຍັງໄດ້ມອບໃບຢັ້ງການຝຶກອົບຮົມວຽກງານສະກັດກັ້ນ ແລະຕ້ານອັກຄີໄພໃຫ້ກັບພະນັກງານທີ່ເຂົ້າຮ່ວມອີກດ້ວຍ.

_____________

ຂ່າວ: ວິໄລທອງ, ຮູບພາບ: #ຫນັງສືພິມເສດຖະກິດສັງຄົມ

แชร์