ຄົງເຊໂດນ ຢືດພ້ອມທຳລາຍສິນຄ້າໝົດອາຍຸ

  ໃນທ້າຍອາທິດຜ່ານມານີ້ຂະແໜງອາຫານ ແລະ ຢາແຂວງຮ່ວມກັບໜ່ວຍງານອາຫານ ແລະ ຢາເມືອງຄົງເຊໂດນໄດ້ລົງກວດກາອາຫານ ແລະ ເຄື່ອງດື່ມຕາມທ້ອງຕະຫຼາດ ແລະຮ້ານຂາຍເຄື່ອງຍ່ອຍຕ່າງໆ,ຊຶ່ງນຳໂດຍທ່ານນາງ ອານຸລັກ ວົງຈອມສີ ພະນັກງານສັງກັດຢູ່ຂະແໜງອາຫານ ແລະຢາແຂວງ, ພ້ອມທີມງານທີ່ຖືກແຕ່ງ ຕັ້ງທີ່ມາຈາກຫ້ອງການທີ່ກ່ຽວຂ້ອງຂອງເມືອງເຂົ້າຮ່ວມ.

  ສິນຄ້າທີ່ລົງກວດກາຕິດຕາມໃນຄັ້ງນີ້ແມ່ນມີປະເພດເຄື່ອງອຸປະໂພກ ແລະບໍລິໂພກຊຶ່ງລົງກວດກາຕິດຕາມທັງໝົດ 54 ຮ້ານ, ກວດພົບ 24 ຮ້ານ, ບໍ່ພົບສິນຄ້າທີ່ເບີດອາຍຸແມ່ນ 30 ຮ້ານ, ສິນຄ້າທີ່ກວດພົບວ່າໝົດອາຍຸການນຳໃຊ້ແມ່ນເປັນປະເພດເຄື່ອງດຶ່ມ 36 ລາຍ ການ, ຄິດເປັນມູນຄ່າ 5 ລ້ານກວ່າກີບ, ປະເພດອາຫານ 56 ລາຍການຄິດເປັນມູນຄ່າ 4 ລ້ານກວ່າກີບ ແລະສິນຄ້າທີ່ກວດພົບທາງເຈົ້າໜ້າທີ່ແມ່ນໄດ້ທໍາການຢຶດເອົາແລ້ວນຳໄປທຳລາຍ.

 ການລົງກວດກາຕິດຕາມໃນຄັ້ງນີ້ກໍ່ເພື່ອຢາກໃຫ້ຜູ້ຊົມໃຊ້ໄດ້ນຳໃຊ້ແຕ່ເຄື່ອງທີ່ມີຄຸນນະພາບ ແລະ ເປັນປະໂຫຍດ,ບໍ່ຖືກເອົາປຽບຈາກເຈົ້າຂອງຮ້ານທີ່ຍັງນຳເຄື່ອງທີ່ໝົດອາຍຸມາຂາຍໃຫ້ລູກຄ້າ ແລະຍັງເຮັດໃຫ້ຜູ້ທີ່ອຸປະໂພກບໍລິໂພກໃນສັງຄົມມີຄວາມປອດໄພຕື່ມອີກ.

____________

ຂ່າວ: ນັກຂ່າວ ຄົງເຊໂດນ

ຮູບພາບ: ໜັງສືພິມເສດຖະກິດ-ສັງຄົມ

แชร์