ເຈົ້າເມືອງໄຊບູລີ ລົງຕິດຕາມຜົນກະທົບຈາກຕາຝັ່ງເຈື່ອນທີ່ບ້ານທ່າຂາມ

   ໃນວັນທີ 10 ສິງຫາ 2020 ທ່ານ ອ່ອນລໍາພັນ ບົວສີແກ້ວ ເຈົ້າເມືອງໄຊບູລີພ້ອມດ້ວຍຄະນະ ແລະໜ່ວຍງານກ່ຽວຂ້ອງໄດ້ລົງຕິດຕາມກວດກາຜົນກະທົບທີ່ເກີດຈາກຕາຝັ່ງແມ່ນໍ້າເຊບັ້ງໄຟເຊາະເຈື່ອນເປັນວົງກວ້າງທີ່ເຂດບ້ານທ່າຂາມ ເມືອງໄຊບູລີ ແຂວງສະຫວັນນະເຂດ.

  ການລົງພື້ນທີ່ຕິດຕາມກວດກາຕົວຈິງໃນຄັ້ງນີ້ເຫັນວ່າປະຊາຊົນບ້ານທ່າຂາມຈໍານວນ 4 ຄອບຄົວ ໄດ້ຮັບຜົນກະທົບຈາກການເຊາະເຈື່ອນຂອງຕາຝັ່ງເຊບັ້ງໄຟເປັນວົງກວ້າງເນື່ອງຈາກຝົນທີ່ຕົກລົງມາເຮັດໃຫ້ລະດັບນໍ້າເຊບັ້ງໄຟມີລະດັບສູງຂຶ້ນ ແລະບໍລິເວນນັ້ນກໍ່ເປັນຈຸດສ່ຽງຫຼໍ່ແຫຼມ ແລະເປັນຈຸດໂຄ້ງຂອງສາຍນໍ້າເຊບັ້ງໄຟບວກກັບຕາຝັ່ງເຊໃນບໍລິເວນນັ້ນແມ່ນມີຄວາມສູງຊັນຈຶ່ງເຮັດໃຫ້ໜ້າດິນຍຸບຕົວລົງໃນນັ້ນມີເຫຼົ້າເຂົ້າ 1 ຫຼັງ, ຫ້ອງນໍ້າ 1 ຫ້ອງ ແລະຕົ້ນໄມ້ໃຫຍ່ນ້ອຍທີ່ເປັນຜົນລະປູກຂອງປະຊາ ຊົນຖືກເຊາະເຈື່ອນ, ລວມມູນຄ່າເສຍຫາຍທັງໝົດປະມານ 5 ລ້ານກີບ, ການເຊາະເຈື່ອນດັ່ງກ່າວມີ ຄວາມກວ້າງປະມານ 10 ແມັດ, ຍາວ 30 ແມັດ.

   ເຖິງແນວໃດກໍ່ຕາມ, ທາງການນໍາຂັ້ນເມືອງ, ໜ່ວຍງານກ່ຽວຂ້ອງກໍ່ຄືອໍານາດການປົກຄອງບ້ານທ່າຂາມກໍ່ໄດ້ເລັ່ງເອົາໃຈໃສ່ໃນການລະດົມກັນຊ່ວຍເຫຼືອເບື້ອງຕົ້ນຕໍ່ຄອບຄົວຜູ້ທີ່ໄດ້ຮັບຜົນກະທົບຢ່າງຮີບດ່ວນເປັນຕົ້ນແມ່ນໄດ້ຊ່ວຍກັນຂົນສິ່ງຂອງເຄື່ອງໃຊ້ອອກຈາກບໍລິເວນນັ້ນໄປຢູ່ຈຸດປອດໄພ ແລະ ຍັງມີເຮືອນຂອງປະຊາຊົນອີກ 4 ຫຼັງຄາເຮືອນທີ່ມີຄວາມສ່ຽງໂດຍຈະຕ້ອງໄດ້ມ້າງ ແລະຍ້າຍອອກໄປເພາະຄາດວ່າຈະໄດ້ຮັບກະທົບໃນຕໍ່ໜ້າ.

-------------

ຂ່າວ:  ເມືອງໄຊບູລີ. ຮູບພາບ: #ຫນັງສືພິມເສດຖະກິດສັງຄົມ

 

แชร์