ຊຽງຂວາງຈະໄດ້ຮັບທຶນຊ່ວຍເຫຼືອລ້າຈາກຝຣັ່ງ

  ທ່ານ ຄຳສອນ ສີສະຍຸດ ຫົວໜ້າຜູ້ປະສານງານແຜນພັດທະນາເຂດເນີນສູງພາກເໜືອໄລຍະ 3 (NUDP3) ພ້ອມດ້ວຍທີມງານຊ່ຽວຊານເຂົ້າພົບປະທ່ານ ບົວສອນ ສີນວນທອງ ຮອງເຈົ້າແຂວງໆຊຽງຂວາງພ້ອມດ້ວຍຄະນະໃນວັນທີ 10 ສິງຫາ 2020 ທີ່ຫ້ອງວ່າການແຂວງ.

    ທ່ານຫົວໜ້າຜູ້ປະສານງານ (NUDP3) ກໍ່ໄດ້ກ່າວເຖິງຈຸດປະສົງຂອງການມາຢ້ຽມຢາມ ແລະເຮັດວຽກຢູ່ແຂວງຊຽງຂວາງວ່າ: ທີມງານກະກຽມຂຽນບົດສະເໜີໂຄງການຄຸ້ມຄອງອ່າງຮັບນໍ້າຂະໜາດນ້ອຍຕິດພັນກັບການຈັດສັນອາຊີບໝັ້ນຄົງທີ່ຈະໄດ້ຮັບງົບປະມານຊ່ວຍເຫຼືອລ້າຈາກລັດຖະບານຝຣັ່ງໂດຍຜ່ານອົງການຝຣັ່ງເພື່ອການພັດທະນາ (AFD) ຄາດຄະເນໂຄງການດັ່ງກ່າວຈະຈັດຕັ້ງປະຕິບັດຢູ່ 4 ແຂວງຄື: ແຂວງຊຽງຂວາງ, ແຂວງຫົວພັນ, ແຂວງຫຼວງພະບາງ ແລະ ແຂວງຜົ້ງສາລີຊຶ່ງແຂວງຊຽງຂວາງມີທ່າແຮງຫຼາຍດ້ານໂດຍສະເພາະວຽກງານກະສິກຳ, ການເຮັດວຽກຮ່ວມກັບປະຊາຊົນຮ່ວມກັບຜູ້ໃຫ້ທຶນ,ໂດຍຈັດຕັ້ງເປັນກຸ່ມການຜະລິດເພື່ອສ້າງເປັນຕົວແບບ ແລະຍືນຍົງ.

  ໂອກາດນີ້ທ່ານຮອງເຈົ້າແຂວງໆຊຽງຂວາງກໍ່ໄດ້ກ່າວສະແດງຄວາມດີໃຈ ແລະຮູ້ບຸນຄຸນຕໍ່ລັດຖະບານຝຣັ່ງທີ່ໄດ້ໃຫ້ການຊ່ວຍເຫຼືອ, ການພັດທະນາຄຸ້ມຄອງອ່າງຮັບນໍ້າເພື່ອການຜະລິດກະສິກຳຂອງປະຊາຊົນແມ່ນມີຄວາມຈຳເປັນຫຼາຍຊຶ່ງສາມາດຜະລິດໄດ້ສອງລະດູທັງເປັນການອະນຸລັກຕົ້ນໄມ້ແລະສິ່ງແວດລ້ອມ, ດິນ, ນໍ້າ,ປ່າໄມ້ ແລະການດຳລົງຊີວິດມີການປ່ຽນແປງດີຂຶ້ນພ້ອມກັບການປ່ຽນແປງພຶດຕິກຳໃນການດຳລົງຊີວິດຕໍ່ກັບທຳມະຊາດເຮັດໃຫ້ປະຊາຊົນມີເນື້ອທີ່ທຳການຜະລິດຫຼາຍຂຶ້ນເປັນການແກ້ໄຂຄວາມທຸກຢາກໄປໃນຕົວ.

____________

ຂ່າວ: ຟ້າ ເສດຖະກິດສັງຄົມ

ຮູບພາບ: ໜັງສືພິມເສດຖະກິດ-ສັງຄົມ

แชร์