ລ້ຽງສັດຂາຍພາໃຫ້ຄອບຄົວມີລາຍຮັບປີໜຶ່ງເກືອບ 700 ລ້ານກີບ

  ການຢຶດຖືອາຊີບຫຍັງກໍຕາມທີ່ຖືກຕ້ອງຕາມກົດໝາຍບ້ານເມືອງກໍ່ສາມາດພັດທະນາຊີວິດການເປັນຢູ່ຂອງຄອບຄົວມີຢູ່ມີກິນ ແລະ ກໍ່ບໍ່ແມ່ນເປັນເລື່ອງທີ່ຫຍຸ້ງຍາກເຮັດບໍ່ໄດ້ຖ້າຫາກຄອບຄົວມີຄວາມເຂົ້າອົກເຂົ້າໃຈກັນມີການວາງແຜນທີ່ແນ່ນອນ ແລະຕະຫຼາດຮອງຮັບສິ່ງສໍາຄັນບັນຫາຕັດສິນແມ່ນຄວາມສາມັກຄີ, ດຸໝັ່ນຂະຫຍັນພຽນແລ້ວຈະເຮັດໃຫ້ຄອບຄົວນັ້ນໆເປັນຄອບຄົວທີ່ດີມີຄວາມສຸກ ແລະມີລາຍຮັບສູງ.

   ດັ່ງຄອບຄົວຂອງລຸງ ບຸນຈັນ ໂພທິລັກ ອາຍຸ 60 ປີ ປະຊາຊົນ ບ້ານບຸ່ງ ເມືອງ ແລະ ແຂວງໄຊຍະບູລີ ພາຍໃນຄອບຄົວຂອງເພິ່ນມີນໍາກັນ 7 ຄົນ, ແຮງງານຕົ້ນຕໍ 2 ຄົນ, ສໍາຮອງ 3 ຄົນ; ລຸງໄດ້ເວົ້້າ ສູ່ທີມຂ່າວແຂວງໄຊຍະບູລີວ່າ: ກ່ອນຈະມາເຖິງຈຸດນີ້ໄດ້ໃນເມື່ອກ່ອນຄອບຄົວຂອງລຸງ ແມ່ນເຮັດນາໃນເນື້ອທີ່ 0,80 ເຮັກຕາ, ຜົນ ຜະລິດເຂົ້າແຕ່ລະປີໄດ້ປະມານ 2-3 ໂຕນ,ນອກຈາກນັ້ນລຸງຍັງໄປຮັບຈ້າງປຸກເຮືອນເພາະລຸງເປັນນາຍຊ່າງໄມ້ແຕ່ໃນໄລຍະນັ້ນຄ່າແຮງງານກໍ່ບໍ່ແພງຈຶ່ງເຮັດໃຫ້ຄອບຄົວມີລາຍຮັບໜ້ອຍພໍແຕ່ກຸ້ມຢູ່ກຸ້ມກິນໄປວັນໆ. ເມື່ອເຫັນໄດ້ຄວາມຈໍາເປັນທີ່ໄດ້ກ່າວມານັ້ນຮອດປີ 2010 ລຸງ ແລະ ຄອບຄົວໄດ້ປຶກສາຫາລືຊອກທາງອອກເພື່ອຊອກຫາລາຍຮັບເຂົ້າຄອບຄົວໃຫ້ຫຼາຍເພື່ອຮອງຮັບໃຫ້ລູກຫຼານມີທຶນໄດ້ເຂົ້າຮຽນ ແລະ ຮຽນຕໍ່ວິຊາຊີບທີ່ເປັນຫຼັກຈຶ່ງໄດ້ຊື້ໂຮງສີເພື່ອມາສີເຂົ້າຈາກຄວາມຄິດເມື່ອມີໂຮງສີເຂົ້າແລ້ວ ຕ້ອງມີການຊື້ໝູມາລ້ຽງໃນເບື້ອງຕົ້ນຊື້ໝູລາດມາລ້ຽງ 6 ໂຕ, ລົງທຶນຊື້ 1 ລ້ານ 8 ແສນກີບ ລ້ຽງໄດ້ 5 ເດືອນແລ້ວຂາຍໄດ້ 7 ລ້ານ 9 ແສນກີບ. ມາເບິ່ງລວມແລ້ວການລ້ຽງໝູລາດນັ້ນແມ່ນນານໃຫຍ່ຕົກປີ 2011 ເລີຍຊື້ໝູພັນມາລ້ຽງ 14 ໂຕ, ໂຕລະ 3 ແສນ 50 ພັນກີບ ເປັນເງິນ 4 ລ້ານກວ່າກີບ ລ້ຽງໄດ້ 4-5 ເດືອນ ແລ້ວຂາຍອອກຫັກຕົ້ນທຶນແລ້ວມີກໍາໄລຢູ່ 8 ລ້ານກີບ. ດັ່ງນັ້ນຈຶ່ງເປັນແຮງຈຸງໃຈໃຫ້ຄອບຄົວຂອງລຸງລ້ຽງໝູຂາຍຫຼາຍຂຶ້ນໃນແຕ່ລະປີ.

   ປະຈຸບັນລຸງມີໝູພໍ່ແມ່ພັນທັງໝົດ 12 ໂຕ, ໝູຮຸ່ນ 80 ກວ່າໂຕປີໜຶ່ງຜະລິດລູກໝູນ້ອຍໄດ້ 300 ໂຕເພາະປີໜຶ່ງຜະລິດລູກໝູໄດ້ 9-10 ຊຸດ, ຊຸດລະ 25-30 ໂຕ, ອະນຸບານປະມານ 2-3 ອາທິດ ແລ້ວແຍກອອກຈາກແມ່ໄປໄວ້ຄອກໜຶ່ງ; ເມື່ອລ້ຽງໄດ້ 5-6 ເດືອນ ແລ້ວຂາຍອອກ, ແຕ່ລະໂຕຈະມີນໍ້າໜັກປະມານ 100 ກິໂລຂຶ້ນໄປໃນລາຄາຂາຍກິໂລໜຶ່ງ 27.000 ກີບຕໍ່ກິໂລ. ປີໜຶ່ງແມ່ນຂາຍບໍ່ຫຼຸດ 250-300 ໂຕ ໂດຍແມ່ຄ້າທີ່ໂຮງຂ້າສັດມາຮັບເອົາກັບທີ່ສາມາດສ້າງລາຍຮັບໄດ້ຈາກການຂາຍໝູເມື່ອຫັກຕົ້ນທຶນຊື້ສາລີ, ຫົວອາຫານ ແລະຄ່າແຮງງານຈ້າງຜູ້ອະນາໄມຄອກໝູໃນແຕ່ລະມື້ເດືອນໜຶ່ງ 1 ລ້ານ 5 ແສນກີບຕໍ່ ເດືອນແລ້ວຈະມີກໍາໄລຢູ່ 400 ລ້ານກີບຕໍ່ປີ.

  ນອກຈາກການລ້ຽງໝູແລ້ວຄອບຄົວຂອງລຸງຍັງລ້ຽງເປັດ, ໄກ່, ປາ, ສີເຂົ້າ ມີລາຍຮັບໄດ້ 200 ກວ່າລ້ານກີບ; ສັງລວມແລ້ວຄອບຄົວຂອງລຸງສ້າງລາຍຮັບໄດ້ທັງໝົດ ເມື່ອຫັກຕົ້ນທຶນ ແລະຈ້າງກໍາມະກອນ 2 ຄົນສີ ເຂົ້າເດືອນລະ 10 ລ້ານ ແລ້ວຈະມີກໍາໄລ ຫຼືທຶນໝູນວຽນ 600 ກວ່າລ້ານກີບຕໍ່ປີ.

  ໃນຕໍ່ໜ້າລຸງເວົ້າວ່າຈະສືບຕໍ່ບົວລະບັດຮັກສາດູແລສັດທີ່ມີຢູ່ໃຫ້ມີສຸຂະພາບແຂງແຮງໃຫຍ່ໄວເພື່ອຂາຍໃຫ້ໄດ້ລາຄາດີສ່ວນວ່າການຂະຫຍາຍໃໝ່ນັ້ນແມ່ນບໍ່ມີແຮງແລ້ວ ລູກຫຼານກໍ່ເປັນພະນັກງານໝົດທຸກຄົນ. ຈາກຊີວິດຕົວຈິງທີ່ກິ່ງເກືອກລິເລື່ອຢູ່ກັບການລ້ຽງສັດຂາຍມາເປັນເວລາ 10 ປີ ເຮັດໃຫ້ຊີວິດການເປັນຢູ່ດີຂຶ້ນມີເຮືອນຢູ່ຖາ ວອນ, ມີເງິນສົ່ງລູກເຕົ້າເຂົ້າຮໍ່າຮຽນຈົນເປັນພະນັກງານສັງກັດລັດ, ມີເງິນແຮໄວ້ໃຊ້ສ່ອຍໃນຍາມຈໍາເປັນ.

-----------------

ຂ່າວ: ບຸນທີ, ຮູບພາບ: ໜັງສືພິມເສດຖະກິດ-ສັງຄົມ

แชร์