ໄຊສົມບູນ ຫວນຄືນມູນເຊື້ອວັນສ້າງຕັ້ງແນວລາວສ້າງຊາດ

  ແຂວງໄຊສົມບູນ ຫວນຄືນມູນເຊື້ອວັນສ້າງຕັ້ງແນວລາວສ້າງຊາດຄົບຮອບ 70 ປີ ຄື (13 ສິງ ຫາ 1950-13 ສິງຫາ 2020) ທີ່ສະໂມສອນເມືອງອະນຸວົງໂດຍ ການປາຖະກະຖາຂອງທ່ານ ແດງ ປະທຸມທອງ ຮອງເຈົ້າແຂວງ, ມີທ່ານ ເລັ່ງຊົງ ຕົ່ງຊີ ປະທານອົງການແນວລາວສ້າງຊາດແຂວງ, ມີຫົວໜ້າພະແນກການອ້ອມຂ້າງ ແຂວງການນໍາເມືອງອະນຸວົງ, ພະສົງສຳມະເນນ, ພະນັກງານ-ລັດຖະກອນຂອງແຂວງ ແລະເມືອງອະນຸວົງເຂົ້າຮ່ວມຮັບຟັງ.


  ທ່ານ ແດງ ປະທຸມທອງ ຮອງເຈົ້າແຂວງໄດ້ຫວນຄືນມູນເຊື້ອການກຳເນີດເຕີບໃຫຍ່ຂະຫຍາຍຕົວຂອງແນວລາວສ້າງຊາດໂດຍຜ່ານສາມໄລຍະປະຫວັດສາດຄື: ໄລຍະແນວລາວອິດສະຫຼະແມ່ນໄລຍະທີ່ສ້າງເງື່ອນໄຂ ແລະກະກຽມທຸກດ້ານເພື່ອສ້າງຕັ້ງພັກປະຊາຊົນລາວ ແລະແນວລາວອິດສະຫຼະໄດ້ຕາງໜ້າພັກແບກຫາບພາລະກິດທຸກດ້ານ, ນຳພາປະຊາຊົນລາວບັນດາເຜົ່າຕໍ່ສູ້ເອົາຊະນະຈັກກະພັດລ່າເມືອງຂຶ້ນແບບເກົ່າ; ໄລຍະແນວລາວຮັກຊາດໄລຍະນີ້ຄະນະກຳມະການແນວລາວຮັກຊາດເຮັດວຽກ ງານເຕົ້າໂຮມ, ທັງເຮັດວຽກຄຸ້ມຄອງບັນຊາທຸກວຽກງານຂອງກຳລັງຮັກຊາດໄດ້ຕາງໜ້າພັກອອກເຄື່ອນໄຫວເປີດເຜີຍເພື່ອຕໍ່ສູ້ຕ້ານຈັກກະພັດ ແລະລູກມືຂາຍຊາດທາງດ້ານການເມືອງ,ການທະຫານ, ການຕ່າງປະເທດປຸກລະດົມຂົນຂວາຍມະຫາຊົນກໍ່ຄືປະຊາຊົນບັນດາເຜົ່າເຂົ້າຮ່ວມສ້າງພື້ນຖານ ແລະສ້າງກຳລັງປະຕິວັດຊຶ່ງໄດ້ສ້າງທ່ວ ທ່າ ແລະ ບາດກ້າວໃໝ່ໃຫ້ແກ່ຂະບວນການປະຕິວັດອັນເປັນປັດໄຈທີ່ໜັກແໜ້ນໃຫ້ແກ່ການຕໍ່ສູ້ຢີດເຍື້ອຍາວນານຂອງປະຊາຊົນລາວຈາກບ່ອນກຳລັງປະຕິວັດຍັງອ່ອນນ້ອຍໄປເຖິງບ່ອນມີຮາກຖານການເມືອງຢູ່ທຸກທ້ອງຖິ່ນ,ເອົາໜ້ອຍຕີຫຼາຍເອົາອາວຸດລ້າສະໃໝຕີກັບອາວຸດທີ່ທັນສະໃໝສາມາດຕີເອົາໄຊຊະນະຈັກກະພັດທີ່ໃຫຍ່ໂຕກວ່າໝູ່ໃນໂລກ;ໄລຍະທີສາມແມ່ນໄລຍະແນວລາວສ້າງຊາດພາຍຫຼັງປະເທດຊາດໄດ້ຮັບການປົດປ່ອຍຢ່າງສົມບູນອົງການແນວລາວສ້າງຊາດໄດ້ມີການເຕີບໃຫຍ່ຂະຫຍາຍຕົວທາງດ້ານການຈັດຕັ້ງ ແລະ ໄດ້ຮ່ວມກັບບັນດາອົງການຈັດຕັ້ງມະຫາຊົນ ແລະ ອົງການຈັດຕັ້ງສັງຄົມຕ່າງໆສືບຕໍ່ປະຕິບັດ 2 ໜ້າທີ່ຍຸດທະສາດຄື: ປົກປັກຮັກສາ ແລະສ້າງສາພັດທະນາປະເທດຊາດໃຫ້ມີຄວາມຮຸ່ງ ເຮືອງສີວິໄລ.
  ທັງນີ້ກໍເພື່ອເຮັດໃຫ້ພະນັກງານ-ລັດຖະກອນຂອງແຂວງໄຊສົມບູນໄດ້ຮັບຮູ້ເຖິງປະຫວັດການກຳເນີດເຕີບໃຫຍ່ຂະຫຍາຍຕົວຂອງແນວລາວສ້າງຊາດທີ່ໄດ້ຜ່ານຜ່າເສັ້ນ ທາງອັນລະອິດລະອ້ຽວ,ຫຍຸ້ງຍາກ,ແຕ່ພວກເພິ່ນກໍໄດ້ຮັບໄຊຊະນະຕະຫຼອດມາພາຍໃຕ້ການນຳພາຂອງພັກ ແລະໃນພິທີໄດ້ຖືເອົາໂອກາດນີ້ປະດັບຫຼຽນໄຊແຮງງານຂອງປະທານປະເທດ, ຫຼຽນກາແຮງງານ, ໃບຍ້ອງຍໍຂອງນາຍົກລັດຖະມົນຕີ, ໃບຍ້ອງຍໍຂອງທ່ານເຈົ້າແຂວງໃຫ້ບຸກຄົນ ແລະກົມກອງທີ່ມີຜົນງານ,ຄຸນງາມຄວາມດີປະກອບສ່ວນດ້ານເຫື່ອແຮງສະຕິປັນຍາເຂົ້າໃນການປົກປັກຮັກສາ ແລະສ້າງສາພັດທະນາແຂວງໄຊສົມບູນຕະຫຼອດໄລຍະ 5 ປີທີ່ຜ່ານມາພ້ອມດຽວກັນນີ້ຍັງໄດ້ມອບຫຼຽນກາລະນຶກ 70 ປີ ວັນສ້າງຕັ້ງແນວລາວສ້າງຊາດໃຫ້ແກ່ບຸກຄົນທີ່ມີຜົນງານດີເດັ່ນໃນການປະກອບສ່ວນເຄື່ອນໄຫວວຽກງານແນວລາວສ້າງຊາດໃນໄລຍະທີ່ຜ່ານມາຢ່າງເປັນຂະບວນການຟົດຟື້ນ ແລະມີຄວາມໝາຍ-ຄວາມສໍາຄັນ.

แชร์