ຍົກລະດັບຄວາມຮູ້ການພັດທະນາເວັບໄຊ

  ພະແນກວິທະຍາສາດ ແລະເຕັກໂນໂລຊີແຂວງສາລະວັນໄດ້ຈັດຝຶກອົບຮົມຍົກລະດັບຄວາມຮູ້ກ່ຽວກັບການພັດທະນາເວັບໄຊ ແລະການນຳໃຊ້ໂປຣແກຣມຕ່າງໆໃຫ້ແກ່ພະນັກງານທ້ອງຖິ່ນປະຈຳປີ 2020 ພິທີໄດ້ຈັດຂຶ້ນໃນຕອນເຊົ້າວັນທີ 10 ສິງຫາ 2020 ທີ່ຫ້ອງປະຊຸມຂອງຕົນ, ໂດຍການເຂົ້າຮ່ວມຂອງ ທ່ານ ຂັນໄຊ ລັດຖະເຮົ້າ ຫົວໜ້າພະແນກວິທະຍາສາດ ແລະເຕັກໂນໂລຊີແຂວງ, ທ່ານ ປາດີຕ້າ ແສງຈັນຮອງ ສະຖາບັນເຕັກໂນໂລຊີຄອມພິວເຕີ ແລະອີເລັກໂຕນິກກະຊວງວິທະຍາສາດ ແລະ ເຕັກໂນໂລຊີ, ມີວິທະຍາກອນຈາກກະຊວງ,ສຳມະນາກອນຈາກພະແນກການອ້ອມຂ້າງແຂວງ, ບັນດາເມືອງ 8 ຕົວເມືອງ ແລະພະນັກງານພາຍໃນພະແນກເຂົ້າຮ່ວມ.

 ທ່ານ ຂັນໄຊ ລັດຖະເຮົ້າ ໃຫ້ຮູ້ວ່າ: ການຈັດຝຶກອົບຮົມການພັດທະນາເວັບໄຊ ແລະການນຳໃຊ້ໂປຣແກຣມຕ່າງໆໃຫ້ແກ່ທ້ອງຖິ່ນປະຈຳປີ2020 ໃນຄັ້ງນີ້ແມ່ນມີຄວາມໝາຍຄວາມສຳຄັນຢ່າງຍິ່ງເພາະເປັນຂີດໝາຍຫຼັກແຫ່ງການພັດທະນາອີກບາດກ້າວໜຶ່ງໃນຂົງເຂດວຽກງານວິທະຍາສາດ ແລະ ເຕັກໂນໂລຊີໂດຍສະເພາະແມ່ນການ ພັດທະນາເວັບໄຊ ແລະ ການນຳໃຊ້ໂປຣແກຣມຕ່າງໆ, ຊຶ່ງຈະໄດ້ຝຶກອົບຮົມໃນ 4 ຈຸດປະສົງຫຼັກໆຄື: ການສ້າງ ແລະ ພັດທະນາເວັບໄຊດ້ວຍເວີດເຝຣັດ ( Word Press), ການນໍາໃຊ້ໂປຣແກຣມນັບຄະແນນສຽງຜົນການເລືອກຕັ້ງ, ການນຳໃຊ້ໂປຣແກຣມເກັບກຳສະຖິຕິສະມາຊິກພັກ ແລະການນຳໃຊ້ໂປຣແກຣມຖານຂໍ້ມູນບ້ານ, ທັງນີ້ກໍເພື່ອເຮັດໃຫ້ສຳມະນາກອນໄດ້ຖອດຖອນບົດຮຽນ,ຮຽນຮູ້ເຕັກນິກວິທີການທີ່ເປັນວິທະຍາສາດເພື່ອຈະນຳໄປໝູນໃຊ້,ຜັນຂະຫຍາຍເຂົ້າສູ່ການເຄື່ອນໄຫວໃນວຽກ ງານວິຊາສະເພາະຕົວຈິງຂອງຕົນໃຫ້ມີຄວາມເຂັ້ມແຂງຕາມແນວທາງນະໂຍບາຍຂອງພັກ-ລັດ ແລະເພື່ອເຮັດໃຫ້ວຽກງານດັ່ງກ່າວກ້າວໄປຢ່າງເຂັ້ມແຂງ, ສີວິໄລ ແລະພັດທະນາຂຶ້ນໄປເປັນກ້າວໆ.

___________

ຂ່າວ: ນາງ ທິດລານີ, ຮູບພາບ: ໜັງສືພິມເສດຖະກິດ-ສັງຄົມ

แชร์